ଜୋହାନ୍ସବର୍ଗ,୫।୧: ଦୁଇ ଅଭିଜ୍ଞ ବ୍ୟାଟର ଚେତେଶ୍ୱର ପୂଜାରା ଓ ଅଜିଙ୍କ୍ୟ ରାହାନେ ନ୍ୟୁ ଇୟର ଟେଷ୍ଟର ତୃତୀୟ ଦିନରେ ଟିମ୍ ଇଣ୍ଡିଆକୁ ଭଲ ଆରମ୍ଭ ଦେଇଥିଲେ। ପ୍ରବଳ ଚାପରେ ଖେଳୁଥିବା ଦୁଇ ବ୍ୟାଟର ଅର୍ଦ୍ଧଶତକ ପୂରଣ କରିବା ପରେ ଫେରିଥିଲେ ପ୍ୟାଭିଲିଅନ। ତୃତୀୟ ଉଇକେଟ ପାଇଁ ଦୁହେଁଙ୍କ ମଧ୍ୟରେ ୧୧୧ ରନ୍ର ଭାଗୀଦାରି ହୋଇଥିଲା। କ୍ରମାଗତ ବ୍ୟବଧାନରେ ଦୁଇ ବରିଷ୍ଠ ବ୍ୟାଟର ଆଉଟ୍ ହେବା ପରେ ବେପରୁଆ ଶଟ୍ ଖେଳି ଆଉଟ୍ ହୋଇଥିଲେ ରିଷଭ ପନ୍ତ। ଏଥିଲାଗି ତାଙ୍କୁ ସମାଲୋଚନା କରି ତାଙ୍କ ପାଖରେ ଦାୟିତ୍ୱଜ୍ଞାନର ଅଭାବ ଥିବା କହିଛନ୍ତି କିମ୍ବଦନ୍ତୀ ବ୍ୟାଟର ସୁନିଲ ଗାଭାସ୍କର।
“ସେହି ଶଟ୍ ପାଇଁ ତାଙ୍କୁ କଦାପି କ୍ଷମା କରାଯାଇ ପାରିବ ନାହିଁ। ସେଭଳି ଶଟ୍ ଖେଳିବାର ଆବଶ୍ୟକତା ନ ଥିଲା। ତାଙ୍କ ପାଖରେ ଦାୟିତ୍ୱଜ୍ଞାନର ଅଭାବ ରହିଛି। ରାହାନେ, ପୂଜାରା କ୍ରିଜ୍ରେ ସମୟ ବିତାଇଥିଲେ। ଏଥିଯୋଗୁ ସେମାନଙ୍କୁ ହାତ, ଦେହରେ ବଲ ଖାଇବାକୁ ପଡ଼ିଥିଲା। ତୁମକୁ ମଧ୍ୟ ଲଢ଼େଇ କରିବାକୁ ପଡ଼ିବ” ବୋଲି ମ୍ୟାଚ୍ ବେଳେ କମେଣ୍ଟ୍ରି କରୁଥିବା ଗାଭାସ୍କର କହିଛନ୍ତି।
ରାହାନେ ଉଇକେଟ ପଛରେ କ୍ୟାଚ୍ ଆଉଟ୍ ହେବା ପୂର୍ବରୁ ୫୮ ରନ୍ କରିଥିଲେ। ସେହିଭଳି ୫୩ ରନ୍ କରିଥିବା ପୂଜାରା ଏଲବିଡବ୍ଲ୍ୟୁ ଆଉଟ୍ ହେବାରୁ ଭାରତୀୟ ଦଳର ଦ୍ୱିତୀୟ ଇନିଂସ ସ୍କୋର ୧୬୩/୪କୁ ଖସି ଆସିଥିଲା। ଏଭଳି ପରିସ୍ଥିତିରେ ଉଇକେଟକିପର ବ୍ୟାଟର ପନ୍ତ କ୍ରିଜରେ ସମୟ ବିତାଇବା ଯାଗାରେ ବଡ଼ ଶଟ୍ ମାରିବାକୁ ଉଦ୍ୟମ କରିଥିଲେ। ଯାହାକି ତାଙ୍କ ପାଇଁ କାଳ ସାଜିଥିଲା। ଏକ ଶଟ୍ ପିଚ୍ ବଲକୁ ଷ୍ଟେପ୍ ଆଉଟ୍ କରି ମାରିବାକୁ ଉଦ୍ୟମ କଲା ବେଳେ ବଲ ବ୍ୟାଟର ଏଜ ନେଇ ଚାଲିଯାଇଥିଲା ଉଇକେଟକିପରଙ୍କ ହାତକୁ।
