ଢେଙ୍କାନାଳ ଅଫିସ, ୮।୧
ଭାରତ ସରକାରଙ୍କ ଡାକ ବିଭାଗ ପକ୍ଷରୁ ଢେଙ୍କାନାଳ ଜିଲାର ୩ ଗ୍ରାମକୁ ସମ୍ପୂର୍ଣ୍ଣ ସୁକନ୍ୟା ସମୃଦ୍ଧି ଟ୍ୟାଗ୍ ମିଳିଛି। ଗଁଦିଆ ବ୍ଲକ କାବେରା ମାଧପୁର ପଞ୍ଚାୟତର ଚମଦଳ, ସଦର ବ୍ଲକ ତରଭା ପଞ୍ଚାୟତର ଖଳିବନ୍ଧ ଏବଂ ଭାଲିଆବୋଲକାଟେଣୀ ପଞ୍ଚାୟତର ଭାଲିଆବୋଲକାଟେଣୀର ୧ରୁ ୧୦ ବର୍ଷ ବୟସର ସମସ୍ତ କନ୍ୟା ସନ୍ତାନ ଏହି ଯୋଜନାରେ ସାମିଲ ହୋଇଛନ୍ତି। ତେଣୁ ଏହି ୩ ଗ୍ରାମକୁ ସୁକନ୍ୟା ସମୃଦ୍ଧି ଗ୍ରାମ ଭାବେ ଘୋଷଣା କରାଯାଇଛି। ଗୁରୁବାର ଚମଦଳ ଗ୍ରାମରେ ଚିରୁଳେଇ ଶାଖା ଡାକପାଳ ରୋଜାଲିନ ହୋତାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଢେଙ୍କାନାଳ ଡାକ ଉପମଣ୍ଡଳର ନିରୀକ୍ଷକ ସମୀର ସାହୁ ମୁଖ୍ୟଅତିଥି ଭାବେ ଯୋଗଦେଇ ଏହି ଯୋଜନାର ଗୁରୁତ୍ୱ ବିଷୟରେ ଆଲୋକପାତ କରିଥିଲେ। ସମ୍ମାନିତ ଅତିଥି ଭାବେ ସରପଞ୍ଚ ଯମୁନା ଭୋଇ ଉପସ୍ଥିତ ଥିଲେ। ଖଳିବନ୍ଧ ଅଙ୍ଗନୱାଡି କେନ୍ଦ୍ରରେ ତରଭା ଶାଖା ଡାକପାଳ ତପସ୍ବିନୀ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଡାକ ନିରୀକ୍ଷକ ସାହୁ ମୁଖ୍ୟଅତିଥି ଭାବେ ଯୋଗଦେଇ ଗ୍ରାମବାସୀଙ୍କୁ ଏହି ଯୋଜନାର ଉପକାରିତା ଉପରେ ସୂଚନା ଦେଇଥିଲେ। ସେହିପରି ଅପରାହ୍ନରେ ଭାଲିଆବୋଲକାଟେଣୀ ଡାକଘର ଶାଖା ପରିସରରେ ଶାଖା ଡାକପାଳ ପ୍ରସନ୍ନ କୁମାର ସାହୁଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା। ମୁଖ୍ୟଅତିଥି ଭାବେ ଡାକ ଅଧୀକ୍ଷକ ଯମେଶ୍ୱର ଗଡନାୟକ, ସମ୍ମାନିତ ଅତିଥି ସରପଞ୍ଚ ସୁଭଦ୍ରା ବିଶ୍ୱାଳ ଏବଂ ଡାକମଣ୍ଡଳର ଅଫିସ ସୁପରଭାଇଜର ଶୁଭେନ୍ଦ୍ର କୁମାର ଦାସ ଯୋଗଦେଇ ଯୋଜନାର ଲାଭ ଉଠାଇବା ପାଇଁ ପରାମର୍ଶ ଦେଇଥିଲେ।