ଚଣ୍ଡିଗଡ଼,୨୯ ।୧: ପଞ୍ଜାବର କଂଗ୍ରେସ ନେତା ତଥା ପୂର୍ବତନ କ୍ରିକେଟର ନବଜୋତ ସିଂ ସିଦ୍ଧୁଙ୍କ ଏନ୍ଆର୍ଆଇ ଭଉଣୀ ସୁମନ ତୁର ସିଦ୍ଧୁଙ୍କ ପରିବାର ସଦସ୍ୟଙ୍କର ଏକ ଫଟୋ ଜାରି କରିଛନ୍ତି । ସୂଚନାଯୋଗ୍ୟ, ଚଣ୍ଡିଗଡ଼ରେ ଏକ ଖବରଦାତା ସମ୍ମିଳନୀରେ ସୁମନ ତୁର କହିଥିଲେ ସିଦ୍ଧୁଙ୍କ ବ୍ୟବହାର ଅମାନବୀୟ । ଏହାସହ ତୁର କହିଥିଲେ ସିଦ୍ଧୁ ମିଛ କହିଛନ୍ତି ଯେ ତାଙ୍କ ମାତାପିତା ଆଇନ ଅନୁଯାୟୀ ଅଲଗା ହୋଇଛନ୍ତି । ସିଦ୍ଧୁ ଖୁବ୍ ନିର୍ଦ୍ଦୟ ବୋଲି ତାଙ୍କ ଭଉଣୀ କହିଛନ୍ତି । ଏହାପରେ ନବଜୋତ ସିଂ ସିଦ୍ଧୁ ଓ ତାଙ୍କ ପତ୍ନୀ ନବଜୋତ କୌର ସୁମନ ତୁରଙ୍କୁ ଚିହ୍ନନ୍ତି ନାହିଁ ବୋଲି କହିଥିଲେ । ଏବେ ସୁମନ ତାଙ୍କ ପରିବାରର ଏକ ଫଟୋ ଜାରି କରିଛନ୍ତି ଯେଉଁଥିରେ ସେ ତାଙ୍କ ଭାଇ ସିଦ୍ଧୁଙ୍କସହ ନଜର ଆସିଛନ୍ତି ।
ସୂଚନାଯୋଗ୍ୟ, ଶନିବାର ପଞ୍ଜାବ ବିଧାନସଭା ନିର୍ବାଚନ ଲାଗି ସିଦ୍ଧୁ ପ୍ରାର୍ଥିପତ୍ର ଦାଖଲ କରିବାକୁ ଥିବା ବେଳେ ଏହା ପୂର୍ବରୁ ଅର୍ଥାତ୍ ଶୁକ୍ରବାର ଏହି ଫ୍ୟାମିଲି ଡ୍ରାମା ଆରମ୍ଭ ହୋଇଯାଇଛି । ସୁମନ ଅଭିଯୋଗ କରିଛନ୍ତି କି ୧୯୮୬ରେ ସିଦ୍ଧୁଙ୍କ ପିତା ଭଗବନ୍ତ ସିଦ୍ଧୁଙ୍କ ମୃତ୍ୟୁ ପରେ ନବଜୋତ ସିଂ ସିଦ୍ଧୁ ତାଙ୍କ ମାଆ ଓ ବଡ ଭଉଣୀଙ୍କୁ ଘରୁ ବାହାର କରି ଦେଇଥିଲେ । ହେଲେ ପୁଅର ଇମେଜ ରକ୍ଷା କରିବାକୁ ଯାଇ ସିଦ୍ଧୁଙ୍କ ମାଆ ଦିଲ୍ଲୀ ଚାଲିଯାଇଥିଲେ । ସେଠାରେ ଏଣେତେଣେ ବୁଲିବା ସହ ଶେଷରେ ଦିଲ୍ଲୀ ରେଲୱେ ଷ୍ଟେଶନରେ ଅନାଥ ଭଳି ପଡି ତାଙ୍କର ମୃତ୍ୟୁ ହୋଇଥିଲା । ସିଦ୍ଧୁ ଏସବୁ କାମ କେବଳ ସମ୍ପତି ପାଇଁ କରିଥିବା ସୁମନ କହିଛନ୍ତି ।
