ଆସିକା,୧୭ା୧୨(ଡି.ଏନ୍.ଏ.):ବ୍ରହ୍ମପୁର ବ୍ରହ୍ମାନଗରର ଡାକ୍ତର ସୁମିତ ସାହୁ ଓ ସ୍ତ୍ରୀ ତପସ୍ବିନୀ ଦାଶଙ୍କ ମଧ୍ୟରେ ଚାଲିଥିବା ବିବାଦ ତୁଟିବା ନାଁ ଧରୁନି । ଏହି ପାରିବାରିକ ବିବାଦ ଅଦାଲତରେ ବିଚାରାଧୀନ ରହିଛି। ଆସିକା ଚିନିଶିଳ୍ପ ଅତିଥି ଭବନରୁ ଗତ ୧୦ ତାରିଖରୁ ତପସ୍ବିିନୀଙ୍କୁ ଛାଡ଼ି ପଳାଇ ଯାଇଥିବା ସୁମିତ ଗୁରୁବାର ମୁହଁ ଖୋଲିଛନ୍ତି। ସୁମିତ ଏକ ଅଡିଓ ଟେପ୍ ଜାରି କରି ସେ ଶାରୀରିକ ଓ ମାନସିକ ଭାବେ ଅସୁସ୍ଥ ଥିବା ଜଣାଇଛନ୍ତି। ସେଥିଯୋଗୁ ତପସ୍ବିନୀଙ୍କ ସହ ରହି ବିଶ୍ରାମ ନେବା ଅସମ୍ଭବ ମନେକରି ଡାକ୍ତରଙ୍କ ପରାମର୍ଶକ୍ରମେ ଅଲଗା ରହିଥିବା ସେ କହିଛନ୍ତି। ଫେରାର୍ ହେବା, ଅପହରଣ କରାଯାଇଥିବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା। ତପସ୍ବିନୀ ବଦନାମ କରିବା ଲାଗି ଗଣମାଧ୍ୟମ ଆଗରେ ଉଦ୍ୟମ ଚଳାଇଛନ୍ତି ା ମୋତେ ଓ ମୋ ପରିବାର ବିରୋଧରେ ଏହା ଏକ ଷଡ଼ଯନ୍ତ୍ର ବୋଲି ସୁମିତ ଅଭିଯୋଗ କରିଛନ୍ତି। ତପସ୍ବିନୀ ଫୌଜଦାରୀ ମାମଲା ରୁଜୁ କରିବା ପରେ ବି କାହିଁକି ତାଙ୍କ ସହିତ ରହିବାକୁ ଚାହୁଁଛନ୍ତି ବୋଲି ସୁମିତ ପ୍ରଶ୍ନ କରିଛନ୍ତି ା ୭ଦିନ ଧରି ଚିନିଶିଳ୍ପ ଅତିଥି ଭବନରେ ତପସ୍ବିନୀଙ୍କ ସହ ରହିଥିଲେ ମଧ୍ୟ ସମ୍ପର୍କ ଆଗକୁ ବଢ଼ି ନ ଥିବା ସେ ସ୍ପଷ୍ଟ କରିଛନ୍ତି। କିନ୍ତୁ ସୁମିତଙ୍କ ଦରମା ବନ୍ଦ ନେଇ ଚର୍ଚ୍ଚା ହେଉଥିବା ବେଳେ ଏ ନେଇ ଉପରିସ୍ଥ ଅଧିକାରୀଙ୍କଠାରୁ କୌଣସି ସୂଚନା ମିଳିନାହିଁ।
ଅନ୍ୟପକ୍ଷରେ ଅଡିଓ ଟେପ୍ ସମ୍ପର୍କରେ ଜାଣିବା ପରେ ତପସ୍ବିନୀ ତାଙ୍କ ପ୍ରତିକ୍ରିୟା ରଖିଛନ୍ତି। ମୋ ପରିବାରର ସେଭଳି ସମ୍ପତ୍ତି କି କ୍ଷମତା ନାହିଁ। ତେଣୁ ସୁମିତ ସମ୍ପର୍କର ଦ୍ୱାହି ଦେଇ ଖେଳୁଛନ୍ତି। ସୁମିତ ପ୍ରଥମେ ସମ୍ପର୍କ ସ୍ଥାପନ କରି ପରେ ରେଜିଷ୍ଟ୍ରି ବିବାହ କଲେ। ନିଜ ଘରେ ରଖିବା ପରେ ଗର୍ଭନଷ୍ଟ ମଧ୍ୟ କରିଥିଲେ ା ଶେଷରେ ଘରୁ ତଡ଼ିଦେଇ କ’ଣ ଠିକ କଲେ ବୋଲି ସେ ପ୍ରଶ୍ନ କରିଛନ୍ତି। ଶୁକ୍ରବାର ଅଦାଲତରେ ତାରିଖ ଥିବା ବେଳେ ଦିନକ ପୂର୍ବରୁ ଏଭଳି ଅଡିଓ ଜାରି କରିବାର ଉଦ୍ଦେଶ୍ୟ କ’ଣ ବୋଲି ସେ ପଚାରିଛନ୍ତି। ହାର୍ ମାନିବିନି, ନ୍ୟାୟ ପାଇଁ ଲଢ଼େଇ ଜାରି ରଖିବି ବୋଲି ତପସ୍ବିନୀ କହିଛନ୍ତି।
