ବାରିପଦା ଅଫିସ,୧ା୧୦: ମୟୂରଭଞ୍ଜ ଜିଲା ଚାନ୍ଦୁଆ ଥାନା ଅଞ୍ଚଳର ସୁବର୍ଣ୍ଣରେଖା ମୁଖ୍ୟ କେନାଲରୁ ଏକ ଅଖା ବସ୍ତାରୁ ଜଣେ ବ୍ୟକ୍ତିଙ୍କ ମୃତଦେହ ମିଳିବା ଘଟଣାର ପୋଲିସ ପର୍ଦ୍ଦାଫାଶ କରିଛି। ଏହି ହତ୍ୟାକାଣ୍ଡରେ ସମ୍ପୃକ୍ତ ୭ ଅଭିଯୁକ୍ତଙ୍କୁ ପୋଲିସ ଗିରଫ କରି ଶୁକ୍ରବାର କୋର୍ଟଚାଲାଣ କରିଛି। ଅଭିଯୁକ୍ତମାନେ ହେଲେ କୋଠାବିଲା ଗ୍ରାମର ଶଙ୍ଖ ମୁର୍ମୁ(୪୫), ଟିବୁ ଟୁଡୁ(୪୦), କୁନା ମୁର୍ମୁ(୩୦), ଘନ ମୁର୍ମୁ(୪୦), ବୃନ୍ଦାବନ ସୋରେନ(୪୫), ରଞ୍ଜନ ମୁର୍ମୁ(୬୦) ଓ ବସଲା ସୋରେନ(୪୫)। ଅନ୍ଧବିଶ୍ୱାସ ଓ ଗୁଣିଗାରେଡ଼ିକୁ ନେଇ ଏଭଳି ହତ୍ୟାକାଣ୍ଡ ଘଟିଥିବା ଶୁକ୍ରବାର ବାରିପଦା ଏସ୍ଡିପିଓ ପ୍ରକାଶ ଜେମ୍ସ ଟପୋ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି।
ଏହି ଥାନା ଅଧୀନ ନୋଧବଣି ଗ୍ରାମ ନିକଟସ୍ଥ ସୁବର୍ଣ୍ଣରେଖା ମୁଖ୍ୟ କେନାଲରେ ଏକ ଧଳା ରଙ୍ଗର ମୁହଁ ବନ୍ଦ ଅଖା ଦୁଇ ତିନିଦିନ ଧରି ଭାସିବା ପରେ ଦୁର୍ଗନ୍ଧ ବାହାରୁଥିବା ଦେଖି ଗତ ୨୧ ତାରିଖରେ ଗ୍ରାମବାସୀ ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଦମକଳ ବାହିନୀ ସହାୟତାରେ ଅଖାବୁରାକୁ ଆଣି ଖୋଲିବା ପରେ ଜଣେ ଅଚିହ୍ନା ବ୍ୟକ୍ତିଙ୍କ ଗଳିତ ମୃତଦେହ ଜବତ କରିଥିଲା। ଏନେଇ ଏକ ଅପମୃତ୍ୟୁ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଥିଲା। ୨୭ ତାରିଖରେ ମୃତକଙ୍କ ପରିବାର ଲୋକେ ଥାନାରେ ପହଞ୍ଚି ନିଖୋଜ ଅଭିଯୋଗ କରିବା ପରେ କଥାବିଲା ଗ୍ରାମର ପାଣ୍ଡୁ ମୁଣ୍ଡା ବୋଲି ପୋଲିସ ଜାଣିବାକୁ ପାଇଥିଲା। ଘଟଣା ଦିନ ପାଣ୍ଡୁ ନିକଟସ୍ଥ ଗ୍ରାମରୁ ଫୁଟ୍ବଲ ଖେଳ ଦେଖି ଫେରୁଥିବା ସମୟରେ ଅଭିଯୁକ୍ତମାନେ ମିଳିତ ଭାବେ ତାଙ୍କୁ ଅଟକାଇ ଆକ୍ରମଣ କରିଥିଲେ। ବେକରେ ପଡ଼ିଥିବା ଏକ ଗାମୁଛାରେ ତାଙ୍କ ତଣ୍ଟି ଚିପି ହତ୍ୟା କରିବା ପରେ ପ୍ରମାଣ ନଷ୍ଟ ପାଇଁ ଅଖାବୁରାରେ ଭର୍ତ୍ତି କରି କେନାଲକୁ ଫିଙ୍ଗି ଦେଇଥିଲେ। ଗ୍ରାମରେ ଝଡ଼ାଫୁଙ୍କା କରୁଥିବା ପାଣ୍ଡୁ ଉପରେ ଅବିଶ୍ୱାସ ଘେରିଯାଇଥିଲା। ଗ୍ରାମରେ ଏକ ପୂଜାପାଠ କରିବା ପାଇଁ ସମସ୍ତେ ଏକଜୁଟ ହୋଇ ପାଣ୍ଡୁକୁ ଡାକିଥିଲେ। ପାଣ୍ଡୁ ସେଠାକୁ ନ ଯାଇ ଫୁଟ୍ବଲ ଖେଳ ଦେଖିବାକୁ ପଳାଇଥିଲେ। ସନ୍ଧ୍ୟାରେ ଘରକୁ ଫେରୁଥିବା ବେଳେ ବାଟରେ ତାଙ୍କୁ ସେମାନେ ଆକ୍ରମଣ କରିଥିଲେ। ଥାନାଧିକାରୀ କୁନି ବେଶ୍ରା ଘଟଣାର ତଦନ୍ତ କରି ସମସ୍ତ ଅଭିଯୁକ୍ତଙ୍କୁ ଗିରଫ କରିବା ପରେ ସେମାନେ ଏନେଇ ସ୍ବୀକାର କରିଛନ୍ତି।
