ବ୍ରହ୍ମପୁର ଅଫିସ,୧୧ା୩: ଡା.ସୁମିତ ସାହୁ-ତପସ୍ବିନୀ ଦାଶ ବିବାଦ ମାମଲା ଏବେ କୋର୍ଟରେ ବିଚାରାଧୀନ ରହିଛି। ତେବେ ତପସ୍ବିନୀଙ୍କ ଭରଣପୋଷଣ ପାଇଁ ମାସିକ ୧୭ହଜାର ଟଙ୍କା ଦେବାକୁ ଜିଲା ଜଜ୍ କୋର୍ଟ ନିର୍ଦ୍ଦେଶ ଦେଇଥିଲେ। ଏହାକୁ ଚ୍ୟାଲେଞ୍ଜ କରି ଡା. ସୁମିତଙ୍କ ଓକିଲ ସୁରେନ୍ଦ୍ର ବେହେରା ଉଚ୍ଚ ନ୍ୟାୟାଳୟରେ ଏକ ପିଟିଶନ ଦାଖଲ କରିଥିଲେ। ଉଚ୍ଚ ନ୍ୟାୟାଳୟ ତପସ୍ବିନୀଙ୍କ ଭରଣପୋଷଣ ପାଇଁ ମାସିକ ୧୦ ହଜାର ଟଙ୍କା ଦେବାକୁ ସୁମିତଙ୍କୁ ନିର୍ଦ୍ଦେଶ ଦେଇଥିଲେ। ସୁମିତ ମାର୍ଚ୍ଚ ୧୦ରେ ଏସ୍ଡିଜେଏମ୍ଙ୍କ କୋର୍ଟରେ ଡିମାଣ୍ଡ ଡ୍ରାଫ୍ଟ(ଡିଡି) ଆକାରରେ ୧୦ ହଜାର ଟଙ୍କା ଜମା କରିଥିଲେ।
ପ୍ରକାଶ ଯେ, ପୂର୍ବରୁ ଜିଲା ଜଜ୍ କୋର୍ଟ ଏହି ମାମଲାର ଶୁଣାଣି କରି ତପସ୍ବିନୀଙ୍କ ଭରଣପୋଷଣ ପାଇଁ ଡା. ସୁମିତ ମାସର ୧୦ ତାରିଖ ସୁଦ୍ଧା ୧୭ ହଜାର ଟଙ୍କା ଦେବାକୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ କ୍ରମେ ସୁମିତଙ୍କ ତରଫରୁ ତାଙ୍କ ଓକିଲ ଏସ୍ଡିଜେଏମ୍ଙ୍କ କୋର୍ଟରେ ଫେବୃୟାରୀ ୧୦ରେ ୧୭ ହଜାର ଟଙ୍କାର ଡିଡି ଦାଖଲ କରିଥିଲେ। କୌଣସି କାରଣରୁ ତପସ୍ବିନୀ ଉକ୍ତ ଦିନ କୋର୍ଟରେ ହାଜର ହୋଇପାରି ନ ଥିଲେ। ଫେବୃୟାରୀ ୨୧ରେ ତପସ୍ବିନୀ କୋର୍ଟରେ ହାଜର ହୋଇ ଉକ୍ତ ଟଙ୍କାର ଡିଡି ଗ୍ରହଣ କରିଥିଲେ। ଅନ୍ୟପଟେ ତପସ୍ବିିନୀଙ୍କ ତରଫରୁ ଏସ୍ଡିଜେଏମ୍ଙ୍କ କୋର୍ଟରେ ଗତ ନଭେମ୍ବରରେ ରୁଜୁ କରିଥିବା ମୂଳ ପିଟିଶନ ଏମ୍ସି ୩୪୪/୨୧ ର ସାକ୍ଷୀ ବିଚାର ପାଇଁ ମାର୍ଚ୍ଚ ୧୫ ଧାର୍ଯ୍ୟ ହୋଇଥିବା ଓକିଲ ବେହେରା କହିଛନ୍ତି। ମାମଲାକୁ ନେଇ ରୁଜୁ ହୋଇଥିବା ଛାଡ଼ପତ୍ର ଆବେଦନର କାଉନ୍ସେଲିଂ ପାଇଁ ଏପ୍ରିଲ ୪ ଧାର୍ଯ୍ୟ ହୋଇଛି ବୋଲି ମଧ୍ୟ ସେ ସୂଚନା ଦେଇଛନ୍ତି। ପୂର୍ବରୁ ଫେବୃୟାରୀ ୧୦ ଓ ମାର୍ଚ୍ଚ ୭ ଦୁଇଟି ତାରିଖରେ ସୁମିତ ପରିବାର କୋର୍ଟରେ ହାଜର ହୋଇଥିଲେ। କିନ୍ତୁ ତପସ୍ବିନୀ ହାଜର ନ ହେବାରୁ କାଉନ୍ସେଲିଂ ହୋଇପାରି ନ ଥିଲା। କୋର୍ଟଙ୍କ ନିର୍ଦ୍ଦେଶ କ୍ରମେ ତପସ୍ବିନୀ ବର୍ତ୍ତମାନ ବ୍ରହ୍ମାନଗର ଦ୍ୱିତୀୟ ଲାଇନ୍ ସ୍ଥିତ ସୁମିତଙ୍କ ଘରେ ରହୁଛନ୍ତି। ସେପଟେ ତପସ୍ବିନୀ ଘରକୁ ପ୍ରବେଶ କରିବା ପରେ ତାଙ୍କ ଶ୍ୱଶୁର ପ୍ରମୋଦ ସାହୁ ଜାନୁୟାରୀ ୬ ରାତିରୁ ଘର ଛାଡ଼ି କେଉଁଆଡେ ଚାଲି ଯାଇଛନ୍ତି। ଅନ୍ୟପଟେ ଡା. ସୁମିତ ମାନସିକ ଦୁଶ୍ଚିନ୍ତା ଓ ଶାରୀରିକ ଅସୁସ୍ଥତା କାରଣରୁ ଏବେ ବି ଛୁଟିରେ ରହିଛନ୍ତି। ସୁମିତ ଓ ତାଙ୍କ ବାପା ପ୍ରମୋଦ ବ୍ରହ୍ମାନଗର ଘରେ ରହୁ ନ ଥିବା ବେଳେ ତାଙ୍କ ଜେଜେମା ବିବାସିନୀ ସାହୁ ଓ ତାଙ୍କ ମା’ ସ୍ମିତାରଣୀ ସାହୁ ହିଁ କେବଳ ଉକ୍ତ ଘରର ତଳ ମହଲାରେ ରହୁଛନ୍ତି।