ସୋଫିଆ (ବୁଲଗେରିଆ), ୮ା୫ (ପି.ଟି.)-ଏଠାରେ ଚାଲିଥିବା ବିଶ୍ୱ ଅଲିମ୍ପିକ୍ସ କ୍ୱାଲିଫାୟର୍ସ ୧୨୫ କେଜି ଶ୍ରେଣୀର ଫାଇନାଲରେ ପ୍ରବେଶ କରିବା ଦ୍ୱାରା ସୁମିତ୍ ମଲିକ ଭାରତର ଚତୁର୍ଥ ଫ୍ରିଷ୍ଟାଇଲ ପୁରୁଷ ରେସ୍ଲର ଭାବେ ଟୋକିଓ ଗେମ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି। ଟୋକିଓ ଗେମ୍ସ ପାଇଁ ଯୋଗ୍ୟତା ଅର୍ଜନ କରିସାରିଥିବା ଅନ୍ୟ ୩ ରେସ୍ଲର ହେଲେ ରବି ଡାହିୟା (୫୭କେଜି), ବଜରଙ୍ଗ ପୁନିଆ(୬୫କେଜି) ଓ ଦୀପ ପୁନିଆ(୬୮କେଜି)। ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜେତା ୨୮ ବର୍ଷୀୟ ସୁମିତ୍ ପ୍ରଥମ ଥର ଅଲିମ୍ପିକ ପାଇଁ ଯୋଗ୍ୟତା ଅର୍ଜନ କରିଛନ୍ତି। ପ୍ରତିଯୋଗିତାର ଫାଇନାଲିଷ୍ଟ ଟୋକିଓ ଗେମ୍ସ ପାଇଁ ଆପେ ଯୋଗ୍ୟତା ଅର୍ଜନ କରିବେ। ସୁମିତ୍ ସେମିଫାଇନାଲରେ ଆରମ୍ଭରୁ ଆକ୍ରମଣାତ୍ମକ ପ୍ରଦର୍ଶନ କରି ଭେନେଜୁଏଲାର ଜୋସ୍ ଡାନିଲ ଡିଆଜ୍ ରବର୍ଟିଙ୍କ ବିପକ୍ଷରେ ୫-୦ରେ ବିଜୟ ହାସଲ କରିଥିଲେ। ଅନ୍ୟପକ୍ଷରେ ଅମିତ ଧନକର (୭୪କେଜି) ଓ ସତ୍ୟର୍ତ୍ତ କାଡିୟାନ (୯୭କେଜି) ପ୍ରତିଯୋଗିତାର ବିଭିନ୍ନ ପର୍ଯ୍ୟାୟରେ ପରାଜିତ ହୋଇ କୋଟା ହାସଲ କରିବାରେ ବିଫଳ ହୋଇଛନ୍ତି।
ସେମିଫାଇନାଲରେ ସୀମା
ମହିଳା ବିଭାଗରେ ସେମିଫାଇନାଲରେ ପ୍ରବେଶ ସହ ସୀମା ବିସ୍ଲା ଟୋକିଓ ଗେମ୍ସ ପାଇଁ ତାଙ୍କ ଆଶାକୁ ଉଜ୍ଜୀବିତ କରି ରଖିଛନ୍ତି। ନିଶା ଓ ପୂଜା କିନ୍ତୁ ପ୍ରତିଯୋଗିତାରୁ ବିଦାୟ ନେଇଛନ୍ତି। ୫୦ କେଜି କାଟାଗୋରି ସେମିଫାଇନାଲ ପ୍ରବେଶ ପଥରେ ସୀମା ମାତ୍ର ଦୁଇ ପଏଣ୍ଟ ହରାଇଥିଲେ। ଟୋକିଓ ଗେମ୍ସରେ ସ୍ଥାନ ପାଇବାକୁ ହେଲେ ତାଙ୍କୁ ବର୍ତ୍ତମାନ ପୋଲାଣ୍ଡର ଆନ୍ନା ଲୁକାସିକାଙ୍କୁ ପରାସ୍ତ କରିବାକୁ ପଡ଼ିବ। ନିକଟରେ ଅଲମାଟିଠାରେ ଏସିଆନ ଚାମ୍ପିୟନଶିପ୍ରେ ବ୍ରୋଞ୍ଜ ଜିତିଥିବା ସୀମା କ୍ୱାର୍ଟରଫାଇନାଲରେ ବେଲାରୁଷର ଆନାସ୍ତାସିଆ ୟାନୋତାଭାଙ୍କୁ ୮-୦ରେ ହରାଇ ଦେଇଥିଲେ।