ନିର୍ଦ୍ଦେଶକ ବିବେକ ଅଗ୍ନିହୋତ୍ରୀଙ୍କ ଫିଲ୍ମ‘ଦ କଶ୍ମୀର ଫାଇଲ୍ସ’ ବକ୍ସ ଅଫିସରେ ସମସ୍ତ ରେକର୍ଡ ଭାଙ୍ଗିଛି । ଫିଲ୍ମଟି ମାର୍ଚ୍ଚ ୧୧ରେ ରିଲିଜ୍ ହୋଇଥିବା ବେଳେ ଏହାକୁ ଦେଖିବାକୁ ଦର୍ଶକଙ୍କ ପ୍ରବଳ ଭିଡ ଜମୁଛି। ଖୁବ୍ଶୀଘ୍ର ୧୦୦ କୋଟି ଅତିକ୍ରମ କରିବ ବୋଲି ଜଣାପଡିଛି। ଫିଲ୍ମରେ ଅନୁପମ ଖେରଙ୍କ ଅଭିନୟକୁ ଦର୍ଶକ ଖୁବ ପ୍ରଶଂସା କରୁଛନ୍ତି। ଏଥିରେ ପଲ୍ଲବୀ ଯୋଶୀ, ଦର୍ଶନ କୁମାର, ଚିନ୍ମୟ ମଣ୍ଡଲେକର, ପୁନିତ ଇସର ପରି ବରିଷ୍ଠ କଳାକାର ପ୍ରଶଂସନୀୟ ଅଭିନୟ କରିଛନ୍ତି। କେବଳ ପ୍ର୍ରଶଂସକ ନୁହଁନ୍ତି, ସେଲିବ୍ରିଟିମାନେ ମଧ୍ୟ ଅନୁପମ ଖେରଙ୍କୁ ପ୍ରଶଂସା କରୁଛନ୍ତି। ନିକଟରେ ଅଭିନେତା ସନ୍ନି ଦେଓଲ ତାଙ୍କ ଟୁଇଟ୍ ମାଧ୍ୟମରେ ନିର୍ଦ୍ଦେଶକ ବିବେକ ଅଗ୍ନିହୋତ୍ରୀଙ୍କୁ ‘କଶ୍ମୀର ଫାଇଲ୍ସ’ର ସଫଳତା ପାଇଁ ଅଭିନନ୍ଦନ ଜଣାଇଛନ୍ତି। ସେ ଲେଖିଛନ୍ତି, ‘କଶ୍ମୀର ଫାଇଲ୍ସ’ଅସାଧାରଣ ସଫଳତା ପାଇଁ ମୋର ବନ୍ଧୁ ଅନୁପମ ଖେର ଏବଂ ବିବେକ ଅଗ୍ନିହୋତ୍ରୀଙ୍କୁ ଅଭିନନ୍ଦନ। ଏହି ଫିଲ୍ମ ବିଷୟରେ ଅନେକ ଭଲ କଥା ଶୁଣୁଛି ଏବଂ ଶୁଟିଂରୁ ସମୟ ବାହାର କରି ଶୀଘ୍ର ଫିଲ୍ମ ଦେଖିବି ବୋଲି ସେ କହିଛନ୍ତି।