ପବିତ୍ରନଗର, ୧୮ା୭(ଡି.ଏନ.ଏ.) – ଅନୁଗୋଳ ଜିଲା କଣିହାଁ ବ୍ଳକ ସମଲ ଥାନା ଶିଲିଂ ଗ୍ରାମରେ ପାରିବାରିକ କଳହ କାରଣରୁ ସୁନନ୍ଦ ପ୍ରଧାନଙ୍କୁ ପିଟି ମାରିବା ଘଟଣାରେ ପୋଲିସ ଶୁକ୍ରବାର ୮ ଜଣଙ୍କୁ ଗିରଫ କରିଛି। ସେମାନେ ହେଲେ ସ୍ତ୍ରୀ ଭାରତୀ ପ୍ରଧାନ, ଝିଅ ଟୁନିରାଣୀ, ଲୁନିରାଣୀ, ମୃତକଙ୍କ ଶ୍ୱଶୁର ଶ୍ରୀନିବାସ ବିଶ୍ବାଳ, ଶଳା ପିନୁ ବିଶ୍ବାଳ, ଶଡୁ ଜତିନ୍ଦ୍ର ସାହୁ, ଅନ୍ୟ ସହଯୋଗୀ ବସନ୍ତ ମହାକୁଡ଼ ଓ ଅର୍ଜୁନ ହେମ୍ବ୍ରମ। ସମସ୍ତ ଅଭିଯୁକ୍ତଙ୍କୁ ଗିରଫ ପରେ କୋର୍ଟଚାଲାଣ କରାଯାଇଛି।
ସମଲ ଥାନା ଆଇଆଇସି ଚାରୁଲତା ବେହେରା କହିଛନ୍ତି, ସୁନନ୍ଦ ଓ ତାଙ୍କ ସ୍ତ୍ରୀ ଭାରତୀ ପରସ୍ପରର ଚରିତ୍ରକୁ ସନ୍ଦେହ କରୁଥିଲେ। ଏହି କାରଣରୁ ଅନେକ ସମୟରେ ଦମ୍ପତିଙ୍କ ମଧ୍ୟରେ ପାଟିତୁଣ୍ଡ ହେଉଥିଲା। ବୁଧବାର ରାତିରେ ସୁନନ୍ଦ ଘରକୁ ଆସିଥିବା ବେଳେ ପୁଣି କଳହ ଲାଗିଥିଲା। ସୁନନ୍ଦ ତାଙ୍କୁ ମାରିଦେବା ଆଶଙ୍କା କରି ଭାରତୀ ସେହି ରାତିରେ ହିଁ ବାପଘର ଲୋକଙ୍କୁ ଡକାଇଥିଲେ। ବିଳମ୍ବିତ ରାତିରେ ସୁନନ୍ଦଙ୍କ ଶ୍ୱଶୁର ଶ୍ରୀନିବାସ, ଶଳା ପିନୁ, ଶଡୁ ଜତିନ୍ଦ୍ର ଆସିବା ସହ ଅନ୍ୟ ଦୁଇଜଣ ବସନ୍ତ ଓ ଅର୍ଜୁନଙ୍କୁ ସାଙ୍ଗରେ ଆଣିଥିଲେ। ତେବେ ପାଟିତୁଣ୍ଡ ବେଳେ ଉତ୍ତେଜନା ଏତେ ବଢ଼ିଯାଇଥିଲା ଯେ ଅଭିଯୁକ୍ତମାନେ ସୁନନ୍ଦଙ୍କୁ କାଠ ଫାଳିଆରେ ଆକ୍ରମଣ କରିଥିଲେ। ଫଳରେ ଘଟଣାସ୍ଥଳରେ ସୁନନ୍ଦଙ୍କ ମୃତ୍ୟୁ ହୋଇଯାଇଥିଲା। ଭାରତୀ ଓ ଦୁଇ ଝିଅ ଥାନାରେ ଆତ୍ମସମର୍ପଣ କରିଥିବା ବେଳେ ଅନ୍ୟମାନେ ଘଟଣାସ୍ଥଳରୁ ପଳାଇ ଯାଇଥିଲେ। ଅଭିଯୋଗ ଆଧାରରେ ପୋଲିସ ତଦନ୍ତ କରି ଏଥିରେ ଅନ୍ୟମାନଙ୍କ ସମ୍ପୃକ୍ତି ଥିବା ଜାଣିପାରିଥିଲା ଓ ମୋଟ୍ ୮ଜଣଙ୍କୁ ଗିରଫ କରିଥିଲା।