ଭୁବନେଶ୍ୱର, ୧୦।୧୦(ବ୍ୟୁରୋ): ଷ୍ଟାର୍ପ୍ଲସ୍ରେ ଆସନ୍ତା ସୋମବାରରୁ ପ୍ରସାରିତ ହେବାକୁ ଥିବା ହିନ୍ଦୀ ସିରିଏଲ ‘ବିଦ୍ରୋହୀ’ରେ ପ୍ରମୁଖ ଭୂମିକାରେ ନଜରକୁ ଆସୁଛନ୍ତି ଓଡ଼ିଆ ଅଭିନେତ୍ରୀ ସୁଲଗ୍ନା ପାଣିଗ୍ରାହୀ। ଦେଶର ପ୍ରଥମ ସ୍ବାଧୀନତା ସଂଗ୍ରାମ ପାଇକ ବିଦ୍ରୋହ ଓ ସଂଗ୍ରାମୀ ବକ୍ସି ଜଗବନ୍ଧୁଙ୍କୁ ନେଇ ଏହି ଧାରାବାହିକ ପ୍ରସ୍ତୁତ ହୋଇଛି। ଏଥିରେ ବକ୍ସି ଜଗବନ୍ଧୁ ଚରିତ୍ରରେ ଅଭିନେତା ଶରଦ ମାଲହୋତ୍ରା ରହିଥିବାବେଳେ ବକ୍ସିଙ୍କ ସ୍ତ୍ରୀ ଚରିତ୍ରରେ ରହିଛନ୍ତି ସୁଲଗ୍ନା। ବ୍ରହ୍ମପୁରର ଝିଅ ସୁଲଗ୍ନା ଏହା ପୂର୍ବରୁ ଅନେକ ହିନ୍ଦୀ ସିରିଏଲ ଓ ଫିଲ୍ମରେ ମଧ୍ୟ ଅଭିନୟ କରିଛନ୍ତି। ଗତବର୍ଷ ଡିସେମ୍ବରରେ ସେ ଷ୍ଟାଣ୍ଡ୍ଅପ୍ କମେଡିଆନ ବିଶ୍ୱକଲ୍ୟାଣ ରଥଙ୍କୁ ବିବାହ କରିଥିଲେ। ବିଶ୍ୱକଲ୍ୟାଣ ମଧ୍ୟ ଓଡ଼ିଆ। ସେ ବି ଜାତୀୟ ସ୍ତରରେ ଲୋକପ୍ରିୟ କଳାକାର ଭାବେ ପରିଚିତ। ସେହିପରି ଏହି ସିରିଏଲରେ ଆସିଷ୍ଟାଣ୍ଟ ଡାଇରେକ୍ଟର ଭାବେ କାମ କରୁଛନ୍ତି ଜଣେ ଓଡ଼ିଆ। ସେ ହେଉଛନ୍ତି ରାକେଶ ବେହେରା। ରାକେଶ ମଧ୍ୟ ପୂର୍ବରୁ ଅନେକ ଚଳଚ୍ଚିତ୍ର ଓ ସିରିଏଲରେ ନିଜର ପାରଦର୍ଶିତା ଦେଖାଇ ସାରିଛନ୍ତି।
