ବିଶ୍ୱର ସବୁଠାରୁ ବଡ ସର୍ଚ୍ଚ ଇଞ୍ଜିନ ଭାବରେ ଜଣାଶୁଣା ‘ଗୁଗଲ’ର ମୁଖ୍ୟ କାର୍ଯ୍ୟର୍ନିବାହୀ ଅଧିକାରୀ (ସିଇଓ) ସୁନ୍ଦର ପିଚାଇଙ୍କ ବ୍ୟକ୍ତିଗତ ଜୀବନ ବେଶ୍ ରୋଚକ। ତାମିଲନାଡୁର ମଦୁରାଇଠାରେ ୧୯୭୨ ଜୁଲାଇ ୧୨ରେ ଜନ୍ମ ହୋଇଥିଲେ ସୁନ୍ଦର ପିଚାଇ। ତାଙ୍କ ସ୍କୁଲ ଓ କଲେଜ ଶିକ୍ଷା ଚେନ୍ନାଇରେ ହୋଇଥିଲା। ସେଠାରେ ଦୁଇ ବଖରା ଘରେ ତାଙ୍କୁ ରହିବାକୁ ପଡୁଥିଲା। ଏପରିକି ସେଠାରେ ଟିଭି କିମ୍ବା ଟେଲିଫୋନ ମଧ୍ୟ ନ ଥିଲା। କଠିନ ପରିଶ୍ରମ କରି ସେ ଖଡଗପୁର ଆଇଆଇଟିରେ ବିଟେକ ପଢ଼ିବାର ସୁଯୋଗ ପାଇଥିଲେ। ଏହିଠାରେ ହିଁ ସ୍ତ୍ରୀ ଅଞ୍ଜଳିଙ୍କ ସହ ତାଙ୍କ ପ୍ରଥମ ଭେଟ ହୋଇଥିଲା। ଦୁହେଁ ଗୋଟିଏ କ୍ଲାସରେ ପଢୁଥିଲେ। ପ୍ରଥମେ ଉଭୟ ଭଲ ବନ୍ଧୁ ଥିଲେ। ଧୀରେ ଧୀରେ ଏହା ପ୍ରେମରେ ପରିଣତ ହୋଇଥିଲା। ପ୍ରଥମେ ସୁନ୍ଦର ଅଞ୍ଜଳିକୁ ପ୍ରପୋଜ କରିଥିଲେ। ଆଉ ସେ ହଁ ବି କହିଥିଲେ। ସେତେବେଳେ ଫୋନ ନ ଥିବାରୁ ଅଞ୍ଜଳିଙ୍କୁ ଭେଟିବାକୁ ହଷ୍ଟେଲ ଯିବାକୁ ପଡୁଥିଲା ବୋଲି ଏକ ସାକ୍ଷାତକାରରେ କହିଛନ୍ତି। ତାଙ୍କୁ ଷ୍ଟାନଫୋର୍ଡ ବିଶ୍ୱବିଦ୍ୟାଳୟରେ ପଢିବା ପାଇଁ ସ୍କଲାରଶିପ ମିଳିଥିଲା। ସେ ସମୟରେ ତାଙ୍କ ଘରର ଆର୍ଥିକ ପରିସ୍ଥିତି ସ୍ବଚ୍ଛଳ ନ ଥିଲା। ଏପରିକି ବିଦେଶରେ ପଢିବା ପାଇଁ ବିମାନ ଟିକେଟ କିଣିବାକୁ ମଧ୍ୟ ତାଙ୍କ ନିକଟରେ ଅର୍ଥ ନ ଥିଲା। ସେ ଉଧାର କରି ପଢିବାକୁ ଯାଇଥିଲେ। ୧ ଏପ୍ରିଲ ୨୦୦୪ରେ ପ୍ରଥମଥର ଗୁଗଲ ପାଇଁ ଇଣ୍ଟରଭ୍ୟୁ ଦେଇଥିଲେ ସୁନ୍ଦର ପିଚାଇ। ପ୍ରଥମ ୩ଟି ଇଣ୍ଟରଭ୍ୟୁରେ ଫେଲ ହୋଇଥିଲେ ମଧ୍ୟ ଚତୁର୍ଥ ଇଣ୍ଟରଭ୍ୟୁ ପାସ କରି ଗୁଗଲରେ ସେ ଚାକିରି ପାଇଥିଲେ।