ଓ୍ବାଶିଂଟନ, ୧୯।୧୨:ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନୀତା ଓ୍ବିଲିୟମ୍ସ ସାଥୀ ମହାକାଶଚାରୀ ବୁଚ୍ ଓ୍ବିଲମୋରଙ୍କ ସହ ୬ ମାସରୁ ଅଧିକ ସମୟ ଧରି ଅନ୍ତର୍ଜାତୀୟ ମହାକାଶ କେନ୍ଦ୍ର(ଆଇଏସ୍ଏସ୍)ରେ ଫସି ରହିଛନ୍ତି। ତେବେ ଉଭୟଙ୍କୁ ପୃଥିବୀ ଫେରାଇ ଆଣିବାରେ ବିଳମ୍ବ ହେବ ବୋଲି ଆମେରିକୀୟ ମହାକାଶ ଏଜେନ୍ସି(ନାସା) ବୁଧବାର ସୂଚନା ଦେଇଛି। ପୂର୍ବରୁ ସ୍ପେସ୍ ଏକ୍ସ’ର ଡ୍ରାଗନ କ୍ୟାପସୁଲ ମାଧ୍ୟମରେ ୨୦୨୫ ଫେବୃଆରୀରେ ଉଭୟ ସୁନୀତା ଓ ବୁଚ୍ଙ୍କୁ ପୃଥିବୀ ଫେରାଇ ଅଣାଯିବ ବୋଲି ନାସା କହିଥିଲା। ତେବେ ନାସା ନିଜର ଏହି ପୂର୍ବ ସୂଚନାକୁ ବଦଳାଇଛି।
ଶେଷ ସୁଦ୍ଧା ସୁନୀତା ଏବଂ ବୁଚ୍ଙ୍କୁ ଫେରାଇ ଆଣିବା ସମ୍ଭବ ନୁହେଁ ବୋଲି ନାସା ସ୍ପଷ୍ଟ କରିଛି। ଉଭୟଙ୍କୁ ଫେରାଇ ଆଣିବା ପାଇଁ ନାସାର କ୍ରିଉ-୯ ମିଶନ ଲଞ୍ଚିଂରେ ବିଳମ୍ବ ଘଟିଛି। ନାସାର ଜଣେ ବରିଷ୍ଠ ଅଧିକାରୀ କହିଛନ୍ତି, ସ୍ପେସ୍ ଏକ୍ସ’ର ଏକ ନୂତନ ଡ୍ରାଗନ କ୍ୟାପସୁଲର ପ୍ରସ୍ତୁତିରେ ବିଳମ୍ବ ଘଟିଥିବାରୁ କ୍ରିଉ-୯ ମିଶନର ଲଞ୍ଚିଂରେ ମଧ୍ୟ ବିଳମ୍ବ ଘଟୁଛି। ମାର୍ଚ୍ଚ ପୂର୍ବରୁ ଏହି ଲଞ୍ଚିଂ ହେବାର ସମ୍ଭାବନା ନାହିଁ ବୋଲି ଇସ୍ରୋ କହିଛି। ନୂତନ ଡ୍ରାଗନ କ୍ୟାପସୁଲର ପ୍ରସ୍ତୁତି ବେଳେ ନାସା ଏବଂ ସ୍ପେସ୍ ଏକ୍ସ’ ପକ୍ଷରୁ ସୁରକ୍ଷାକୁ ବେଶି ପ୍ରାଧାନ୍ୟ ଦିଆଯାଉଥିବା ସେ କହିଛନ୍ତି। ପ୍ରକାଶ ଯେ, ସୁନୀତା ଓ ବୁଚ୍ ଗତ ଜୁନ୍ ୫ରେ ଏକ ସାପ୍ତାହିକ ମିଶନରେ ବୋଇଂର ଷ୍ଟାରଲାଇନର କ୍ୟାପସୁଲ ଜରିଆରେ ଆଇଏସ୍ଏସ୍ ଯାଇଥିଲେ। ତେବେ ଷ୍ଟାର୍ଲାଇନରରେ ବୈଷୟିକ ତ୍ରୁଟି ଦେଖାଯିବା ଯୋଗୁ ଉଭୟଙ୍କୁ ଠିକ୍ ସମୟରେ ଫେରାଇ ଆଣିବାରେ ନାସା ବିଫଳ ହୋଇଥିଲା।
