ନୂଆଦିଲ୍ଲୀ,୨୯ା୯(ପି.ଟି.):ବେରୋଜଗାରୀ ବୃଦ୍ଧି ପାଉଥିବାରୁ କଂଗ୍ରେସ ଗୁରୁବାର କେନ୍ଦ୍ରର ନରେନ୍ଦ୍ର ମୋଦି ସରକାରଙ୍କୁ ଟାର୍ଗେଟ କରିଛି। ଏହି ସରକାର ଦେଶର ଯୁବବର୍ଗଙ୍କ ଆଶା ଓ ସ୍ବପ୍ନକୁ ଦଳିଦେଇଥିବାରୁ ସେମାନଙ୍କ ମଧ୍ୟରେ ଆତ୍ମହତ୍ୟା ବୃଦ୍ଧି ପାଉଛି ବୋଲି କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ଅଭିଯୋଗ କରିଛନ୍ତି। ଜନସାଂଖିକ ବିଭାଜନ ସମସ୍ୟାର ସମାଧାନ କରିବା ପରିବର୍ତ୍ତେ ସରକାର ଏହାକୁ ଜନସାଂଖିକ ବିପର୍ଯ୍ୟୟରେ ପରିଣତ କରିଛନ୍ତି। ଯୁବବର୍ଗଙ୍କ ମଧ୍ୟରେ ଆତ୍ମହତ୍ୟା ହାର ବଢ଼ୁଥିବାବେଳେ ସରକାର ଜାତୀୟ ଅପରାଧ ରେକର୍ଡ ବ୍ୟୁରୋ ତଥ୍ୟରେ ଜାଲିଆତି କରିବାକୁ ଚାହିଁପାରନ୍ତି ବୋଲି ଜୟରାମ ଆଶଙ୍କା ବ୍ୟକ୍ତ କରିଛନ୍ତି। ବେରୋଜଗାରୀ ଦେଶର ଏକ ବଡ଼ ସମସ୍ୟା ହୋଇଛି। ଇଞ୍ଜିନିୟରିଂ ଡିଗ୍ରୀଧାରୀଙ୍କ ସମେତ ବହୁସଂଖ୍ୟାରେ ଉଚ୍ଚଶିକ୍ଷିତ ଆନୁଷ୍ଠାନିକ ନିଯୁକ୍ତି ପାଇବାରେ ବିଫଳ ହୋଇ କୁଲି କାମ ଆପଣାଇବାକୁ ବାଧ୍ୟ ହେଉଥିବା କଂଗ୍ରେସ ନେତା ରାହୁଲ ଗାନ୍ଧୀ ଦିଲ୍ଲୀର ଆନନ୍ଦ ବିହାର ଟର୍ମିନାଲଠାରେ କୁଲିମାନଙ୍କ ସହ ଆଲୋଚନାରୁ ଜାଣିବାକୁ ପାଇଥିଲେ ବୋଲି ଜୟରାମ କହିଛନ୍ତି। ମୋଦି ସରକାର ପର୍ଯ୍ୟାପ୍ତ ନିଯୁକ୍ତି ପ୍ରଦାନ କରିବାରେ ବିଫଳ ହୋଇଥିବାରୁ ଏଭଳି ସ୍ଥିତି ଉପୁଜିଛି। ୨୦୧୯-୨୦ ତୁଳନାରେ ୨୦୨୧-୨୨ରେ ଫର୍ମାଲ ସେକ୍ଟରରେ ନିଯୁକ୍ତି ୫..୩ ପ୍ରତିଶତ କମିଥିବା କର୍ମଚାରୀ ଭବିଷ୍ୟନିଧି ସଂଗଠନ (ଇପିଏଫ୍ଓ) ତଥ୍ୟରୁ ଜଣାପଡ଼ିଛି। ସେହିପରି ଆନୁଷ୍ଠାନିକ ନିଯୁକ୍ତିଦାତାଙ୍କ ସଂଖ୍ୟା ମଧ୍ୟ ୧୦.୫ ପ୍ରତିଶତ ହ୍ରାସ ପାଇଛି। ଅଜିମ୍ ପ୍ରେମ୍ଜୀ ୟୁନିଭର୍ସିଟି ପକ୍ଷରୁ ନିକଟରେ ପ୍ରକାଶ ପାଇଥିବା ତଥ୍ୟରେ ୨୫ ବର୍ଷରୁ କମ୍ ବେରୋଜଗାରୀ ଗ୍ରାଜୁଏଟ୍ଙ୍କ ସଂଖ୍ୟା ୨୦୨୧-୨୨ରେ ୪୨ ପ୍ରତିଶତ ରହିଥିଲା।