ଭୁବନେଶ୍ୱର, ୨୨।୪: ସୋମବାର ବିଜୁ ଜନତା ଦଳ ପକ୍ଷରୁ ସପ୍ତମ ପର୍ଯ୍ୟାୟ ଟିକେଟ୍ ଘୋଷଣା କରାଯାଇଛି। ଏଥିରେ ବରୀ ବିଧାୟକ ସୁନନ୍ଦା ଦାସଙ୍କ ସ୍ଥାନରେ ବିଶ୍ୱରଂଜନ ମଲ୍ଲିକଙ୍କୁ ଟିକେଟ୍ ମିଳିଛି। ଏହାପରେ ସୁନନ୍ଦା ନିଜର ଅସନ୍ତୋଷ ପ୍ରକାଶ କରିଛନ୍ତି। ଚକ୍ରାନ୍ତ କରି ତାଙ୍କର ଟିକେଟ୍ କାଟି ଦିଆଯାଇଥିଲା ବେଳେ ଦଳ ତାଙ୍କ ପ୍ରତି ବିଚାର କଲାନି ବୋଲି ସେ କହିଛନ୍ତି।
ସୁନନ୍ଦ କହିଛନ୍ତି ”ମୁଖ୍ୟମନ୍ତ୍ରୀ ରିପୋର୍ଟ ଦେଖିଥିଲେ ଟିକେଟ କଟିନଥାନ୍ତା, ଏକାଧିକ ଚକ୍ରାନ୍ତକାରୀ ମିଶି ତାଙ୍କର ଟିକେଟ୍ କାଟିଛନ୍ତି। ଭଗବାନ ଜଗନ୍ନାଥ ତାଙ୍କ କଥା ବୁଝିବେ। ତେବେ ରିପୋର୍ଟ ମୋ ସପକ୍ଷରେ ଥିଲା, ଟିକେଟ କାଟିବାକୁ ବାରମ୍ବାର ପ୍ରୟାସ କରାଯାଇଥିଲା। ମୋ ଟିକେଟ କାଟି ଜଣେ ଗୁଣ୍ଡା, ବଦମାସଙ୍କୁ ଟିକେଟ ଦିଆଯାଇଛି।”
ଏହାସହିତ ସୁନନ୍ଦା ଅଭିଯୋଗ ଲଗାଇଛନ୍ତି ଯେ, ”ତାଙ୍କଠାରୁ କ’ଣ ପାଇଥିବେ ବୋଲି ତାଙ୍କୁ ଟିକେଟ ଦିଆଯାଇଛି। ଏପରିକି ଟିକେଟ କଟାଯିବ ବୋଲି ମୋତେ କେବେ ଡାକି ଆଲୋଚନା କରିନାହାନ୍ତି, ୫ ବର୍ଷ ନିଷ୍ଠାର ସହ କାମ କରିଛି କିନ୍ତୁ ଦଳ ମୋ ପ୍ରତି ବିଚାର କଲାନି।”