ପୁରୀ,୩୦ା୬(ଅଜିତ୍ ମହାନ୍ତି): ଆଷାଢ଼ ଶୁକ୍ଳ ଏକାଦଶୀ ତିଥି ଅବସରରେ ରଥ ଉପରେ ଶ୍ରୀବିଗ୍ରହମାନଙ୍କ ସୁନାବେଶ ଅନୁଷ୍ଠିତ ହୋଇଯାଇଛି। ମହାପ୍ରଭୁଙ୍କ ସୁନାବେଶ ଦର୍ଶନ କରିବା ପାଇଁ ଶ୍ରୀକ୍ଷେତ୍ରରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା। ଲକ୍ଷାଧିକ ଭକ୍ତଙ୍କ ମଧ୍ୟରେ ଥିଲେ ଜଣେ ଶତାୟୁ ମହିଳା ଭକ୍ତ। ଉକ୍ତ ମହିଳାଙ୍କୁ ୧୧୦ ବର୍ଷ ହୋଇଥିବା ବେଳେ ଠିକ୍ ଭାବେ ଚାଲିପାରୁ ନ ଥାନ୍ତି। ତାଙ୍କ ପୁଅ ତାଙ୍କୁ ଧରି ପୁରୀରେ ପହଞ୍ଚତ୍ବା ପରେ ପୁରୀ ରେଳ ଷ୍ଟେଶନଠାରୁ ତାଙ୍କୁ ଅଟୋରେ ବଡ଼ଦାଣ୍ଡ ଯାଏଁ ଆଣିଥିଲେ। ପରେ ସେଚ୍ଛାସେବୀମାନେ ତାଙ୍କୁ ହାତରେ ଆଣି ମହାପ୍ରଭୁଙ୍କ ଦର୍ଶନ କରାଇଥିଲେ। ମହାପ୍ରଭୁଙ୍କ ସୁନାବେଶ ଦର୍ଶନ କରି ବେଶ୍ ଖୁସିଥିବା ସୁନ୍ଦରମଣି ରାଓ କହିଛନ୍ତି। ମହାପ୍ରଭୁଙ୍କ ଦର୍ଶନ କରି ନୂଆ ଜୀବନ ପାଇଥିବା ସେ କହିଛନ୍ତି।
ଆଶାବାଡ଼ି ସହାୟତାରେ ଯାଜପୁରରୁ ପୁରୀ
ମହାପ୍ରଭୁଙ୍କୁ ଦୁଲ୍ଲର୍ଭ ସୁନାବେଶ ଦେଖିବାକୁ କାହିଁ କେଉଁ ଦୂରରୁ ଭକ୍ତ ଶ୍ରୀକ୍ଷେତ୍ରକୁ ଧାଇଁଆସେ। ଏହି ମଧ୍ୟରେ ଭକ୍ତଙ୍କ ଜନ ସମୁଦ୍ରକୁ ଖାତିର ନ କରି ଜଣେ ଦିବ୍ୟାଙ୍ଗ ଭକ୍ତ କାଳିଆ ଠାକୁରଙ୍କୁ ଦର୍ଶନ କରିବା ପାଇଁ ଆଶା ବାଡି ସାହାଯ୍ୟରେ ଯାଜପୁର ଜିଲା କୋରେଇ ଅଞ୍ଚଳରୁ ଶ୍ରୀକ୍ଷେତ୍ରକୁ ଆସିଥିଲେ। ମହାପ୍ରଭୁଙ୍କୁ ସୁନାବେଶରେ ଦେଖି କଷ୍ଟ ଲାଘବ ହୋଇଥିବା କହିଥିଲେ। ତେବେ ସେ ଜନ୍ମରୁ ଭଲ ଥିବାବେଳେ ତାଙ୍କ ଗୋଡ ଖରାପ ହେବାରୁ ୧୯୮୦ ମସିହାରେ ଗୋଡ କଟା ହୋଇଥିଲା। ତେବେ ସେହିଦିନଠାରୁ ସେ ତାଙ୍କର ଆଶାବାଡିକୁ ଭରସା କରି ପ୍ରତିବର୍ଷ ମହାପ୍ରଭୁଙ୍କ ଦର୍ଶନ କରିବା ପାଇଁ ପୁରୀ ଆସନ୍ତି। ମହାପ୍ରଭୁଙ୍କ ଦର୍ଶନ କରି ଫେରନ୍ତି।
ଛାତରେ ଚଢ଼ି ସୁନାବେଶ ଦେଖିଲେ
ମହାପ୍ରଭୁଙ୍କ ସୁନାବେଶ ଦିନ ପୁରୀ ଅସଂଖ୍ୟ ଭକ୍ତଙ୍କ ଭିଡ଼ ରହିଥିବା ବେଳେ ଅନେକ ଶ୍ରଦ୍ଧାଳୁ ଗହଳିକୁ ଯାଇପାରି ନ ଥିଲେ। ପୋଲିସ ମଧ୍ୟ କିଛି ଜଣଙ୍କୁ ରଥ ନିକଟକୁ ଛାଡି ନ ଥିଲା। ଫଳରେ ଶହ ଶହ ଭକ୍ତ କାକୁଡି ଖାଇ ଛକ ନିକଟରେ ଥିବା ଛାତ ଏବଂ ଉଚ୍ଚା ସ୍ଥାନରେ ଠିଆ ହୋଇ ମହାପ୍ରଭୁଙ୍କ ଦୁଲ୍ଲର୍ଭ ସୁନାବେଶକୁ ଦର୍ଶନ କରି ଆଶିଷ ନେଇଥିଲେ।
ଶ୍ରୀପୟର, ଶ୍ରୀଭୁଜ ଦର୍ଶନରୁ ବଞ୍ଚତ୍ତ ଭକ୍ତ
ମହାପ୍ରଭୁଙ୍କ ସୁନାବେଶ ଦର୍ଶନ କରିବା ପାଇଁ ଗୁରୁବାର ଲକ୍ଷାଧିକ ଭକ୍ତ ପୁରୀ ଆସିଥିଲେ। ହେଲେ ସୁନାବେଶ ପରେ ସେବକମାନେ ମହାପ୍ରଭୁଙ୍କ ସମ୍ମୁଖରେ ବସିବା ସହ ଅନେକ ସମୟରେ ମହାପ୍ରଭୁଙ୍କୁ ବେଢି ରହିଥିଲେ। ଫଳରେ ଅଧିକାଂଶ ସମୟ ଭକ୍ତମାନେ ଶ୍ରୀବିଗ୍ରହମାନଙ୍କ ଶ୍ରୀପୟର ଏବଂ ଶ୍ରୀଭୂଜ ଦର୍ଶନ କରିବାରୁ ବଞ୍ଚତ୍ତ ହୋଇଥିଲେ। ଫଳରେ ଭକ୍ତମାନେ ଅସନ୍ତୋଷ ବ୍ୟକ୍ତ କରିଥିଲେ।