ନୂଆଦିଲ୍ଲୀ,୯।୧ : ଗୁଜରାଟ ଏବଂ ଉତ୍ତରାଖଣ୍ଡରେ ୟୁନିଫର୍ମ ସିଭିଲ କୋଡ ଯାଞ୍ଚ କରିବାକୁ କମିଟି ଗଠନକୁ ସୁପ୍ରିମକୋର୍ଟ ସବୁଜ ସଙ୍କେତ ଦେଇଛନ୍ତି। ଏହି ପ୍ରସଙ୍ଗରେ ସୁପ୍ରିମକୋର୍ଟ ଏକ ବଡ଼ ମନ୍ତବ୍ୟ ଦେଇଛନ୍ତି। ୟୁନିଫର୍ମ ସିଭିଲ କୋଡର ଯାଞ୍ଚ ପାଇଁ ରାଜ୍ୟ ସରକାରଙ୍କ ଅଧୀନରେ ଏହି କମିଟି ଗଠନ କରାଯିବା ଉଚିତ। କମିଟି ଗଠନକୁ କୋର୍ଟରେ ଚ୍ୟାଲେଞ୍ଜ କରିବା ପାଇଁ ଆଧାର ନୁହେଁ। ଗୁଜରାଟ ଏବଂ ଉତ୍ତରାଖଣ୍ଡ ସରକାରଙ୍କ ଦ୍ୱାରା ୟୁସିସିର କାର୍ଯ୍ୟକାରିତାକୁ ଯାଞ୍ଚ କରିବା ପାଇଁ ଏକ କମିଟି ଗଠନ ବିରୋଧରେ ଆବେଦନ ଶୁଣାଣି କରିବାକୁ ସୁପ୍ରିମକୋର୍ଟ ମନା କରି ଦେଇଛନ୍ତି।
ଏହି ଶୁଣାଣି ସମୟରେ ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଜଷ୍ଟିସ ପିଏସ ନରସିଂହଙ୍କ ବେଞ୍ଚ କହିଛନ୍ତି ଯେ ସେମାନେ ଧାରା ୧୬୨ ଅନୁଯାୟୀ କାର୍ଯ୍ୟନିର୍ବାହୀ କ୍ଷମତା ଅଧୀନରେ ଏକ କମିଟି ଗଠନ କରିଛନ୍ତି। ଏଥିରେ କ’ଣ ଭୁଲ ଅଛି? ଆପଣ ଆବେଦନକୁ ପ୍ରତ୍ୟାହାର କରନ୍ତୁ କିମ୍ବା ଆମେ ଏହାକୁ ଖାରଜ କରିବୁ। କେବଳ କମିଟି ଗଠନ ଉପରେ ଏହା ସମ୍ବିଧାନର ବିରୋଧୀ ବୋଲି ଏକ ପିଟିଶନ ଦାଖଲ କରାଯାଇପାରିବ ନାହିଁ। ଏହି ମାମଲାରେ ଆବେଦନକାରୀ ଆବେଦନ ପ୍ରତ୍ୟାହାର କରିନେଇଛନ୍ତି।