ଭଦ୍ରକ,୧୬ା୧୧(ସନାତନ ରାଉତ): ରଙ୍ଗ ବଦଳାଇଲେ ଲୋକଙ୍କ ଭଲପାଇବା ନେଇପାରିବେନି କି ସେମାନଙ୍କ ହୃଦୟ ପରିବର୍ତ୍ତନ କରିପାରିବେ ନାହିଁ। ଭଦ୍ରକ ଜିଲା ଧାମରାରେ ବିଜେଡି ପକ୍ଷରୁ ଆୟୋଜିତ ପାରମ୍ପରିକ ବୋଇତ ବନ୍ଦାଣ ସଭାରେ ରାଜ୍ୟ ସଭା ସଦସ୍ୟା ସୁଲତା ଦେଓ ଭାଜପା ରାଜ୍ୟ ସଭାପତିଙ୍କ ନଁା ନ ନେଇ ଏଭଳି କହିଛନ୍ତି। ଏହି ଅବସରରେ ସେ ଆହୁରି କହିଛନ୍ତି, ଚାନ୍ଦବାଲି ବିଧାନସଭା ନିର୍ବାଚନମଣ୍ଡଳୀରେ ଯିଏ ଲଢ଼ୁଥିଲେ, ବହୁ ଟଙ୍କା ଓ ପାୱାର ବ୍ୟବହାର କରିଥିଲେ ମଧ୍ୟ ଲୋକଙ୍କ ଭଲପାଇବା ବାପି ଭାଇଙ୍କ ସାଙ୍ଗରେ ଅଛି। ଚାନ୍ଦବାଲିବାସୀ ଏଥିରେ ପ୍ରଲୋଭିତ ନ ହୋଇ ବାପି ଭାଇଙ୍କୁ ଜିତାଇଛନ୍ତି ବୋଲି ସୁଲତା କହିଥିଲେ। ଏଥିସହ ସେ କହିଛନ୍ତି ବିଜେଡି ପକ୍ଷରୁ ବୋଇତ ବନ୍ଦାଣ ବେଳେ ସେମାନେ ହୋହଲ୍ଲା କରିବା ସହ ଜୟ ଶ୍ରୀରାମ ନାରାବାଜି କରିଥିଲେ। ହେଲେ ଯେତେ ଜୟ ଶ୍ରୀରାମ କଲେ ବି ଏଠି ବାପି ଭାଇଙ୍କ ଜୟ ହୋଇଛି। ସେମାନଙ୍କ ପାଖରେ ଲୋକ ନାହାନ୍ତି। ବାପି ଭାଇ ଓ ନବୀନ ପଟ୍ଟନାୟକଙ୍କୁ ଭଲ ପାଉଥିବାରୁ ବିଜେଡି ସଭାରେ ବହୁ ଲୋକ ଯୋଗ ଦେଇଛନ୍ତି। ଏଥିସହ ସେ କହିଛନ୍ତି, ବାତ୍ୟା ‘ଦାନା’ ସମୟରେ ଆଶ୍ରୟସ୍ଥଳରେ ଶୁଖିଲା ଚୁଡ଼ା ଖାଇବାକୁ ଦେଇ ରାଜ୍ୟ ସରକାର କୋଟି କୋଟି ଟଙ୍କା ଲୁଟ୍ କରିଛନ୍ତି। କ୍ଷୟକ୍ଷତିର ଠିକ୍ ଭାବେ ସର୍ଭେ କରାଗଲା ନାହିଁ। କ୍ଷତିଗ୍ରସ୍ତ ଚାଷୀମାନେ ଏହାର ଜବାବ ଦେବେ ବୋଲି ସୁଲତା ସୂଚୀତ କରିଥିଲେ। ତାଙ୍କର ଏହି ଭାଷଣ ସୋସିଆଲ ମିଡିଆରେ ଭାଇରାଲ ହୋଇଛି। ଧାମରାଇ ପୀଠରେ ଆୟୋଜିତ ୨୫ତମ ବୋଇତ ବନ୍ଦାଣ ଉତ୍ସବରେ ରାଜ୍ୟ ସଭା ସଦସ୍ୟା ଦେଓଙ୍କ ସହ ଚାନ୍ଦବାଲି ବିଧାୟକ ବ୍ୟୋମକେଶ ରାୟ, ଭଣ୍ଡାରିପୋଖରୀ ବିଧାୟକ ସଞ୍ଜୀବ ମଲ୍ଲିକ, ବିଜେଡି ନେତ୍ରୀ ବର୍ଷା ପ୍ରିୟଦର୍ଶିନୀ ଓ ଦଳର ବହୁ ନେତା ଯୋଗ ଦେଇଥିଲେ।