ଲଣ୍ଡନ,୨୫ା୧: ଏସୀୟ ବଂଶୋଦ୍ଭବ ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକ ଶାସକ କଞ୍ଜରଭେଟିଭ୍ ପାର୍ଟିରୁ ପୁଣି ବିରୋଧର ସମ୍ମୁଖୀନ ହୋଇଛନ୍ତି। ବିତର୍କିତ ଅନ୍ଲାଇନ୍ ସେପ୍ଟି ବିଲ୍ ଜରିଆରେ ଦେଶରେ ଏକ ନୂଆ ଆଇନ ପ୍ରଣୟନ ପାଇଁ ଯୋଜନା ଚାଲିଛି, ଯାହାକି ୬ ମାସ ମଧ୍ୟରେ କାର୍ଯ୍ୟକାରୀ କରାଯିବ। ଶିଶୁମାନଙ୍କୁ ଅଶ୍ଳୀଳ ଚଳଚ୍ଚିତ୍ର ଦେଖିବାରୁ ନିବୃତ୍ତ ରଖିବା ଉଦ୍ଦେଶ୍ୟରେ ସବୁ ପର୍ନ ସାଇଟ୍ରେ ଏଜ୍ ଭେରିଫିକେଶନ୍ ସିଷ୍ଟମ୍କୁ ବାଧ୍ୟତାମୂଳକ କରିବା ପାଇଁ ଏଥିରେ ବ୍ୟବସ୍ଥା କରାଯାଉଛି। ପାର୍ଲାମେଣ୍ଟର ଉଚ୍ଚ ସଦନ ହାଉସ୍ ଅଫ୍ ଲଡର୍ସରେ ଏହି ବିଧେୟକକୁ ସୋମବାର ସମୀକ୍ଷା କରାଯିବ। ନୂଆ ସଂଶୋଧନକୁ ନେଇ ଫେବୃୟାରୀ ଶେଷ ଆଡ଼କୁ ବିତର୍କ ହେବ। ବୟସ୍କମାନେ ୧୮ ବର୍ଷର ହୋଇଥିବା ନେଇ ପ୍ରମାଣ ଦେବା ପରେ ପର୍ନ ସାଇଟ୍ ଭିଜିଟ୍ କରିପାରିବେ। ସରକାରଙ୍କ ପକ୍ଷରୁ ଏଥିଲାଗି ଜୋର୍ଦାର ଉଦ୍ୟମ ଚାଲିଥିବାବେଳେ ଋଷି ସୁନକଙ୍କ କଞ୍ଜରଭେଟିଭ୍ ପାର୍ଟି ଏମ୍ପିମାନେ ଏହାକୁ ବିରୋଧ କରିଛନ୍ତି।
