ଗଦର ୨ର ଟ୍ରେଲର ଲଞ୍ଚ ଇଭେଣ୍ଟ ପୂର୍ବରୁ କାନ୍ଦିଲେ ସନ୍ନି ଦେଓଲ, ଲୁହ ପୋଛିଲେ ଅମିଶା ପଟେଲ…

ମୁମ୍ବାଇ: ଗଦର ୨ ଫିଲ୍ମର ଟ୍ରେଲର ରିଲିଜ ହୋଇଛି। ଆକ୍ସନ ଏବଂ ଡ୍ରାମାରେ ପରିପୂର୍ଣ୍ଣ କାହାଣୀକୁ ନେଇ ଦର୍ଶକମାନଙ୍କଠାରୁ ସକାରାତ୍ମକ ପ୍ରତିକ୍ରିୟା ମିଳିଛି। ଟ୍ରେଲର ଲଞ୍ଚ ଇଭେଣ୍ଟରେ ଫିଲ୍ମର ସମସ୍ତ ଷ୍ଟାରକାଷ୍ଟ ଉପସ୍ଥିତ ଥିଲେ। ସାକିନାଙ୍କ ଗେଟଅପରେ ଅମିଶା ଏବଂ ସନ୍ନି ତାରା ସିଂ ଭାବେ ନଜର ଆସିଥିଲେ। ଇଭେଣ୍ଟ ଆରମ୍ଭ ପୂର୍ବରୁ ମଞ୍ଚରେ ସନ୍ନି ଦେଓଲ ଭାବପ୍ରବଣ ହୋଇ ପଡ଼ିଥିଲେ। ଫିଲ୍ମ ପ୍ରତି ଲୋକଙ୍କ ଭଲପାଇବା ଦେଖି ସେ ଭାବପ୍ରବଣ ହୋଇ କାନ୍ଦି ପକାଇଥିଲେ।

ସେ ମଞ୍ଚକୁ ଆସିବା ମାତ୍ରେ ଟ୍ରେଲରର ପ୍ରଶଂସା ଆରମ୍ଭ ହୋଇଥିଲା। ଲୋକମାନେ ହିନ୍ଦୁସ୍ତାନ ଜିନ୍ଦବାଦର ସ୍ଲୋଗାନ ଦେବା ଆରମ୍ଭ କରିଥିଲେ। ମୁମ୍ବାଇରେ ପ୍ରବଳ ବର୍ଷା ମଧ୍ୟରେ ଟ୍ରେଲର ଲଞ୍ଚ ଇଭେଣ୍ଟକୁ ଦେଶର ବିଭିନ୍ନ ସ୍ଥାନରୁ ଆସିଥିବା ଖବରଦାତାମାନେ ଭିଡ଼ ଜମାଇଥିଲେ। ଏସବୁ ଦେଖି ସନ୍ନିଙ୍କ ଆଖି ଲୁହରେ ଭରିଯାଇଥିଲା । ଗଦର ପାଇଁ ଦର୍ଶକଙ୍କ ଅପାର ଭଲ ପାଇବା ଦେଖି ତାଙ୍କ ଆଖିରୁ ଲୁହ ବୋହିବାରେ ଲାଗିଥିଲା। ଅମିଶା ପଟେଲ ତାଙ୍କ କୋ-ଷ୍ଟାରଙ୍କ ଭାବନାକୁ ହୃଦୟଙ୍ଗମ କରି ବିଳମ୍ବ ନ କରି ସନ୍ନିଙ୍କ ଲୁହ ପୋଛି ଦେଇଥିଲେ ଏବଂ ତାଙ୍କୁ ସାହସ ଦେବା ସହ ସ୍ନେହରେ ଆଲିଙ୍ଗନ କରିଥିଲେ।

ସନ୍ନିଙ୍କ ପ୍ରତି ଅମିଶାଙ୍କର ଏହି ସୁନ୍ଦର ପ୍ରତିକ୍ରିୟା ଦେଖି ପ୍ରଶଂସକମାନେ ଅମିଶା ପଟେଲଙ୍କୁ ପ୍ରଶଂସା କରିବାରେ ଲାଗିଥିଲେ। ସେମାନେ ତାରା-ସାକିନାଙ୍କୁ ସର୍ବୋତ୍ତମ ଯୋଡି ବୋଲି ଉଲ୍ଲେଖ କରିଛନ୍ତି। ପ୍ରଶଂସକମାନେ କହିଛନ୍ତି ଗଦର ୨ ମଧ୍ୟ ଏହାର ପୂର୍ବ ସଂସ୍କରଣ ଫିଲ୍ମ ଭଳି ଏକ ବ୍ଲକବଷ୍ଟର ହେବ। ଗଦର ୨ ଆସନ୍ତା ମାସର ୧୧ ତାରିଖରେ ପ୍ରେକ୍ଷାଳୟରେ ମୁକ୍ତିଲାଭ କରିବାକୁ ଯାଉଛି। ଏହା ବକ୍ସ ଅଫିସରେ ଓଏମଜି-୨ ସହିତ ମଇଦାନକୁ ଓହ୍ଲାଇବ।