କାଳିଆପାଣି,୨୩ା୧୨(ଡି.ଏନ.ଏ.): ସୁକିନ୍ଦା ତହସିଲ ଅଧୀନ ଟାଟାଷ୍ଟିଲ ମାଇନିଂ ଲିମିଟେଡ୍ର କମର୍ଦା ଓ ସାରୁଆବିଲ ଖଣିର ପରିବେଶ ମଞ୍ଜୁରୀ ପାଇଁ ବୁଧବାର ଏକ ଜନଶୁଣାଣି ଶିବିରି ଅନୁଷ୍ଠିତ ହୋଇଯାଇଛି। ସାରୁଆବିଲ ଗ୍ରାମ ଖେଳପଡ଼ିଆରେ ଅନୁଷ୍ଠିତ ଶିବିରରେ ଅଞ୍ଚଳ ଲୋକେ ଯୋଗଦେଇ ବିଭିନ୍ନ ଦାବି ରଖିବା ସହ ଏହାକୁ ବହୁମତରେ ସମର୍ଥନ କରିଛନ୍ତି। ବହୁ କମ୍ ଲୋକ ଏହାକୁ ବିରୋଧ କରିଛନ୍ତି। ପୂର୍ବାହ୍ନ ୧୧ଟାରେ ଜନଶୁଣାଣିର ପ୍ରଥମ ଅଧିବେଶନ ଅନୁଷ୍ଠିତ ହୋଇଥିଲା। ଏଥିରେ ସାରୁଆବିଲ ଖଣି ପାଇଁ ଆବଶ୍ୟକ ପରିବେଶ ମଞ୍ଜୁରୀ ଲାଗି କମର୍ଦା, ତୈଳଙ୍ଗୀ ଓ ସାରୁଆବିଲ ଗ୍ରାମର ଲୋକେ ଯୋଗଦେଇ ନିଜମତ ରଖିଥିଲେ। କମର୍ଦା, ସରୁଆବିଲ ଓ ତୈଳଙ୍ଗୀ ଗ୍ରାମର ୨୪୬.୮୫୮ ହେକ୍ଟର ପରିମିତ ଖଣି ଅଞ୍ଚଳ ପାଇଁ ପରିବେଶ ମଞ୍ଜୁର ନିମନ୍ତେ ଏହି ଜନଶୁଣାଣି ଅନୁଷ୍ଠିତ ହୋଇଥିଲା। ଏଥିରେ ୧୫୨ ଜଣ ନିଜ ମତ ରଖିଥିଲେ।
ସେହିପରି ଅପରାହ୍ନରେ କମର୍ଦା ଖଣି ନିମନ୍ତେ କମର୍ଦା, ତୈଳଙ୍ଗୀ, ସାରୁଆବିଲ ଓ ବାଲିପଦା ଗଁାର ୧୦୭.୨୪୦ ହେକ୍ଟର ଜମି ଅଧିଗ୍ରହଣ ପାଇଁ ଆୟୋଜିତ ଜନଶୁଣାଣିରେ ୩୧୪ ଜଣ ଯୋଗଦେଇ ଦେଇଥିଲେ। ଏହି ୨ ଖଣିର ଜନଶୁଣାଣିରେ ମୋଟ୍ ୪୬୬ ଲୋକ ନିଜ ମତାମତ ଦେଇଥିବାବେଳେ ୨୦ ଜଣ ବିସ୍ଥାପିତ ଭୟରେ ବିରୋଧ କରିଥିଲେ। କାର୍ଯ୍ୟକ୍ରମକୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଯାଜପୁର ଜିଲା ଆଞ୍ଚଳିକ ଅଧିକାରୀ ପ୍ରମୋଦ ବେହେରା ପରିଚାଳନା କରିଥିଲେ। କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ର ଉପସ୍ଥିତ ଥିଲେ। ଏଥିରେ ସାରୁଆବିଲ ଖଣି ସହ ପରିଚାଳକ ଦ୍ୱିବେନ୍ଦୁ ବେହେରା ଖଣି ପାଇଁ ଆବଶ୍ୟକ ପରିବେଶ ମଞ୍ଜୁରୀ ସମ୍ବନ୍ଧୀୟ ତଥ୍ୟ ଉପସ୍ଥାପନ କରିଥିଲେ। ଜନଶୁଣାଣିକୁ ପ୍ରଶାସନିକ ଅଧିକାରୀ ଦିବ୍ୟଲୋଚନ ମହାପାତ୍ର, ମଦନମୋହନ ମୁର୍ମୁ, ମଦନମୋହନ ସାହୁ, ରବୀନ୍ଦ୍ର କୁମାର ଦାସ ଓ ସୌମ୍ୟେନ୍ଦ୍ର ସାହୁ ପରିଚାଳନା କରିଥିଲେ। ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି କଳିଙ୍ଗନଗର ଅତିରିକ୍ତ ଆରକ୍ଷୀ ଅଧୀକ୍ଷକ ସିଲଭେରିୟସ ଟପୋଙ୍କ ନେତୃତ୍ୱରେ ସୁକିନ୍ଦା ଭାରପ୍ରାପ୍ତ ତହସିଲଦାର ନାରାୟଣ ଦୀକ୍ଷିତ, କାଳିଆପାଣି ଥାନା ଅଧିକାରୀ ସୁଶାନ୍ତ କୁମାର ଦାସ, ସୁକିନ୍ଦା ଥାନା ଅଧିକାରୀ ଶିବଚରଣ ବେହେରାଙ୍କ ସମେତ ଏକ ପ୍ଲାଟୁନ ଫୋର୍ସ ସହ ମୁତୟନ ହୋଇଥିଲେ। କମ୍ପାନୀ ଜିଏମ୍ ସୁଶାନ୍ତ କୁମାର ମିଶ୍ର ଲୋକଙ୍କ ଦାବି ପର୍ଯ୍ୟାୟକ୍ରମେ ପୂରଣ କରିବାକୁ ପ୍ରତିଶ୍ରୁତି ଦେଇଥିଲେ। କାର୍ଯ୍ୟକ୍ରମ ପରିଚାଳନାରେ କମ୍ପାନୀ ଏଜିଏମ୍ ଗୌତମ ଚକ୍ରବର୍ତ୍ତୀଙ୍କ ସମେତ ଅନ୍ୟମାନେ ସହଯୋଗ କରିଥିଲେ।