ମୁମ୍ବାଇ,୧୨।୭: ପୁଣି ଥରେ ମୁମ୍ବାଇରେ କରୋନା କାୟା ମେଲାଇଲାଣି। ଗତ କିଛି ଦିନ ପୂର୍ବରୁ ସଂକ୍ରମିତଙ୍କ ସଂଖ୍ୟା ହ୍ରାସ ପାଇଥିବା ବେଳେ ଗତ ସପ୍ତାହରୁ ପୁଣି ଥରେ ସଂକ୍ରମଣ ମାମଲା ବୃଦ୍ଧି ପାଇଛି। ବର୍ତ୍ତମାନ ମହାରାଷ୍ଟ୍ର ଓ କେରଳରେ ଅଧିକ କରୋନା ମାମଲା ଚିହ୍ନଟ ହେଉଛି। ଇତିମଧ୍ୟରେ ବଲିଉଡ୍ ଅଭିନେତା ସୁନୀଲ ସେଟ୍ଟୀଙ୍କ ବିଲ୍ଡିଂକୁ ସିଲ୍ କରିଦିଆଯାଇଛି। ମୁମ୍ବାଇର ଅଲ୍ଟାମାଉଣ୍ଟ ରୋଡ ସ୍ଥିତ ପୃଥ୍ବୀ ଆପାର୍ଟମେଣ୍ଟରେ ଅତ୍ୟଧିକ କରୋନା ମାମଲା ଚିହ୍ନଟ ହେବା ପରେ ଏହି ବିଲ୍ଡିଂକୁ ସିଲ୍ କରିଦିଆଯାଇଛି। ନିୟମ ଅନୁସାରେ କୌଣସି ବିଲ୍ଡିଂରେ ୫ରୁ ଅଧିକ କରୋନା ପଜିଟିଭ୍ ଚିହ୍ନଟ ହେଲେ ତା’କୁ ସିଲ୍ କରିବାକୁ ନିର୍ଦ୍ଦେଶ ରହିଛି। ଏହି ବିଲ୍ଡିଂରେ ୩୦ଟି ମହଲା ଓ ୧୨୦ଟି ଫ୍ଲାଟ ରହିଛି। ଏଠାରୁ କେତେକ କରୋନା ମାମଲା ସାମ୍ନାକୁ ଆସିବା ପରେ ବୃହନ ମୁମ୍ବାଇ ନଗର ନିଗମ(ବିଏମ୍ସି) ପକ୍ଷରୁ ଏହି ବିଲ୍ଡିଂକୁ ସିଲ୍ କରିଦିଆଯାଇଛି। ଏଥିସହ ସମସ୍ତ କରୋନା ଆକ୍ରାନ୍ତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଏନେଇ ବିଏମ୍ସି ଆସିଷ୍ଟାଣ୍ଟ କମିଶନର ସୂଚନା ଦେଇଛନ୍ତି। ବର୍ତ୍ତମାନ ସୁନୀଲ ଓ ତାଙ୍କ ପରିବାର ସୁରକ୍ଷିତ ରହିଥିବା ବେଳେ ଏହି ବିଲ୍ଡିଂରେ ଉପସ୍ଥିତ ନାହାନ୍ତି। ସେ ଓ ତାଙ୍କ ପରିବାର ମୁମ୍ବାଇରୁ ବାହାରେ ଥିବା ଜଣାପଡ଼ିଛି। ସୂଚନା ମୁତାବକ କରୋନା ବର୍ଦ୍ଧିତ ମାମଲା ଯୋଗୁ ବିଏମ୍ସି ପକ୍ଷରୁ ମୁମ୍ବାଇର ଅନ୍ୟ ୧୦ଟି ସ୍ଥାନକୁ ମଧ୍ୟ ସିଲ୍ କରିଦିଆଯାଇଛି। ଏଥିରେ ମାଲବାର ହିଲ୍ସ, ପେଡର ରୋଡ ମଧ୍ୟ ସାମିଲ ରହିଛି।
