ମୁମ୍ବାଇ, ୧୫।୪: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଶୁକ୍ରବାର ଅନୁଷ୍ଠିତ ମ୍ୟାଚରେ ସନ୍ରାଇଜର୍ସ ହାଇଦ୍ରାବାଦ ୭ ଉଇକେଟରେ କୋଲକାତା ନାଇଟ ରାଇଡର୍ସକୁ ପରାସ୍ତ କରିଛି। କୋଲକାତା ଦଳ ୨୦ ଓଭରରେ ୮ ଉଇକେଟ ହରାଇ ୧୭୫ ରନ କରିଥିଲା। ଜବାବରେ ସନ୍ରାଇଜର୍ସ ରାହୁଲ ତ୍ରିପାଠୀ ଓ ଏଡେନ ମାରକ୍ରାମଙ୍କ ଧୂଆଁଧାର ବ୍ୟାଟିଂ ବଳରେ ୧୭.୫ ଓଭରରେ ୩ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ହାଇଦ୍ରାବାଦ ମାତ୍ର ୩୯ ରନ ମଧ୍ୟରେ ୨ଟି ଉଇକେଟ ହରାଇ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟରେ ପଡ଼ିଥିଲା। ମାତ୍ର ରାହୁଲ ୩୭ ବଲ୍ରୁ ୪ ଚୌକା ଓ ୬ ଛକା ସହାୟତାରେ ୭୧ରନ କରି ଦଳକୁ ବିଜୟ ପଥରେ ନେଇ ଯାଇଥିଲେ। ପରେ ମାରକ୍ରାମ ୩୬ ବଲ୍ରୁ ୬ ଚୌକା ଓ ୪ ଛକା ସହାୟତାରେ ୬୮ ରନରେ ଅପରାଜିତ ରହି ଦଳକୁ ୧୩ଟି ବଲ୍ ପୂର୍ବରୁ ବିଜୟୀ କରାଇଥିଲେ। କୋଲକାତା ପକ୍ଷରୁ ଆନ୍ଦ୍ରେ ରସେଲ ୨ଟି ଓ ପ୍ୟାଟ୍ କୁମିନ୍ସ ଗୋଟିଏ ଉଇକେଟ ନେଇଥିଲେ। ପ୍ରଥମ ୨ଟି ମ୍ୟାଚ ହାରିବା ପରେ ପରବର୍ତ୍ତୀ ୩ ମ୍ୟାଚ ଜିତି ବିଜୟରେ ହ୍ୟାଟ୍ରିକ କରିଛି ସନ୍ରାଇଜର୍ସ। ଏଥିସହ ଦଳ ୫ ମ୍ୟାଚରୁ ୬ ପଏଣ୍ଟ ସହ ଟେବୁଲର ୭ମ ସ୍ଥାନକୁ ଉନ୍ନୀତ ହୋଇଛି।
ଚଳିତ ଆଇପିଏଲ୍ରେ ଚାଲିଥିବା ଧାରାକୁ ବଜାୟ ରଖି ସନ୍ରାଇଜର୍ସ ଟସ୍ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା। କୋଲକାତା ୭୦ ରନ ମଧ୍ୟରେ ୪ଟି ଉଇକେଟ ହରାଇ ବିପଦରେ ପଡ଼ିଥିଲା। ଭେଙ୍କଟେଶ ଆୟାର ୬, ଆରୋନ ଫିଞ୍ଚ୍ ୭, ସୁନୀଲ ନାରିନ ୬ ଓ ଅଧିନାୟକ ଶ୍ରେୟାସ ଆୟାର ୨୮ ରନକରି ପ୍ୟାଭିଲିୟନ ଫେରିଥିଲେ। ମଧ୍ୟଭାଗରେ ଶେଲଡନ ଜ୍ୟାକ୍ସନ ମାତ୍ର ୬ ରନରେ ଆଉଟ ହୋଇଥିଲେ ହେଁ ରାଣା ଓ ରସେଲ ଲଢ଼ୁଆ ବ୍ୟାଟିଂ କରି ଦଳକୁ ସମ୍ମାନଜନକ ସ୍କୋରରେ ପହଞ୍ଚାଇଥିଲେ। ୩୬ଟି ବଲ୍ର ସମ୍ମୁଖୀନ ହୋଇଥିବା ରାଣା ୬ ଚୌକା ଓ ୨ ଛକା ସହାୟତାରେ ସର୍ବାଧିକ ୫୪ ରନ କରିଥିବାବେଳେ ରସେଲ ୨୫ ବଲ୍ରୁ ୪ଟି ଲେଖାଏ ଚୌକା ଓ ଛକା ସହ ୪୯ ରନରେ ଅପରାଜିତ ରହିଥିଲେ। ଶେଷଭାଗରେ ପ୍ୟାଟ୍ କୁମିନ୍ସ ୩ ଓ ଅମନ ହାକିମ ଖାଁ ୫ ରନ କରିବାକୁ ସକ୍ଷମ ହୋଇଥିଲେ। ହାଇଦ୍ରାବାଦ ବୋଲରଙ୍କ ମଧ୍ୟରେ ଟି. ନଟରାଜନ ସର୍ବାଧିକ ୩ଟି, ଉମ୍ରାନ ମଲିକ ୨ଟି ଏବଂ ଭୁବନେଶ୍ୱର କୁମାର, ମାର୍କୋ ଜାନସେନ ଓ ଜଗଦୀଶ ସୁଚିଥ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
କୋଲକାତା ନାଇଟ ରାଇଡର୍ସ ୨୦ ଓଭରରେ ୧୭୫/୮ (ନୀତୀଶ ରାଣା-୫୪, ଆନ୍ଦ୍ରେ ରସେଲ-୪୯*, ଟି. ନଟରାଜନ-୩/୩୭, ଉମ୍ରାନ ମଲିକ-୨/୨୭, ଭୁବନେଶ୍ୱର କୁମାର-୧/୩୭, ମାର୍କୋ ଜାନସେନ-୧/୨୬, ଜଗଦୀଶ ସୁଚିଥ-୧/୩୨)। ସନ୍ରାଇଜର୍ସ ହାଇଦ୍ରାବାଦ ୧୭.୫ ଓଭରରେ ୧୭୬/୩ (ରାହୁଲ ତ୍ରିପାଠୀ-୭୧, ଏଡେନ ମାରକ୍ରାମ-୬୮*, ଆନ୍ଦ୍ରେ ରସେଲ-୨/୨୦, ପ୍ୟାଟ୍ କୁମିନ୍ସ-୪୦)।
