ନୂଆଦିଲ୍ଲୀ, ୬ା୬: ଲୋକସଭା ନିର୍ବାଚନରେ ଭାଜପା ଅଯୋଧ୍ୟାର ଫୌଜାବାଦ୍ ଆସନରୁ ହାରିଯାଇଛି। ଏହାକୁ ନେଇ ସାରା ଦେଶରେ ଚର୍ଚ୍ଚା ଲାଗି ରହିଛି। ବିପକ୍ଷ ଦଳର ନେତା ଏହାକୁ ହିନ୍ଦୁତ଼୍ବ ରାଜନୀତି ବିରୋଧରେ ଜନାଦେଶ ବୋଲି କହିଛନ୍ତି। ଅନ୍ୟପଟେ ଏହି ଆସନକୁ ନେଇ ଭାଜପା ନେତା ମଧ୍ୟ ନିରାଶ ରହିଛନ୍ତି। ରାୟବରେଲିରୁ ଭାଜପା ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିବା ଦିନେଶ ପ୍ରତାପ ଏହା ଆମର ଦୁର୍ଭାଗ୍ୟ ବୋଲି କହିଛନ୍ତି।
ଏହାରି ମଧ୍ୟରେ ରାମାନନ୍ଦ ସାଗରଙ୍କ ଚର୍ଚ୍ଚିତ ରାମାୟଣ ସିରିଏଲ୍ରେ ଲକ୍ଷ୍ମଣ ଭୂମିକାରେ ଅଭିନୟ କରିଥିବା ଅଭିନେତା ସୁନିଲ୍ ଲହରି ଏହାକୁ ନେଇ ନିରାଶ ଜାହିର କରିଛନ୍ତି। ସେ ଇନଷ୍ଟାଗ୍ରାମରେ ଏକ ଭିଡିଓ ପୋଷ୍ଟ କରି କହିଛନ୍ତି, “ନିର୍ବାଚନ ଫଳାଫଳ ଦେଖି ମୁଁ ଅତ୍ୟନ୍ତ ନିରାଶ ହୋଇଛି। ପ୍ରଥମେ, ମତଦାନ ହାର ଖୁବ୍ କମ୍ ଥିଲା, ଆଉ ପରେ ନିର୍ବାଚନ ରେଜଲ୍ଟ। ମୁଁ ଲୋକଙ୍କୁ ନିରନ୍ତର ଭୋଟ୍ ଦେବାକୁ ଅନୁରୋଧ କଲି କିନ୍ତୁ କେହି ଏଥିପ୍ରତି ଦୃଷ୍ଟି ଦେଲେ ନାହିଁ। ବର୍ତ୍ତମାନ ଏକ ମିଳିତ ସରକାର ଗଠନ ହେବ। କିନ୍ତୁ ଏ ସରକାର ପାଞ୍ଚ ବର୍ଷ ଯାଏ ଚାଲିପାରିବ ତ? ”
ସୂଚନା ଥାଉକି, ଅଯୋଧ୍ୟାର ଏହି ଆସନରୁ ଭାଜପାର ଲାଲୁ ସିଂ ନିର୍ବାଚନ ଲଢ଼ି ପରାଜୟ ବରଣ କରିଛନ୍ତି। ସମାଜବାଦି ପାର୍ଟିରୁ ନିର୍ବାଚନ ଲଢ଼ି ଅବଧେଶ ପ୍ରସାଦ ପାସି ତାଙ୍କୁ ପରାସ୍ତ କରିଥିବା ଜଣାପଡ଼ିଛି।