ଯାଜପୁର ଅଫିସ: ଭାରତୀୟ ରେଳବାଇର ଅକ୍ସିଜେନ୍ ଏକ୍ସପ୍ରେସ୍ ଜରିଆରେ ରବିବାରଠାରୁ ଟାଟା ଷ୍ଟିଲ୍ କଳିଙ୍ଗନଗର କାରଖାନାରୁ ଲିକ୍ବିଡ୍ ମେଡିକାଲ୍ ଅକ୍ସିଜେନ୍ (ଏଲ୍ଏମ୍ଓ) ଯୋଗାଣ ଆରମ୍ଭ ହୋଇଛି। ୭ କ୍ରାୟୋଜେନିକ୍ କନେର୍ ଥିବା ଏହି ଅକ୍ସିଜେନ୍ ଟ୍ରେନ୍ ଓଡ଼ିଶାର ଯାଜପୁର ଜିଲାର କଳିଙ୍ଗନଗରରୁ ଦିଲ୍ଲୀକୁ ୧୩୨ ଟନ୍ ଲିକ୍ବିଡ ମେଡିକାଲ୍ ଅକ୍ସିଜେନ୍ ନେଇ ଯାତ୍ରା କରିଛି। ଟାଟା ଷ୍ଟିଲ୍ର କଳିଙ୍ଗନଗର କାରଖାନାରୁ ଏଲ୍ଏମ୍ଓ ପରିବହନ କରିଥିବା ଏହା ପ୍ରଥମ ଅକ୍ସିଜେନ୍ ଏକ୍ସପ୍ରେସ୍। ଟାଟା ଷ୍ଟିଲ୍ର କଳିଙ୍ଗନଗର କାରଖାନା ଓଡ଼ିଶା ସମେତ ଭାରତର ବିଭିନ୍ନ ରାଜ୍ୟକୁ ସଡ଼କ ପଥରେ ୩୬୩୦ ଟନ୍ ଲିକ୍ବିଡ୍ ଅକ୍ସିଜେନ୍ ପଠାଇ ସାରିଲାଣି। ଦେଶରେ ଦେଖାଦେଇଥିବା କୋଭିଡ୍-୧୯ର ଦ୍ୱିତୀୟ ଲହରରେ ମେଡିକାଲ୍ ଅକ୍ସିଜେନ୍ ପରିବହନ ଆହ୍ବାନକୁ ଦୃଷ୍ଟିରେ ରଖି ଦେଶର ଗୋଟିଏ ପ୍ରାନ୍ତରୁ ଅନ୍ୟ ପ୍ରାନ୍ତକୁ ଶୀଘ୍ର ଓ ସମୟୋପଯୋଗୀ ଭାବେ ମେଡିକାଲ୍ ଅକ୍ସିଜେନ୍ ଯୋଗାଣକୁ ନିଶ୍ଚିତ କରିବା ଲାଗି ଭାରତୀୟ ରେଳ ପକ୍ଷରୁ ଅକ୍ସିଜେନ୍ ଏକ୍ସପ୍ରେସ୍ ଅଭିଯାନର ଶୁଭାରମ୍ଭ କରାଯାଇଛି। ଏହି ଜାତୀୟ ଜରୁରିକାଳୀନ ସ୍ଥିତିରେ ଟାଟା ଷ୍ଟିଲ୍ ପକ୍ଷରୁ ଏହାର ଜାମ୍ସେଦପୁର, କଳିଙ୍ଗନଗର ଓ ଢେଙ୍କାନାଳରେ ଥିବା ଉପତ୍ାଦନ ୟୁନିଟ୍ରୁ ଦୈନିକ ଲିକ୍ବିଡ୍ ମେଡିକାଲ୍ ଅକ୍ସିଜେନ୍ ଉତ୍ତରପ୍ରଦେଶ, ମଧ୍ୟପ୍ରଦେଶ, ଆନ୍ଧ୍ରପ୍ରଦେଶ, ତେଲଙ୍ଗାନା, ଝାଡ଼ଖଣ୍ଡ, ଓଡ଼ିଶା, ବିହାର, ପଶ୍ଚିମବଙ୍ଗ, ହରିୟାଣା ଓ ଦିଲ୍ଲୀକୁ ଯୋଗାଇ ଦିଆଯାଇଛି। ୨୦୨୧ ମେ ୮ରେ କମ୍ପାନୀ ତରଫରୁ ଏହାର ବିଭିନ୍ନ କାରଖାନାରୁ ୧୩୦୦ରୁ ଅଧିକ ଟନ୍ର ଏଲ୍ଏମ୍ଓ ଯୋଗାଇ ଦିଆଯାଇଥିଲା।