ଆସିକା,୧୫।୧୨(ଡି.ଏନ.ଏ.): ଡାକ୍ତର ସୁମିତ ସାହୁ ଓ ସ୍ତ୍ରୀ ତପସ୍ବିନୀ ଦାଶଙ୍କ ମଧ୍ୟରେ ଲାଗି ରହିଥିବା ପାରିବାରିକ ବିବାଦର କୌଣସି ସମାଧାନ ହୋଇପାରିନାହିଁ। ବ୍ରହ୍ମପୁର ଏସ୍ଡିଜେଏମ୍ କୋର୍ଟଙ୍କ ନିର୍ଦ୍ଦେଶକ୍ରମେ ଗତ ୩ ତାରିଖରୁ ଉଭୟେ ଆସିକା ଚିନିଶିଳ୍ପ ଅତିଥି ଭବନରେ ରହୁଥିଲେ। ୧୦ତାରିଖ ପୂର୍ବାହ୍ନରୁ ଡା. ସୁମିତ ନିଜ କାର୍ଯ୍ୟସ୍ଥଳ ବାଲିସିରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଯାଇ ଆଉ ଫେରିନାହାନ୍ତି।ଶାରୀରିକ ଅସୁସ୍ଥତା ଦର୍ଶାଇ ସେ ୪ ଦିନ ଛୁଟି ନେଇଥିଲେ ମଧ୍ୟ ତପସ୍ବିନୀଙ୍କ ସହ କୌଣସି ଯୋଗାଯୋଗ ରଖିନାହାନ୍ତି। ସୁମିତ ବୁଧବାର କାର୍ଯ୍ୟରେ ଯୋଗଦେବାର ଥିଲା। ଏହା ପୂର୍ବରୁ ସୋମବାର ରାତିରେ ସେ ସ୍ବାସ୍ଥ୍ୟାବସ୍ଥାରେ କୌଣସି ଉନ୍ନତି ହୋଇ ନ ଥିବାରୁ ଅଧିକ ଚିକିତ୍ସା ଲାଗି ବ୍ରହ୍ମପୁର ଯାଉଥିବା ଇ-ମେଲ ଯୋଗେ ବାଲିସିରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କ ନିକଟକୁ ଜଣାଇଛନ୍ତି। ତେବେ ସେଥିରେ ଛୁଟି ସମ୍ପର୍କରେ କିଛି ଉଲ୍ଲେଖ କରିନାହାନ୍ତି। ଅନ୍ୟପକ୍ଷରେ ତପସ୍ବିନୀ ଗତ ସୋମବାର ବ୍ରହ୍ମପୁରସ୍ଥିତ ପରିବାର ଅଦାଲତରେ ହାଜର ହେବା ସହ ଏସ୍ଡିଜେଏମଙ୍କ କୋର୍ଟରେ ପିଟିଶନ ଦାଖଲ କରି ପୁଣି ଅତିଥି ଭବନକୁ ଫେରିଛନ୍ତି। ସେଠାରେ ସେ ତାଙ୍କ ଭାଇଙ୍କ ସହ ରହୁଛନ୍ତି। ପୂର୍ବଭଳି ଆଉ ପୋଲିସ ପହରା ଦିଆଯାଉନାହିଁ। ସୁମିତ ଯିବା ପରଠାରୁ ଅତିଥି ଭବନର ଭଡା ଓ ଖାଇବା ଖର୍ଚ୍ଚ ତପସ୍ବିନୀ ନିଜେ ବହନ କରୁଥିବା ପ୍ରକାଶ କରିଛନ୍ତି। ଆସନ୍ତା ୧୭ ତାରିଖରେ ପୁଣି ଅଦାଲତରେ ହାଜର ହେବା ଲାଗି ଧାର୍ଯ୍ୟ ହୋଇଥିବାରୁ ସେ ପର୍ଯ୍ୟନ୍ତ ଅତିଥି ଭବନରେ ରହିବେ। ଅଦାଲତଙ୍କ ନିର୍ଦ୍ଦେଶ ପ୍ରକାରେ ଭବିଷ୍ୟତ କାର୍ଯ୍ୟପନ୍ଥା ଗ୍ରହଣ କରିବେ ବୋଲି ତପସ୍ବିନୀ ପ୍ରକାଶ କରିଛନ୍ତି।
