ନୂଆଦିଲ୍ଲୀ,୭।୪: ସନରାଇଜର୍ସ ହାଇଦ୍ରାବାଦ ପାଇଁ ଚଳିତ ଆଇପିଏଲ୍ ସିଜିନ୍ ଆରମ୍ଭ ଖରାପ ରହିଛି। ଦଳ ଲଗାତାର ୪ ମ୍ୟାଚ ହାରିଛି। ଟ୍ରାଭିସ ହେଡ, ଇଶାନ କିଷନ, ଅଭିଷେକ ଶର୍ମାଙ୍କଠାରୁ ଆରମ୍ଭ କରି ଦଳର ଶ୍ରେଷ୍ଠ ବ୍ୟାଟ୍ସମ୍ୟାନ୍ନେ ଗତ ୪ଟି ମ୍ୟାଚ୍ରେ ଫ୍ଲପ ହୋଇଛନ୍ତି। ଦଳର ମାଲିକାଣୀ କାବ୍ୟା ମାରାନ ମଧ୍ୟ ଏହି ପରାଜୟକୁ ସହଜେ ହଜମ କରିପାରୁନାହାନ୍ତି। ଦଳର ଏମିତି ପ୍ରଦର୍ଶନରେ ସେ ତାଙ୍କ କ୍ରୋଧକୁ ନିୟନ୍ତ୍ରଣ କରିପାରି ନାହାନ୍ତି।
ଗୁଜୁରାଟ ଟାଇଟାନ୍ସ ବିପକ୍ଷରେ ପ୍ରଥମେ ବ୍ୟାଟିଂ କରି ସନରାଇଜର୍ସ ହାଇଦ୍ରାବାଦ ପ୍ରଥମ ଓଭରରେ ହିଁ ନିଜର ପ୍ରଥମ ଉଇକେଟ ହରାଇଥିଲା। ଟ୍ରାଭିସ ହେଡ ୮ ରନ କରି ଆଉଟ ହୋଇଥିଲେ। ପଞ୍ଚମ ଓଭରରେ ୧୮ ରନ କରି ଅଭିଷେକ ଶର୍ମା ଆଉଟ ହୋଇଥିଲେ, ଉଭୟଙ୍କୁ ମହମ୍ମଦ ସିରାଜ ଆଉଟ କରିଥିଲେ। ପ୍ରଥମ ମ୍ୟାଚ୍ରେ ଶତକ ହାସଲ କରିଥିବା ଇଶାନ କିଷନ ପୁଣି ଥରେ ଫ୍ଲପ ହୋଇଥିଲେ। ସେ ୧୭ ରନ କରିବା ପରେ ପ୍ରସିଦ୍ଧ କ୍ରିଷ୍ଣାଙ୍କ ଦ୍ୱାରା କ୍ୟାଚ ଆଉଟ ହୋଇଥିଲେ। ଷ୍ଟାଣ୍ଡରେ ବସିଥିବା ଦଳର ମାଲିକାଣୀ କାବ୍ୟା ମାରାନ ପ୍ରତ୍ୟେକ ଉଇକେଟ ପତନ ସହ ରାଗିକି ନିଆଁବାଣ ହୋଇପଡ଼ୁଥିବା ଦେଖାଯାଇଥିଲା। ତାଙ୍କର ପ୍ରତିକ୍ରିୟା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ସନରାଇଜର୍ସ ହାଇଦ୍ରାବାଦ ପ୍ରଥମେ ବ୍ୟାଟିଂ କରି ମାତ୍ର ୧୫୨ ରନ କରିପାରିଥିଲା, ଗୁଜରାଟ ଟାଇଟାନ୍ସ ୧୭ତମ ଓଭରରେ ହିଁ ଏହି ଟାର୍ଗେଟ ହାସଲ କରି ଏକ ବଡ଼ ବିଜୟ ହାସଲ କରିଥିଲା। ଏହି ବିଜୟ ପରେ, ଗୁଜରାଟ ପଏଣ୍ଟ ଟେବୁଲରେ ଦ୍ୱିତୀୟ ସ୍ଥାନକୁ ଆସିଛି ଏବଂ ହାଇଦ୍ରାବାଦ ଦଶମ ସ୍ଥାନରେ ରହିଛି।
