ନୂଆଦିଲ୍ଲୀ,୧୬।୧: ବିରାଟ କୋହଲି ଭାରତୀୟ ଟେଷ୍ଟ ଦଳର ଅଧିନାୟକ ପଦରୁ ଓହରି ଯାଇଥିବାରୁ ପରବର୍ତ୍ତୀ କ୍ୟାପଟେନ୍ କିଏ ହେବ ସେ ନେଇ ଏବେଠୁ ଆଲୋଚନା ଆରମ୍ଭ ହୋଇଯାଇଛି। ଏହା ଉପରେ ମତ ରଖିଛନ୍ତି କିମ୍ବଦନ୍ତୀ ଭାରତୀୟ କ୍ରିକେଟର ସୁନୀଲ ଗାଭାସ୍କର। କୋହଲିଙ୍କ ପରେ ଉଇକେଟକିପର ବ୍ୟାଟର ରିଷଭ ପନ୍ତଙ୍କୁ ଗୁରୁଦାୟିତ୍ୱ ଦିଆଯାଉ ବୋଲି ସେ ଚାହୁଛନ୍ତି। ପୂର୍ବତନ ଅଧିନାୟକଙ୍କ ଅନୁଯାୟୀ, ଦାୟିତ୍ୱ ଦିଆଯିବା ଦ୍ୱାରା ପନ୍ତ ପ୍ରତ୍ୟେକ ଫର୍ମାଟରେ ଆହୁରି ଭଲ କ୍ରିକେଟର ହୋଇପାରିବେ।
ଦକ୍ଷିଣ ଆଫ୍ରିକା ଠାରୁ ୨-୧ରେ ସିରିଜ୍ ହାରିବାର ପରଦିନ ହଠାତ୍ ଟେଷ୍ଟ କ୍ରିକେଟ ଅଧିନାୟକ ପଦରୁ ଇସ୍ତଫା ଦେଇ କୋହଲି କ୍ରିକେଟ ଜଗତକୁ ଚକିତ କରି ଦେଇଛନ୍ତି।
“କିଏ ଭାରତୀୟ କ୍ରିକେଟ ଦଳକୁ ଆଗେଇ ନେଇପାରିବ, ତାହା ଉପରେ ଚୟନ କମିଟିରେ ଖୁବ୍ ଚର୍ଚ୍ଚା ହେବ। ପ୍ରଥମତଃ ଏଭଳି ଖେଳାଳିଙ୍କୁ ଦାୟିତ୍ୱ ଦିଆଯିବା ଦରକାର, ଯିଏକି ପ୍ରତ୍ୟେକ ଫର୍ମାଟରେ ଖେଳୁଥିବେ। ଯଦି ମୋତେ ପଚରାଯାଏ, ତେବେ ମୁଁ ଏବେ ବି ଚାହୁଁଛି ପନ୍ତଙ୍କୁ ପରବର୍ତ୍ତୀ ଅଧିନାୟକ କରାଯାଉ। ଯେଉଁଭଳି ରିକି ପଣ୍ଟିଂ ମୁମ୍ବାଇ ଇଣ୍ଡିଆନ୍ସ ଦଳର ନେତୃତ୍ୱ ଛାଡ଼ିବା ପରେ ରୋହିତ ଶର୍ମାଙ୍କୁ ଏହି ଭାର ଦିଆଯାଇଥିଲା। ତା’ ପରେ ରୋହିତଙ୍କ ବ୍ୟାଟିଂରେ କେଉଁ ଭଳି ପରିବର୍ତ୍ତନ ଆସିଲା, ତାହା ସଭିଙ୍କୁ ଜଣା। ହଠାତ୍ ଅଧିନାୟକ ଭାର ଦିଆଯିବା ଦ୍ୱାରା ତାଙ୍କର ବ୍ୟାଟରୁ ବାହାରୁ ଥିବା ୩୦, ୪୦କୁ ଶତକରେ ପରିବର୍ତ୍ତିତ ହେବ” ବୋଲି ଗାଭାସ୍କର କହିଛନ୍ତି।
ପୂର୍ବତନ ଅଧିନାୟକ ମନସୁର ଅଲି ଖାନ ପଟୌଦିଙ୍କ ଉଦ୍ହାରଣ ଦେଇ ଗାଭାସ୍କର ଆହୁରି କହିଛନ୍ତି, ଟାଇଗର ପଟୌଦିଙ୍କୁ ମାତ୍ର ୨୧ ବର୍ଷ ବୟସରେ ବୀପରିତ ପରିସ୍ଥିତିରେ ଅଧିନାୟକ ଭାର ଦିଆଯାଇଥିଲା। ନରି କଣ୍ଟ୍ରାକ୍ଟର ଆହତ ହେଲା ପରେ ସେ କ’ଣ କରି ଦେଖାଇଲେ ତାହା ସଭିଙ୍କୁ ଜଣା। ସେ ନେତୃତ୍ୱଭାର ଏଭଳି ନେଲେ, ଯେମିତି ବତକ ପାଣରେ।
