କଟକ ଅଫିସ, ୩ା୭: କଟକ ସଦର ଉପଖଣ୍ଡ ଅଧୀନ ୨୭.୫କିମି ଦୈର୍ଘ ସୁକପାଇକା ନଦୀ ଓ ଏବଂ ସେରୁଆ ନଦୀର ବାମପାର୍ଶ୍ୱ ଅବବାହିକା ୧୩.୧୨ କିମି ଦୈର୍ଘ ମାଲିଆ ଡ୍ରେନେଜର ପୁନରୁଦ୍ଧାର ନିମନ୍ତେ ଶୁକ୍ରବାର କଟକ ଜିଲାପାଳଙ୍କ ସମ୍ମିଳନୀ କକ୍ଷରେ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଏମ୍ପି ଭର୍ତ୍ତୃହରି ମହତାବ ଅଧ୍ୟକ୍ଷତା କରିଥିଲେ। ମହାନଦୀରୁ ବାହାରିଥିବା ଶାଖା ସୁକପାଇକା ନଦୀର ମୁହାଣକୁ ବନ୍ୟା ନିୟନ୍ତ୍ରଣ ପାଇଁ ୧୯୫୧ ମସିହାରୁ ବନ୍ଦ କରିଦିଆଯାଇଛି। ଏବେ ଏହାର ପୁନରୁଦ୍ଧାର କରାଯାଇ ପାରିଲେ ଜିଲାର ଅର୍ଥନୀତି ବିକାଶରେ ବହୁଳ ମାତ୍ରାରେ ସହାୟକ ହୋଇପାରିବ। ସେହିପରି ମାଲିଆ ଡ୍ରେନେଜର ପୁନରୁଦ୍ଧାର କରାଗଲେ ଜଳ ଉତ୍ସ ସଂଗ୍ରହ, ଜଙ୍ଗଲ ସୃଷ୍ଟି, ଜନସାଧାରଣଙ୍କ ସାମାଜିକ ଓ ଅର୍ଥନୈତିକ ବିକାଶରେ ସହାୟକ ହେବ ବୋଲି ସେ କହିଥିଲେ। କଟକ ସଦର ବିଧାୟକ ଚନ୍ଦ୍ରସାରଥି ବେହେରା ଯୋଗଦେଇ ବହୁମତ ଅଭିଯାନ ମାଧ୍ୟମରେ ଜବରଦଖଲ ଉଚ୍ଛେଦ ଓ ଥଇଥାନ ବ୍ୟବସ୍ଥା ଉପରେ ଗୁରୁତ୍ତାରୋପ କରିଥିଲେ।
ଜିଲାପାଳ ଭବାନୀ ଶଙ୍କର ଚୟନୀ ଯୋଗଦେଇ ସୁକପାଇକା ନଦୀ ଓ ମାଲିଆ ଡ୍ରେନେଜର ପୁନରୁଦ୍ଧାର ନିମନ୍ତେ ୪୪ କୋଟି ଅନୁଦାନ ରାଶିର ବିସ୍ତୃତ ରିପୋର୍ଟ ଦେବାକୁ ଜଳ ସମ୍ପଦ ବିଭାଗ ନିର୍ବାହିଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ। ଏହି ବୈଠକରେ ଅତିରିକ୍ତ ଜିଲାପାଳ ପୂର୍ଣ୍ଣଚନ୍ଦ୍ର ମିଶ୍ର, ଉପଜିଲାପାଳ ପ୍ରତାପ ଚନ୍ଦ୍ର ବେଉରା, କଟକ ସଦର ଓ କିଶୋରନଗର ତହସିଲଦାରଙ୍କ ସମେତ ବିଭିନ୍ନ ବିଭାଗର ଅଧିକାରୀ ଓ ଯନ୍ତ୍ରୀ ଉପସ୍ଥିତ ଥିଲେ।