ଚେନ୍ନାଇ,୨୧।୪: କ୍ରମାଗତ ୩ ପରାଜୟ ପରେ ଉଦୟ ହୋଇଛି ସନରାଇଜର୍ସ ହାଇଦ୍ରାବାଦ୍ର ସୂର୍ଯ୍ୟ। ଦଳୀୟ ବୋଲର ଓ ବ୍ୟାଟ୍ସମ୍ୟାନଙ୍କ ଯୋଗୁ ଡେଭିଡ୍ ଓ୍ବାର୍ନରଙ୍କ ନେତୃତ୍ୱାଧୀନ ଦଳ ବୁଧବାର ପଏଣ୍ଟ ଖାତା ଖୋଲିବାକୁ ସକ୍ଷମ ହୋଇଛି। ଏଠାରେ ପଞ୍ଜାବ ବିପକ୍ଷ ମ୍ୟାଚ୍କୁ ୯ ଉଇକେଟରେ ଜିତି ନେଇଛି ହାଇଦ୍ରାବାଦ।
ଟସ୍କୁ ଛାଡ଼ି ଦେଲେ ପଞ୍ଜାବ କିଙ୍ଗ୍ସ ସପକ୍ଷରେ କିଛି ଯାଇ ନ ଥିଲା। ହାଇଦ୍ରାବାଦ୍ ବୋଲରମାନେ ପଞ୍ଜାବକୁ କ୍ରମାଗତ ବ୍ୟବଧାନରେ ଝଟ୍କା ଦେଇ ଚାଲିଥିଲେ। ଫଳରେ ୧୯.୪ ଓଭରରେ ୧୨୦ ରନ୍ରେ ସୀମିତ ରହିଥିଲା ଲୋକେଶ ରାହୁଲଙ୍କ ନେତୃତ୍ୱାଧୀନ ଦଳ। ଦଳର ୫ ଜଣ ବ୍ୟାଟ୍ସମ୍ୟାନ ଦୁଇ ଅଙ୍କ ଛୁଇଁଥିଲେ। ହେଲେ କେହି ବଡ଼ ସ୍କୋର କରିପାରି ନ ଥିଲେ। ସନରାଇଜର୍ସ ପାଇଁ ସଫଳ ବୋଲର ସାବ୍ୟସ୍ତ ହୋଇଥିଲେ ଖଲିଲ ଅହମ୍ମଦ (୩) ଓ ଅଭିଷେକ ଶର୍ମା (୨)। ସାମ୍ନାରେ ଛୋଟିଆ ସ୍କୋର ଥିବାରୁ ଧିମା ବ୍ୟାଟିଂ କରିଥିଲେ ଅଧିନାୟକ ଓ୍ବାର୍ନର ଓ ଜନ୍ନି ବେଆରଷ୍ଟୋଙ୍କ ଓପନିଂ ଯୋଡ଼ି। ଦୁହେଁ ପ୍ରଥମ ଉଇକେଟ ପାଇଁ ୭୩ ରନ୍ କରିଥିଲେ। ଓ୍ବାର୍ନର (୩୭) ଆଉଟ୍ ହେବା ପରେ ବେଆରଷ୍ଟୋ (୬୩ ରନ୍, ୩ ଲେଖାଏ ଚୌକା ଓ ଛକା) ଓ କେନ ଓ୍ବିଲିୟମସନ (୧୬) ଦଳକୁ ଜିତାଇ ଦେଇଥିଲେ।
