କ୍ୱିଭ୍,୮।୪: ରୁଷିଆ ଓ ୟୁକ୍ରେନ ମଧ୍ୟରେ ୪୪ଦିନ ହେଲାଣି ଯୁଦ୍ଧ ଜାରି ରହିଛି। ରୁଷିଆର ଆକ୍ରମଣରେ ୟୁକ୍ରେନର ଅନେକ ସହର ଧ୍ୱଂସ ହୋଇଯାଇଛି। ଇତିମଧ୍ୟରେ, ୟୁକ୍ରେନ ଗଣମାଧ୍ୟମ ଦାବି କରିଛି ଯେ, ୟୁକ୍ରେନର ସୁମି ଅଞ୍ଚଳରୁ ରୁଷିଆ ସୈନ୍ୟ ପଳାୟନ କରିଛନ୍ତି। ସୁମି ସେହି ସ୍ଥାନ ଯେଉଁଠାରୁ ପ୍ରାୟ ୮୦୦ ଭାରତୀୟ ଛାତ୍ରଙ୍କୁ ସ୍ଥାନାନ୍ତର କରାଯାଇଥିଲା। ସୁମି ଓବ୍ଲାଷ୍ଟର ରାଜ୍ୟପାଳ ଏକ ଫେସବୁକ ପୋଷ୍ଟ ଜରିଆରେ ଏନେଇ ସୂଚନା ଦେଇଛନ୍ତି। ବର୍ତ୍ତମାନ ରୁଷିଆ ସୈନ୍ୟମାନେ ସୁମି ଅଞ୍ଚଳ ଛାଡିଛନ୍ତି ଏବଂ ୟୁକ୍ରେନ ସୈନ୍ୟମାନେ ଏହାକୁ ଦଖଲ କରିଛନ୍ତି ବୋଲି ସୁମି ଓବ୍ଲାଷ୍ଟର ରାଜ୍ୟପାଳ ଡିମିଟ୍ରୋ ଜିଭିଟସ୍କି ଦାବି କରିଛନ୍ତି। ଏହି ସମୟରେ କେଉଁଠି ନା କେଉଁଠି ବିସ୍ଫୋରଣର ଶବ୍ଦ ମଧ୍ୟ ଆସୁଛି। ତେବେ ବିସ୍ଫୋରଣର ଶବ୍ଦକୁ ନେଇ ସୁମି ଓବ୍ଲାଷ୍ଟର ରାଜ୍ୟପାଳ ଡିମିଟ୍ରୋ ସ୍ପଷ୍ଟ କରିଛନ୍ତି ଯେ, ଉଦ୍ଧାରକାରୀ ଦଳର କର୍ମୀମାନେ ରୁଷିଆ ସୈନ୍ୟଙ୍କ ଦ୍ୱାରା ଛଡାଯାଇଥିବା ଗୁଳିଗୋଳାକୁ ବାହାର କରୁଥିବାରୁ ସେଠାରେ ବିସ୍ଫୋରଣ ଶବ୍ଦ ଶୁଣିବାକୁ ମିଳୁଛି। ଏବେ ସୁଦ୍ଧା ବି ଉକ୍ତ ଅଞ୍ଚଳ ସୁରକ୍ଷିତ ନୁହେଁ। ଡ୍ରାଇଭରମାନେ ରାସ୍ତା କଡ଼ରେ କିମ୍ବା ଜଙ୍ଗଲ ପଛରେ ଥିବା ରାସ୍ତାରେ ଗାଡି ଚଳାଇବା ଉଚିତ ନୁହେଁ ବୋଲି ରାଜ୍ୟପାଳ ଡିମିଟ୍ରୋ କହିଛନ୍ତି।