ବରଗଡ଼ ଅଫିସ୍,୨୦।୪: ହନୁମାନ ଜୟନ୍ତୀ ଶୋଭାଯାତ୍ରାବେଳେ ସମ୍ବଲପୁରରେ ହୋଇଥିବା ହିଂସା ପ୍ରତିବାଦରେ ବିଶ୍ୱ ହିନ୍ଦୁ ପରିଷଦ, ବଜରଙ୍ଗ ଦଳ ଏବଂ ଅନ୍ୟ ହିନ୍ଦୁ ସଂଗଠନଗୁଡ଼ିକ ବୁଧବାର ୧୨ଘଣ୍ଟିଆ(ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ) ଶାନ୍ତିପୂର୍ଣ୍ଣ ବନ୍ଦ ଡାକରା ଦେଇଥିଲେ। ଏହାକୁ ବରଗଡ଼ ଜିଲାର ସୋହେଲା ଏବଂ ଅମ୍ବାଭୋନା ବ୍ଳକ ଭୁକ୍ତା ବ୍ୟତୀତ ଅନ୍ୟ ସବୁଠି ସ୍ବତଃସ୍ପୂର୍ତ୍ତ ସମର୍ଥନ ମିଳିଛି। ସକାଳୁ ଦୋକାନ, ବଜାର ଖୋଲି ନଥିବାବେଳେ ଗାଡ଼ି ଚଳାଚଳ ବନ୍ଦ ରହିଥିଲା। ଫଳରେ ରାସ୍ତାଘାଟ ଶୂନଶାନ ହୋଇଯାଇଥିଲା। ସେହିବରି ବରଗଡ଼ କଚେରୀ ବ୍ୟତୀତ ଅନ୍ୟ ସରକାରୀ, ବେସରକାରୀ ଦପ୍ତର, ସ୍କୁଲ, କଲେଜ ମଧ୍ୟ ବନ୍ଦ ରହିଥିଲା। ଗାଡ଼ି ଚଳାଚଳ ବନ୍ଦ ଯୋଗୁ ଜୀବନଯାତ୍ରା ବ୍ୟାହତ ହୋଇଥିବାବେଳେ କାର୍ଯ୍ୟାଳୟ ବନ୍ଦ ଯୋଗୁ ସରକାରୀ, ବେସରକାରୀ ଅନୁଷ୍ଠାନ କାର୍ଯ୍ୟ ବ୍ୟାହତ ହୋଇଥିଲା।
ସକାଳୁ ବିଶ୍ୱ ହିନ୍ଦୁ ପରିଷଦ, ବଜରଙ୍ଗ ଦଳ ସମେତ ବିଭିନ୍ନ ହିନ୍ଦୁ ସଂଗଠନର କାର୍ଯ୍ୟକର୍ତ୍ତା, ସଦସ୍ୟବୃନ୍ଦ ବରଗଡ଼ ସହର ଗାନ୍ଧିଛକରେ ପହଞ୍ଚିଥିଲେ। ସେଠାରେ ସହର ମୁଖ୍ୟରାସ୍ତା ଉପରେ ବସିଥିଲେ। ଫଳରେ ରାସ୍ତା ଅବରୋଧ ହୋଇଯାଇଥିଲା। ସେହିପରି ରାସ୍ତା ଉପରେ ଟାୟାର ଜଳାପୋଡ଼ା ମଧ୍ୟ ଦେଖିବାକୁ ମିଳିଥିବାବେଳେ ବାଇକ୍ ଯୋଗେ ପିକେଟିଂ କରୁଥିବା ପରିଲକ୍ଷିତ ହୋଇଥିଲା। ନିଧୁବନ ବିହାରୀ ପ୍ରସାଦ ପଣ୍ଡା, ଆଶୁତୋଷ ରଥ, ସଞ୍ଜୀବ ମେହେର, ଟିକୁ ବନଛୋର ପ୍ରମୁଖ ନେତୃତ୍ୱ ନେଇଥିବାବେଳେ ବିଶ୍ୱ ହିନ୍ଦୁ ପରିଷଦ, ବଜରଙ୍ଗ ଦଳ ସମେତ ବିଭିନ୍ନ ହିନ୍ଦୁ ସଂଗଠନର ଶତାଧିକ ସଦସ୍ୟ ସାମିଲ ଥିଲେ ।
