ଭୁବନେଶ୍ୱର ୧୯।୯ (ବ୍ୟୁରୋ):ଭୁବନେଶ୍ୱର ଲିଙ୍ଗରାଜ ଥାନା ଅନ୍ତର୍ଗତ ପୁନାମା ଗେଟ୍ ନିକଟ ଏକ ଭଡ଼ାଘରେ ରହୁଥିବା ଜଣେ ଇଞ୍ଜିନିୟରିଂ ଛାତ୍ର ରବିବାର ଫ୍ୟାନରେ ରଶି ଲଗାଇ ଆତ୍ମହତ୍ୟା କରିଛନ୍ତି। ସେ ହେଲେ ଜଗତ୍ସିଂପୁର ଜିଲା ତିର୍ତ୍ତୋଲ ଥାନା ଅନ୍ତର୍ଗତ ଗୋରଡ଼ା ଗ୍ରାମର ସିଦ୍ଧାର୍ଥ କୁମାର ନାୟକ (୨୧)। କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ପୋଲିସ ସିଦ୍ଧାର୍ଥଙ୍କ ମୃତଦେହକୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି। ପୋଲିସ ସିଦ୍ଧାର୍ଥଙ୍କ ମୋବାଇଲ ଜବତ କରିଛି। ଏନେଇ ଏକ ଅପମୃତ୍ୟୁ ମାମଲା (ନଂ.୩୩/୨୦୨୨) ରୁଜୁ କରି ତଦନ୍ତ ଆରମ୍ଭ କରିଛି। ଥାନାଧିକାରୀ ଶରତ ପାତ୍ର କହିଛନ୍ତି, ପ୍ରାଥମିକ ତଦନ୍ତରୁ ସିଦ୍ଧାର୍ଥ ଆତ୍ମହତ୍ୟା କରିଥିବା ସ୍ପଷ୍ଟ ହୋଇଥିବାବେଳେ ଅଧିକ ପ୍ରମାଣ ପାଇଁ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରାଯାଇଛି। ଆତ୍ମହତ୍ୟାର କାରଣ ଜାଣିବାକୁ ପୋଲିସ ପକ୍ଷରୁ ଚେଷ୍ଟା କରାଯାଉଥିବା ସେ କହିଛନ୍ତି। ଅନ୍ୟପକ୍ଷରେ ସିଦ୍ଧାର୍ଥ ପ୍ରେମ ବ୍ୟାପାରକୁ ନେଇ ଆତ୍ମହତ୍ୟା କରିଥିବା କୁହାଯାଉଛି। ତେଣୁ ପୋଲିସ ତାଙ୍କ ମୋବାଇଲ ଫୋନ୍ରୁ କଲ୍ ଡିଟେଲ୍ସ ରିପୋର୍ଟ (ସିଡିଆର୍) ଯାଞ୍ଚ କରି ତଥ୍ୟ ଯୋଗାଡ଼ କରୁଛି।
ସୂଚନା ଅନୁଯାୟୀ, ସିଦ୍ଧାର୍ଥ ସିଆର୍ପି ଅଞ୍ଚଳରେ ଥିବା ଏକ ଘରୋଇ ଇଞ୍ଜିନିୟରିଂ କଲେଜର କମ୍ପ୍ୟୁଟର ସାଇନ୍ସ ବିଭାଗର ଶେଷବର୍ଷ ଛାତ୍ର ଥିଲେ। ସାଙ୍ଗ ବାସୁଦେବ ପଣ୍ଡାଙ୍କ ସହ ସେ ୨୦ଦିନ ହେବ ପୁନାମା ଗେଟ ନିକଟରେ ଭଡ଼ାଘର ନେଇ ରହୁଥିଲେ। ବାସୁଦେବ ଏକ ବେସରକାରୀ କମ୍ପାନୀରେ ଚାକିରି କରୁଛନ୍ତି। ବିଶ୍ୱକର୍ମା ପୂଜା ପାଇଁ ସେ ଶନିବାର ରାତିରେ ଅଫିସ ଚାଲିଯାଇଥିଲେ। ତେଣୁ ସିଦ୍ଧାର୍ଥ ଭଡ଼ାଘରେ ଏକା ଥିଲେ। ବାସୁଦେବ ରବିବାର ପୂର୍ବାହ୍ନ ୧୧ଟାରେ ପହଞ୍ଚତ୍ ଭଡ଼ାଘର ଭିତରପଟୁ ବନ୍ଦ ଥିବା ଦେଖିବାକୁ ପାଇଥିଲେ। ଏଥିସହ ସିଦ୍ଧାର୍ଥଙ୍କୁ ଡାକିଥିଲେ ମଧ୍ୟ ସେ କବାଟ ଖୋଲି ନ ଥିଲେ। ତେଣୁ ସେ ଝରକା ପଟେ ଡାକିବାକୁ ଯାଇଥିବାବେଳେ ସିଦ୍ଧାର୍ଥ ଫ୍ୟାନରେ ଝୁଲୁଥିବା ଦେଖିବାକୁ ପାଇଥିଲେ। ଏନେଇ ସେ ଥାନାକୁ ଖବର ଦେଇଥିଲେ। ପୋଲିସ ପହଞ୍ଚତ୍ ପରିବାର ଲୋକଙ୍କୁ ଭିଡିଓ କଲ୍ କରି କବାଟ ଭାଙ୍ଗିବା ସହ ମୃତଦେହ ଜବତ କରି ବ୍ୟବଚ୍ଛେଦ ଲାଗି ହସ୍ପିଟାଲ ପଠାଇଥିଲା।