ଭବାନୀପାଟଣା,୨୧।୧: କଳାହାଣ୍ଡି ଜିଲା ମା’ ମାଣୀକେଶ୍ୱରୀଙ୍କ ଛତରଯାତ୍ରା ପରେ ଅଲାତରାର ସୁନାମୁଖୀ ଯାତ୍ରାରେ ବଳି ପଡିବା ପ୍ରଥା ବହୁ ପ୍ରାଚୀନ। ମଦନପୁର ରାମପୁର ବ୍ଲକ ଅନ୍ତର୍ଗତ ଅଲାତରା ଗ୍ରାମରେ ପ୍ରତିବର୍ଷ ପୌଷ ମାସ ଶୁକ୍ଲ ପକ୍ଷ ପ୍ରଥମ ବୁଧବାର ଅର୍ଥାତ ଶୁଳିଆ ଯାତ୍ରା ପରଦିନ ସୁନାମୁଖୀ ଯାତ୍ରା ହୋଇଥାଏ। ଆଦିବାସୀ କନ୍ଧ ସମ୍ପ୍ରଦାୟ ଦ୍ୱାରା ପୂଜିତ ସୁନାମୁଖୀ ପୀଠରେ ଏହି ଦିନ ଶିମ୍ବ ଫଳ ଅର୍ପଣ କରାଯାଇଥାଏ। ଦେବୀ ଦିଶାରୀ ମାଧ୍ୟମରେ ଆର୍ବିଭୂତ ହୋଇ ଭକ୍ତଙ୍କ ଗୁହାରୀ ଶୁଣିଥାନ୍ତି। ଚଳିତ ବର୍ଷ ୨ ଟି ପୋଢ ସମେତ ୨୫ରୁ ଅଧିକ ବୋଦା ଶତାଧିକ କୁକୁଡ଼ା ବଳି ପଡିଥିଲା। ପ୍ରଥମେ ପାଟ ବୋଦା ଅର୍ପଣ ପରେ ଅନ୍ୟାନ୍ୟ ବଳି ଦିଆଯାଇଥିଲା। ଶୁଲିଆ ବୁଢାଙ୍କ ସାନଭାଇ ଭାବେ ପରିଚିତ ସୁନାମୁଖୀଙ୍କ ଯାତ୍ରା ଦେଖିବା ପାଇଁ ହଜାର ହଜାର ଲୋକଙ୍କ ସମାଗମ ହୋଇଥାଏ। ଚଳିତବର୍ଷ କୋଭିଡ କଟକଣା ହେତୁ ଶୀଘ୍ର ପୂଜା ଆରମ୍ଭ ହୋଇଥିଲା। ଯାତ୍ରାରେ କୌଣସି ଦୋକାନ ବଜାର ବସି ନ ଥିଲା। ଲୋକେ ଦର୍ଶନ କରି ଶୀଘ୍ର ଫେରି ଯାଇଥିଲେ।