କୋରାପୁଟ,୧୩।୪(ସ୍ବ.ପ୍ର.): କୋରାପୁଟ ଜିଲା ସେମିଲିଗୁଡ଼ା ଥାନା ଅଧୀନ ରାଜପୁଟ ପଞ୍ଚାୟତ ପୋଡ଼ଗଡ଼ ଡଙ୍ଗାଘାଟ କୋଲାବ ଜଳଭଣ୍ଡାରରେ ଗୁରୁବାର ଅପରାହ୍ନରେ ଏକ ଅଘଟଣ ଘଟିଛି। ଏକ ଦେଶୀ ଡଙ୍ଗା ବୁଡିଯାଇ ୩ ଜଣ ମହିଳାଙ୍କ ସମେତ ୪ ଜଣ ନିଖୋଜ ହୋଇଯାଇଛନ୍ତି। ଅନ୍ୟପକ୍ଷେ ୪ ଜଣଙ୍କୁ ଉଦ୍ଧାର କରାଯାଇଛି। ନିଖୋଜମାନେ ହେଲେ ସାବିତ୍ରୀ କିରସାନି, ରମା କିରସାନି, ବବିତା ହନ୍ତାଳ ବୋଲି ଜଣାପଡିଥିବା ବେଳେ ଏଥିରେ ଜଣେ ଶିଶୁ ମଧ୍ୟ ରହିଥିବା ଜଣାପଡିଛି। ସେମିଲିଗୁଡା, କୋରାପୁଟ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି।
ମିଳିଥିବା ସୂଚନା ମୁତାବକ, ମୁଖିବିଡ଼ାଇ ଏବଂ ତେନ୍ତୁଳିପଦାର ଗ୍ରାମର ୮ଜଣ ଗ୍ରାମବାସୀ ଏକ ଦେଶୀ ଡଙ୍ଗାଯୋଗେ ପୋଡ଼ଗଡ଼ ଘାଟକୁ ଯାଉଥିଲେ। ହେଲେ ବାଟରେ ଡଙ୍ଗା ଭାରସାମ୍ୟ ହରାଇ ବୁଡ଼ିଯାଇଥିଲା। ସୂଚନା ଯୋଗ୍ୟ, ୨୦ ବର୍ଷ ତଳେ ରାଜପୁଟ ପଞ୍ଚାୟତ ମୁଖିବି ଗ୍ରାମ ନିକଟ କୋଲାବ ଜଳଭଣ୍ଡାରରେ ଏକ ଦେଶୀ ଡଙ୍ଗାବୁଡି ୭ଜଣଙ୍କ ମୃତ୍ୟୁ ଘଟିଥିଲା।