ପଦ୍ମପୁରରେ ବନ୍ଦ ପାଳନ ସଫଳ ହୋଇଛି । ଭେଉଁରିଆ ଛକ ସମେତ ବିଭିନ୍ନ ସ୍ଥାନରେ ହିନ୍ଦୁ ସଂଗଠନର କର୍ମୀମାନେ ରାସ୍ତା ଉପରେ ବସିଥିଲେ । ପାଇକମାଳ ଏବଂ ଝାରବନ୍ଧରେ ଦୋକାନ, ବଜାର, ସରକାରୀ, ବେସରକାରୀ ଅନୁଷ୍ଠାନ ବନ୍ଦ ରହିଥିଲା। ସେହିପରି ଗାଡ଼ି ଚଳାଚଳ ବନ୍ଦ ଥିଲା । ତେବେ ସୋହେଲାରେ ବନ୍ଦର ପ୍ରଭାବ ପଡ଼ି ନଥିଲା। ଦୋକାନ, ବଜାର, ସରକାରୀ, ବେସରକାରୀ ଅନୁଷ୍ଠାନ ଗୁଡ଼ିକ ଖୋଲାଥିଲା। ତେବେ ସୋହେଲା ଦେଇ କମ୍ ସଂଖ୍ୟକ ଗାଡ଼ି ଚଳାଚଳ କରୁଥିଲା। ଗାଇସିଲେଟ, ବରପାଲି, ଅତାବିରା ବ୍ଲକରେ ମଧ୍ୟ ଦୋକାନ, ବଜାର ସମେତ ସରକାରୀ, ବେସରକାରୀ ଅନୁଷ୍ଠାନ ବନ୍ଦ ରହିଥିଲା। ଭଟଲିରେ ମଧ୍ୟ ବନ୍ଦ ଅନୁଭୂତ ହୋଇଥିଲା। ଗୋଡ଼ଭଗାରେ ଭାଜପା ଜିଲା ସାଧାରଣ ସମ୍ପାଦକ କୁଶ କୁମ୍ଭାର, ପ୍ରହଲ୍ଲାଦ ଉର୍ମା, ବିଦ୍ୟା ପ୍ରଧାନ, ରାଜ ଅଗ୍ରୱାଲ, ସୌରଭ ଭୋଇ, ବିଶ୍ୱ ହିନ୍ଦୁ ପରିଷଦ ଅତାବିରା ସଭାପତି ଭୁବନେଶ୍ୱର ମହାକୁର, ଜିଲା ସହ ସମ୍ପାଦକ ନିତ୍ୟାନନ୍ଦ ନାୟକ, ଚନ୍ଦ୍ରଶେଖର ପ୍ରଧାନ ଏବଂ ଅତାବିରାରେ ବଜରଙ୍ଗ ଦଳର ପରମେଶ୍ୱର ପଟେଲ, ଅଶ୍ୱିନୀ ମେହେର, ଭାଜପା ନଗର ସଭାପତି ସୁରେନ୍ଦ୍ର ସୱାଇଁ, ରାଜ୍ୟ କୃଷକ ସଂଗଠନ ସଭାପତି ବୀରେନ୍ଦ୍ର କର ବନ୍ଦ ପାଳନରେ ଯୋଗଦେଇଥିଲେ l ତେବେ ଅମ୍ବାଭୋନା ବ୍ଲକର ଅମ୍ବାଭୋନାରେ ଦୋକାନ ବଜାର ବନ୍ଦ ଥିବାବେଳେ ଏହି ବ୍ଲକର ଭୁକ୍ତାରେ ବନ୍ଦର ପ୍ରଭାବ ପଡ଼ି ନ ଥିଲା ।