ନୂଆଦିଲ୍ଲୀ,୩୦।୮: କଂଗ୍ରେସର ଅସ୍ଥାୟୀ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଦଳରେ ପରିବର୍ତ୍ତନ କରିବାକୁ ନିକଟରେ ୨୩ ଜଣ କଂଗ୍ରେସ ନେତା ଚିଠି ଲେଖିଥିଲେ। ଯାହାକୁ ନେଇ ଆଜିବି ଚାଲିଛି ଆଲୋଚନା। ପଞ୍ଜାବ କଂଗ୍ରେସର ଅଧ୍ୟକ୍ଷ ସୁନିଲ ଜାଖଡ ଚିଠି ଲେଖିଥିବା ନିଜ ଦଳୀୟ ନେତାଙ୍କ ଉପରେ ଏହି ଘଟଣାକୁ ନେଇ ରାଗି ଯାଇଛନ୍ତି। ସେ କହିଛନ୍ତି ଦଳ ମଧ୍ୟରେ ନିର୍ବାଚନ କରିବାକୁ ଯେଉଁମାନେ କହୁଛନ୍ତି ସେମାନେ କେବେ ନିର୍ବାଚନ ଲଢି ନାହାନ୍ତି। ତେବେ କଂଗ୍ରେସ ନେତାଙ୍କ ଦ୍ୱାରା ଉଠିଥିବା ଚର୍ଚ୍ଚାକୁ ନେଇ ଗତ ସୋମବାର କଂଗ୍ରେସ କାର୍ଯ୍ୟକାରୀ କମିଟି ବୈଠକରେ ଆଲୋଚନା ହୋଇଥିଲା। ସୁନିଲ ଆହୁରି କହିଛନ୍ତି ଦଳରେ ପରିବର୍ତ୍ତନ କରିବାକୁ ନେଇ ଯେଉଁ ଚିଠି ଲେଖାଯାଇଥିଲା ସେଥିରେ କେତେଜଣ ନେତା ନିଜକୁ ଅସୁରକ୍ଷିତ ମଣିବା ଓ ସେମାନଙ୍କର ରାଜନୈତିକ ମହତ୍ୱାକାଂକ୍ଷା ସାମ୍ନାକୁ ଆସିଛି। ସୂଚନାଯୋଗ୍ୟ, କଂଗ୍ରେସର ନେତୃତ୍ୱ ପରିବର୍ତ୍ତନକୁ ନେଇ ନିକଟରେ କଂଗ୍ରେସ ବରିଷ୍ଠ ନେତା ଗୁଲାମ ନବୀ ଆଜାଦ, କପିଲ ଶିବ୍ବଲଙ୍କ ସମେତ ପ୍ରାୟ ୨୩ ଜଣ ନେତା ସୋନିଆଙ୍କୁ ଚିଠି ଲେଖିଥିଲେ।
