ରାଜକନିକା, ୩୧ା୧(ଡି.ଏନ.ଏ.): ଉଦ୍ୟମ ଥିଲେ ସଫଳତା ମିଳେ ଏହାକୁ ପ୍ରମାଣ କରି ଦେଖାଇଛନ୍ତି କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ନମତରା ପଞ୍ଚାୟତର ସୁମନ୍ତ ଦାସ। ଏବେ ସେ ଜଣେ ସଫଳ ଉଦ୍ୟୋଗପତି। ତାଙ୍କ ଚେଷ୍ଟାରେ ବହୁ ପରିବାର ବିଭିନ୍ନ କ୍ଷେତ୍ରରେ କର୍ମ ସଂସ୍ଥାନ ପାଇଛନ୍ତି।
ଦିନ ଥିଲା ସୁମନ୍ତଙ୍କ ପରିବାରର ଆର୍ଥିକ ସ୍ଥିତି ଏତେ ଦୁର୍ବଳ ଥିଲା ଯେ ବହୁ କଷ୍ଟରେ ମାଟ୍ରିକ ପାସ୍ କରିଥିଲେ। ପରେ ସେ ରାଜକନିକା ଶୈଳେନ୍ଦ୍ର ନାରାୟଣ ମହାବିଦ୍ୟାଳୟରେ ଯୁକ୍ତ ୨ ଶ୍ରେଣୀରେ ନାମ ଲେଖାଇଥିଲେ। ପରେ ଉଚ୍ଚତର ଶିକ୍ଷା ପାଇଁ ସେ କୋଲକାତାରେ ବାଣିଜ୍ୟ ବିଭାଗରେ ଯୁକ୍ତ ୩ ଶ୍ରେଣୀରେ ଅଧ୍ୟୟନ କରିଥିଲେ। ହେଲେ ଆର୍ଥତ୍କ ଅବସ୍ଥା ସ୍ବଚ୍ଛଳ ନ ଥିବାରୁ ପାଠପଢାରେ ଡୋରି ବନ୍ଧା ହେଲା। ପୁଅ ଚାକିରି କରି ଦି ପଇସା ରୋଜଗାର କରୁ ବୋଲି ତାଙ୍କ ବାପା ଆଶାବାନ୍ଧି ଥିଲେ। ହେଲେ ପରିବାରର ଆର୍ଥିକ ଅନଟନ ଏଥିରେ ପ୍ରତିବନ୍ଧକ ସାଜିଥିଲା। ଶେଷରେ କିଛି ଟଙ୍କା କରଜ ନେଇ ସେ ମୁମ୍ବାଇ ଚାଲି ଯାଇଥିଲେ। ନିଜର ଗୁଜୁରାଣ ମେଣ୍ଟାଇବାକୁ ଗୋଟିଏ ହୋଟେଲରେ ଚାକିରି କଲେ। ସେଠାରେ ତାଙ୍କ ମନ ମାନିଲା ନାହିଁ। କିଛି ଟଙ୍କା ସଞ୍ଚୟ କରି ସେ ଅଧିକ ରୋଜଗାର ଆଶାରେ ଆଫ୍ରିକା ଚାଲି ଯାଇଥିଲେ। ନିଜକୁ ଆତ୍ମ ନିର୍ଭରଶୀଳ କିପରି କରାଯାଇ ପାରିବ ସେଠାକାର ଲୋକଙ୍କଠାରୁ ଶିକ୍ଷାଲାଭ କରିଥିଲେ। ଭଲ ରୋଜଗାର କରିବା ପରେ ସେ ଆଫ୍ରିକାରେ ଏକ ହୋଟେଲ ନିର୍ମାଣ କରି ପାରିଥିଲେ। ଏବେ ସେ ନିଜ ଜନ୍ମମାଟିକୁ ଫେରି ଆସିଛନ୍ତି। ସେ କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ହାଟସାହି ଚାଷୀମାନଙ୍କଠାରୁ ପ୍ରାୟ ୯୦ ଏକର ଚାଷଜମି ଲିଜ୍ ନେଇ ୫୦ରୁ ଅଧିକ ଗରିବ ପରିବାରକୁ ଚଳାଉଛନ୍ତି। ସଫଳ ଉଦ୍ୟୋଗୀ ଭାବେ ସେ ରାଜକନିକା, ଆଳି ଓ ବିଞ୍ଝାରପୁର ଅଞ୍ଚଳରେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। କୃଷି କ୍ଷେତ୍ରରେ ଆତ୍ମ ନିର୍ଭରଶୀଳ ହେବାକୁ ସେ ଉଦ୍ୟମ ଆରମ୍ଭ କରିଛନ୍ତି। ନିଜ ପୁଅକୁ ସେ ଗୋରୁ ଫାର୍ମ ହାଉସ୍ରେ ନିଯୁକ୍ତି ଦେଇଛନ୍ତି। ସେ ଭାରତୀୟ ଗୋବଂଶର ସୁରକ୍ଷା ପାଇଁ ହରିଆନାରୁ ଷଣ୍ଢ ଆଣି ବ୍ରିଡିଂ ମାଧ୍ୟମରେ ଭଲ ବାଛୁରୀ କିପରି ଜନ୍ମନେବ ସେ ଦିଗରେ ଉଦ୍ୟମ ଆରମ୍ଭ କରିଛନ୍ତି। ସେ ଗୋରୁ ମୂତ୍ର ସହିତ ବିଭିନ୍ନ ସାମଗ୍ରୀ ମିଶାଇ ସାର ପ୍ରସ୍ତୁତ କରି ଜମିରେ ପକାଇ ବିଭିନ୍ନ ପନିପରିବା ଉତ୍ପାଦନ କରୁଛନ୍ତି। ଗାଈ ଚାଷ କରି କ୍ଷୀରକୁ ବାହାରକୁ ପଠାଉଛନ୍ତି। ସେହିପରି ପୋଖରୀ ଖୋଳି ମାଛ ଯାଆଁଳ ଉପତ୍ାଦନ କରୁଛନ୍ତି। ପ୍ରାକୃତିକ ପରିବେଶର ସୁରକ୍ଷା ପାଇଁ ୧ ହଜାର ୟୁକାଲିପଟାସ, ଶାଳ, ପିଆଶାଳ ଗଛ ଲଗାଇ ସବୁଜ ବନାନୀ ସୃଷ୍ଟି କରିଛନ୍ତି। ପଶ୍ଚିମକନିକା ଅଞ୍ଚଳରେ ସେ ୧୨ଟି ପୋଖରୀ ଖୋଳି ମାଛ ଚାଷ କରୁଛନ୍ତି। ଫାର୍ମ ହାଉସକୁ ରାଜ୍ୟର ବିଭିନ୍ନ ଅଞ୍ଚଳରୁ ଚାଷୀମାନେ ଆସି ମାଗଣାରେ ପ୍ରଶିକ୍ଷଣ ଦେଉଥିବା ସୁମନ୍ତ କହିଛନ୍ତି।