ଲଣ୍ଡନ: ଆଗକୁ ବିଶ୍ୱରେ ଗ୍ରୀଷ୍ମ ପ୍ରବାହର ମାତ୍ରା ବଢ଼ିବା ଫଳରେ ତାପମାତ୍ରା ମଧ୍ୟ ବୃଦ୍ଧି ପାଇବ। ଲୋକେ ଧରାପୃଷ୍ଠରେ ବାସ କରିବା ଏକପ୍ରକାର କଷ୍ଟକର ହୋଇପଡ଼ିବ ବୋଲି ବିଶେଷଜ୍ଞଙ୍କ ଦ୍ୱାରା କରାଯାଇଥିବା ଏକ ରିପୋର୍ଟରୁ ଜାଣିବାକୁ ମିଳିଛି। ଆଫ୍ରିକାର ସହେଲ, ଏସିଆର ଦକ୍ଷିଣାଞ୍ଚଳ ଏବଂ ଦକ୍ଷିଣ-ପଶ୍ଚିମାଞ୍ଚଳ ଓ ୟୁନାଇଟେଡ୍ ନେଶନ୍ରେ ଆଗକୁ ଅସହ୍ୟ ତାତି ଅନୁଭୂତ ହେବ, ଯାହା ରେଡ୍କ୍ରସ୍ ପକ୍ଷରୁ ପ୍ରକାଶିତ ରିପୋର୍ଟରେ କୁହାଯାଇଛି। ଚଳିତବର୍ଷ ସୋମାଲିଆ ଏବଂ ପାକିସ୍ତାନରେ ତାପମାତ୍ରା ସର୍ବାଧିକ ରହିଥିବାବେଳେ ଏହା ଆଗାମୀ ଦିନରେ ହେବାକୁ ଥିବା ଅସହ୍ୟ ଗରମର ଆଭାସ ବୋଲି କୁହାଯାଇ ପାରିବ।
ତେବେ ବିଶ୍ୱରେ ଅନୁଭୂତ ଅସହ୍ୟ ଗ୍ରୀଷ୍ମ ପ୍ରବାହକୁ ରୋକିବା ଲାଗି ତୁରନ୍ତ ଏକ ଦୃଷ୍ଟାନ୍ତମୂଳକ ପଦକ୍ଷେପ ନେବା ଜରୁରୀ। କାରଣ ଆଗାମୀ ଦିନରେ ତାପମାତ୍ରା ବୃଦ୍ଧି ସକାଶେ ଧରାରେ ବସବାସ କରିବା ଲୋକଙ୍କ ପକ୍ଷେ ବହୁ କଷ୍ଟକର ହୋଇ ପଡ଼ିବ। କ୍ୟାନ୍ସର ଓ ଅନ୍ୟ ଇନ୍ଫେକ୍ସନରେ ଲୋକଙ୍କର ହେଉଥିବା ମୃତ୍ୟୁ ତୁଳନାରେ ଅସହ୍ୟ ଗରମ ପାଇଁ ଅଧିକମାତ୍ରାରେ ଲୋକଙ୍କ ପ୍ରାଣ ଚାଲିଯିବାର ଆଶଙ୍କା ରହିଛି। ନବଜାତ ଶିଶୁ, ଗର୍ଭବତୀଙ୍କ ମୃତ୍ୟୁ ସଂଖ୍ୟା ବୃଦ୍ଧିକୁ ଏଡ଼ାଇ ଦିଆଯାଇ ନ ପାରେ। ଫସଲ କାମ ଅସହଜ ହେବା କାରଣରୁ ବିଶ୍ୱରେ ଖାଦ୍ୟ ସଙ୍କଟ ଭଳି ପରିସ୍ଥିତି ଉପୁଜିବ।
