ବମ୍ବେ: ବଲିଉଡ୍ ଅଭିନେତା ଧର୍ମେନ୍ଦ୍ର ଦୁଇଟି ବିବାହ କରିଛନ୍ତି। ପ୍ରଥମ ପତ୍ନୀ ପ୍ରକାଶ କୌରଙ୍କଠାରୁ ତାଙ୍କର ଦୁଇ ପୁଅ ରହିଥିବା ବେଳେ ଦ୍ୱିତୀୟ ସ୍ତ୍ରୀ ହେମାମାଳିନୀ ଦୁଇ କନ୍ୟା ସନ୍ତାନର ଜନନୀ। ସମସ୍ତେ ଏବେ ବିବାହିତ। ବଡ଼ପୁଅ ତଥା ଅଭିନେତା ସନି ଦେଓଲ ପୂଜାଙ୍କୁ ବିବାହ କରିଛନ୍ତି। ସେହିଭଳି ସାନପୁଅ ବବି ଦେଓଲ ତାନ୍ୟାଙ୍କ ହାତ ଧରିଛନ୍ତି। ହେଲେ ଅନେକ ଏହା ଜାଣି ନ ଥିବେ କେବଳ ଧର୍ମେନ୍ଦ୍ରଙ୍କ ଜିଦ ପାଇଁ ଦୁଇପୁଅ ନିଜ ପ୍ରେମକୁ ଭୁଲିବାକୁ ବାଧ୍ୟ ହୋଇଥିଲେ। ନଚେତ ଏବେ ଦୁଇ ଅଭିନେତ୍ରୀ ତାଙ୍କ ଘରର ବୋହୂ ହୋଇଥାନ୍ତେ।
୧୯୮୪ରେ ସନି ଲଣ୍ଡନରେ ରହୁଥିବା ପୂଜା ଦେଓଲଙ୍କୁ ଲୁଚାଛପାରେ ବିବାହ କରିଥିଲେ। ଏହି ବିବାହ ନେଇ ସେତେବେଳେ ପରିବାରଲୋକଙ୍କୁ ଛାଡ଼ିଦେଲେ ବେଶ କମ୍ ଲୋକ ଜାଣିଥିଲେ। ତେବେ ବିବାହ ପୂର୍ବରୁ ସନି ଅମୃତା ସିଂହଙ୍କୁ ବହୁତ ଭଲ ପାଉଥିଲେ। ଉଭୟ ବିବାହ କରିବାକୁ ମଧ୍ୟ ଚାହୁଁଥିଲେ। ମାତ୍ର ଧର୍ମେନ୍ଦ୍ର ରୋକଠୋକ ମନା କରିଦେଇଥିଲେ। କୌଣସି ଅଭିନେତ୍ରୀଙ୍କୁ ଘରର ବୋହୂ କରିବେ ନାହିଁ ବୋଲି ସେ କହିଥିଲେ।
ସେହିଭଳି ବବି ୧୯୯୬ରେ ତାନ୍ୟାଙ୍କୁ ବିବାହ କରିଥିଲେ। ତାନ୍ୟା ଜଣେ ବ୍ୟବସାୟ ମହିଳା ଥିଲେ। ବିବାହ ପୂର୍ବରୁ ବବି ନୀଲମଙ୍କୁ ବିବାହ କରିବାକୁ ଚାହୁଁଥିଲେ। ନୀଲମ ତାଙ୍କ ଘରର ସମସ୍ତଙ୍କୁ ରାଜି କରି ନେଇଥିଲେ। ହେଲେ ବାପା ମନା କରିବା ଯୋଗୁ ବବି ବ୍ରେକ୍ଅପ୍ କରିନେଇଥିଲେ।
