ନୂଆଦିଲ୍ଲୀ, ୪।୭- ଭାରତୀୟ କ୍ରିକେଟ୍ରେ ସୁନୀଲ ଗାଭାସ୍କରଙ୍କୁ ଅନ୍ୟତମ ସର୍ବକାଳୀନ ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ବିବେଚନା କରାଯାଏ। ଲିଟିଲ୍ ମାଷ୍ଟର ଭାବେ ପରିଚିତ ଗାଭାସ୍କର ପ୍ରଥମ ଭାରତୀୟ ଖେଳାଳି ଭାବେ ଟେଷ୍ଟ କ୍ରିକେଟରେ ୧୦ ହଜାର ରନ୍ ସଂଗ୍ରହ କରିବାର ସୌଭାଗ୍ୟ ଲାଭ କରିଥିଲେ। ତାଙ୍କ ନାମରେ ମଧ୍ୟରେ ଟେଷ୍ଟରେ ୩୪ ଶତକ ଲିପିବଦ୍ଧ ରହିଛି। ଏତେସବୁ କୀର୍ତ୍ତିମାନ ସତ୍ତ୍ୱେ ପୂର୍ବତନ ଉଇକେଟ୍କିପର କିରନ ମୋରେ କିନ୍ତୁ ଗାଭାସ୍କାରଙ୍କୁ ନେଟ୍ସ ସେସନର ସବୁଠାରୁ ଖରାପ ଖେଳାଳି ବୋଲି କହିଛନ୍ତି। ଏକ ସାକ୍ଷାତ୍କାର ଅବସରରେ ମୋରେ କହିଛନ୍ତି, ‘ନେଟ୍ସରେ ମୁଁ ଯେତେ ଖେଳାଳିଙ୍କୁ ଦେଖିଛି ସେମାନଙ୍କ ମଧ୍ୟରେ ଗାଭାସ୍କର ସବୁଠାରୁ ଖରାପ ଥିଲେ। ନେଟ୍ସରେ ପ୍ରାକ୍ଟିସ କରିବାକୁ ସେ ଅଧିକାଂଶ ସମୟ ପସନ୍ଦ କରି ନ ଥାନ୍ତି। ଯେତେବେଳେ ତାଙ୍କୁ ନେଟ୍ସରେ ପ୍ରାକ୍ଟିସ କରୁଥିବାର ଦେଖିବେ ଏବଂ ପଡ଼ିଆରେ ମ୍ୟାଚ୍ ଖେଳୁଥିବାର ଦେଖିବେ ତେବେ ସେଥିରେ ୯୯.୯ ପ୍ରତିଶତ ଫରକ ପାଇବେ। ସୁନୀଲ ନେଟ୍ସରେ ପ୍ରାକ୍ଟିସ କରିବା ସମୟରେ ଲାଗିବେ ଯେ ସେ ମ୍ୟାଚ୍ରେ କେମିତି ରନ୍ ସଂଗ୍ରହ କରିବେ। କିନ୍ତୁ ଏହାପରଦିନ ସେ ଯେତେବେଳେ ମ୍ୟାଚ୍ ଖେଳୁଥାନ୍ତି ସେତେବେଳେ ଜଣେ ଚମତ୍କାର ଖେଳାଳି ଲାଗନ୍ତି। ସୁନୀଲ ଗାଭାସ୍କାରଙ୍କୁ ଭଗବାନ ଦେଇଥିବା ଶ୍ରେଷ୍ଠ ଉପହାର ହେଉଛି ତାଙ୍କ ଏକାଗ୍ରତା। ତାଙ୍କର ଏକାଗ୍ରତାସ୍ତର ଅବିଶ୍ୱସନୀୟ ଥିଲା ବୋଲି ମୋରେ ଏହି ଅବସରରେ ପ୍ରକାଶ କରିଛନ୍ତି।
