ସୁନ୍ଦରଗଡ଼,୨୯ା୭(ଡି.ଏନ୍.ଏ.): ସୁନ୍ଦରଗଡ଼ ଜିଲା କୁତ୍ରା ଥାନା ଅନ୍ତର୍ଗତ ପଞ୍ଚରା ଗ୍ରାମରେ ହୋଇଥିବା ହତ୍ୟା ଘଟଣାର ଅଭିଯୁକ୍ତଙ୍କୁ ୬ ଦିନ ପରେ ଗୁରୁବାର କୁତ୍ରା ପୋଲିସ ଗିରଫ କରିବାରେ ସଫଳ ହୋଇଛି।
ପୋଲିସ ସୂତ୍ରରୁ ପ୍ରକାଶ ଯେ, ସୁକ୍ରୁ ସୋରେନଙ୍କୁ ତାଙ୍କ ଜ୍ୱାଇଁ ତୁଲାରାମ ରୋହିଦାସ ହତ୍ୟା କରିଥିଲେ। ସୁକ୍ରୁଙ୍କ ଝିଅ ଓ ଜ୍ୱାଇଁଙ୍କ ମଧ୍ୟରେ ସବୁବେଳେ କଳହ ଲାଗିରହିଥିଲା। ତେଣୁ ତାଙ୍କ ଝିଅ ବାପ ଘରକୁ ଚାଲିଆସିଥିଲେ। ଜ୍ୱାଇଁଙ୍କୁ ତାଙ୍କ ଝିଅ ବିଷୟରେ କୌଣସି ସୂଚନା ଦେଉ ନ ଥିଲେ ବୋଲି ରାଗ ରଖି ପ୍ରତିଷୋଧ ପରାୟଣ ହୋଇ ତୁଲାରାମ ହତ୍ୟା କରିଥିବା ସ୍ବୀକାର କରିଛନ୍ତି। ଏନେଇ ସୂଚନା ଦେଇଛନ୍ତି କୁତ୍ରା ଥାନାଧିକାରୀ ସୁଶାନ୍ତ କୁମାର ପରଡ଼ା। ଆଜି କୁତ୍ରା ପୋଲିସ ତୁଲାରାମଙ୍କୁ ଗିରଫ କରି କେସ୍ ନମ୍ବର ୮୧/୨୧ ଅନୁଯାୟୀ ଏକ ହତ୍ୟା ମାମଲା ରୁଜୁ କରି କୋର୍ଟ ଚାଲାଣ କରିଛି। ତେବେ ଏହି ଘଟଣାରେ ଆଉ କିଏ ସମ୍ପୃକ୍ତ ଅଛି କି ନାହିଁ ତା’ର ତଦନ୍ତ ଜାରି ରଖିଛି ପୋଲିସ।
ସୂଚନାଯୋଗ୍ୟ, ଗତ ୨୩ ତାରିଖ ରାତିରେ ସୁକ୍ରୁ ସୋରେନ ଖାଇ ସାରି ଘର ବାରଣ୍ଡାରେ ଶୋଇଥିବା ବେଳେ ବିଳମ୍ବିତ ରାତିରେ ତାଙ୍କୁ ଟାଙ୍ଗିଆରେ ଦେହର ବିଭିନ୍ନ ସ୍ଥାନରେ ହାଣି ହତ୍ୟା କରାଯାଇଥିଲା।
