ନୂଆଦିଲ୍ଲୀ,୧୬।୧: ପ୍ରାୟ ୨୦୦ କୋଟି ଟଙ୍କା ଠକେଇ ମାମଲାରେ ଜେଲରେ ଥିବା ସୁକେଶ ଚନ୍ଦ୍ରଶେଖର ଆଉ ଏକ ଲେଟର ବୋମା ଫିଙ୍ଗିଛନ୍ତି। ସୁକେଶ ଚନ୍ଦ୍ରଶେଖର ସିବିଆଇ ଏବଂ ଦିଲ୍ଲୀ ଏଲଜି ବା ଉପରାଜ୍ୟପାଳଙ୍କୁ ଏକ ଅଭିଯୋଗ ପତ୍ର ପଠାଇଛନ୍ତି। ଠକ ସୁକେଶ ତାଙ୍କ ଅଭିଯୋଗରେ କହିଛନ୍ତି ଯେ ସେ ସତ୍ୟେନ୍ଦ୍ର ଜୈନ, ଅରବିନ୍ଦ କେଜରିୱାଲ ଏବଂ ପୂର୍ବତନ ଡିଜି ତିହାର ସନ୍ଦୀପ ଗୋୟଲଙ୍କୁ ଲାଞ୍ଚ ପ୍ରଦାନ କରିଛନ୍ତି। ମହାଠକ ସୁକେଶ ଚନ୍ଦ୍ରଶେଖର ସିବିଆଇକୁ ଏକ ଚିଠି ଦେଇଛନ୍ତି ଯେଉଁଥିରେ ସତ୍ୟେନ୍ଦ୍ର ଜୈନ, ଅରବିନ୍ଦ କେଜରିୱାଲ ଏବଂ ପୂର୍ବତନ ଡିଜି ତିହାର ସନ୍ଦୀପ ଗୋୟଲଙ୍କ ବିରୋଧରେ ଅଭିଯୋଗ ରହିଛି।
ଏଥିରେ ମାଷ୍ଟର ଠକ ସୁକେଶଙ୍କ ସହ ସତ୍ୟେନ୍ଦ୍ର ଜୈନଙ୍କ ବାର୍ତ୍ତାଳାପର ଚାଟ୍ର ତିନୋଟି ସ୍କ୍ରିନ ସଟ ଅନ୍ତର୍ଭୂକ୍ତ କରାଯାଇଛି । କେବଳ ଏତିକି ନୁହେଁ, ସୁକେଶ ଚନ୍ଦ୍ରଶେଖର ଦ୍ୱିତୀୟ ଅଭିଯୋଗ ପତ୍ର ଏଲଜି ବିନୟ କୁମାର ସାକ୍ସେନାଙ୍କୁ ପ୍ରଦାନ କରିଛନ୍ତି ଯେଉଁଥିରେ ସେ ତଦନ୍ତ ବିଷୟରେ କହିଛନ୍ତି। ସେ ଅଭିଯୋଗ କରିଛନ୍ତି ଯେ ସେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଏବଂ ପୂର୍ବତନ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନଙ୍କୁ ଲକ୍ଷ ଲକ୍ଷ ଟଙ୍କା ଲାଞ୍ଚ ଦେଇଛନ୍ତି।
ଏହାପୂର୍ବରୁ ସେ ଅରବିନ୍ଦ କେଜ୍ରିୱାଲଙ୍କ ବିରୋଧରେ ଦିଲ୍ଲୀର ଏଲଜିରେ ଅଭିଯୋଗ କରିଥିଲେ। ଏହା ପରେ ଦିଲ୍ଲୀ ଲେଫ୍ଟନାଣ୍ଟ ଗଭର୍ଣ୍ଣର ଭି.କେ ସାକ୍ସେନା ଅଭିଯୋଗକାରୀ ସୁକେଶ ଚନ୍ଦ୍ରଶେଖରଙ୍କ ଅଭିଯୋଗକୁ ଅଧିକ କାର୍ଯ୍ୟାନୁଷ୍ଠାନ ପାଇଁ କେନ୍ଦ୍ର ଗୃହ ମନ୍ତ୍ରଣାଳୟକୁ ପଠାଇଥିଲେ। ଅର୍ଥ ହେରଫେର ତଥା ବିଭିନ୍ନ ଲୋକଙ୍କୁ ପ୍ରତାରଣା ଅଭିଯୋଗରେ ଚନ୍ଦ୍ରଶେଖର ଗତ ବର୍ଷ ଜୁଲାଇ ୮ରେ ଲେଫ୍ଟନାଣ୍ଟ ଗଭର୍ଣ୍ଣରଙ୍କ ନିକଟରେ ଅଭିଯୋଗ କରି କହିଥିଲେ ଯେ ତାଙ୍କ ଓକିଲ ଅନନ୍ତ ମଲିକଙ୍କୁ ଧମକପୂର୍ଣ୍ଣ କଲ ଆସୁଛି।