ଚେନ୍ନାଇ, ୧୨ା୭: ଏଆଇଏଡିଏମ୍କେ ସାଧାରଣ ପରିଷଦ ବୈଠକରେ ଦଳର ସାଧାରଣ ସମ୍ପାଦକ ନିଯୁକ୍ତ ହେବା ପରେ ପାଲାନିସ୍ବାମୀ ଓପିଏସ୍ଙ୍କୁ ଟାର୍ଗେଟ କରିଥିଲେ। ଇପିଏସ୍ କହିଥିଲେ, ପନିରସେଲଭମ୍ ସର୍ବଦା ଦଳ ପାଇଁ ତ୍ୟାଗ କରିଥିବା ପ୍ରଚାର କରୁଛନ୍ତି। କିନ୍ତୁ ସେ କ’ଣ କରିଛନ୍ତି। ପାର୍ଟି ପାଇଁ ଆମେ ହିଁ ବଳିଦାନ ଦେଇଛୁ ବୋଲି ଇପିଏସ୍ କହିଥିଲେ। ପାଲାନିସ୍ବାମୀଙ୍କ ଏହି ମନ୍ତବ୍ୟକୁ ନେଇ ଦୁଇ ନେତାଙ୍କ ସମର୍ଥକ ମୁହାଁମୁହିଁ ହୋଇଥିଲେ। ରୋୟାପେଟ୍ଟା ସ୍ଥିତ ଦଳୀୟ କାର୍ଯ୍ୟାଳୟ ମଧ୍ୟକୁ ପଶି ସେମାନେ ଭଙ୍ଗାରୁଜା କରିବା ସହ ପରସ୍ପର ଉପରକୁ ଚେୟାର, ଢେଲାମାଡ଼ କରିଥିଲେ। ଏଥିରେ ଓପିଏସ୍ଙ୍କ ସମର୍ଥକ ତଥା କୋଲଥପୁର ଜିଲା ସମ୍ପାଦକ କ୍ରିଷ୍ଣାମୂର୍ତ୍ତିଙ୍କ ସମେତ ଅନେକ ଆହତ ହୋଇଛନ୍ତି। ଉଭୟଙ୍କ ସମର୍ଥକ ସେଠାରେ ପୋଷ୍ଟର, ବ୍ୟାନର ଆଦି ଚିରିବା ସହ ସେଥିରେ ନିଆଁ ଲଗାଇ ଦେଇଥିଲେ। ଘଟଣାସ୍ଥଳରେ ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲା। ଆଇନଶୃଙ୍ଖଳା ଦୃଷ୍ଟିରୁ ସ୍ଥାନୀୟ ପ୍ରଶାସନ ଏଆଇଏଡିଏମ୍କେ ମୁଖ୍ୟାଳୟକୁ ସିଲ୍ କରିଛି।