ନୂଆଦିଲ୍ଲୀ, ୭।୧୧(ପି.ଟି.):ରିପବ୍ଲିକାନ ଟିଭିର ସମ୍ପାଦକ ଅର୍ଣ୍ଣବ ଗୋସ୍ବାମୀ ବିଧାନସଭା ନୋଟିସକୁ ସୁପ୍ରିମକୋର୍ଟଙ୍କୁ ହସ୍ତାନ୍ତର କରି ଗୋପନୀୟତା ଉଲ୍ଲଂଘନ କରିଥିବା ଅଭିଯୋଗରେ ମହାରାଷ୍ଟ୍ର ବିଧାନସଭା ସଚିବ ତାଙ୍କୁ ଚେତାବନୀ ଦେଇ ପତ୍ର ଲେଖିଥିଲେ। ଏଥିପାଇଁ ତାଙ୍କ ବିରୋଧରେ କ’ଣ ପାଇଁ ଅଦାଲତ ଅବମାନନା ମକଦ୍ଦମା ନ ଚାଲିବ ୨ ସପ୍ତାହ ମଧ୍ୟରେ ସ୍ପଷ୍ଟୀକରଣ ଦେବା ପାଇଁ ସର୍ବୋଚ୍ଚ ଅଦାଲତ ଶୁକ୍ରବାର ସଚିବଙ୍କୁ ନୋଟିସ୍ ଜାରି କରିଛନ୍ତି।
ମହାରାଷ୍ଟ୍ର ବିଧାନସଭା ସ୍ବାଧିକାର ଭଙ୍ଗ ମାମଲାରେ ଅର୍ଣ୍ଣବଙ୍କ ଗିରଫଦାରି ଉପରେ ସର୍ବୋଚ୍ଚ ଅଦାଲତ ରୋକ୍ ଲଗାଇଥିଲେ। ଅକ୍ଟୋବର ୧୩ରେ ସଚିବ ଲେଖିଥିବା ପତ୍ରକୁ ଖଣ୍ଡପୀଠ ଗୁରୁତର ସହ ନେଇଛନ୍ତି। ଅର୍ଣ୍ଣବଙ୍କ ଓକିଲ ହରିଶ୍ ସାଲ୍ଭେଙ୍କ ଠାରୁ ଉକ୍ତ ପତ୍ର ସମ୍ପର୍କରେ ଶୁଣିବା ପରେ ପ୍ରଧାନ ବିଚାରପତି ଏସ୍.ଏ. ବୋବ୍ଡେଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କ୍ଷୁବ୍ଧ ହୋଇଥିଲେ। ଏହା ଅଦାଲତ ଅବମାନନା ବୋଲି ଖଣ୍ଡପୀଠ କହିଥିଲେ। ଆବେଦନକାରୀ କୋର୍ଟ ଯାଇଥିବାରୁ ତାଙ୍କୁ ଧମକାଇବା ଉକ୍ତ ପତ୍ରର ଉଦ୍ଦେଶ୍ୟ ବୋଲି ସ୍ପଷ୍ଟ ହେଉଛି। ସେଥିପାଇଁ ସମ୍ବିଧାନର ଅନୁଚ୍ଛେଦ ୧୨୯ରେ ପ୍ରଦତ୍ତ କ୍ଷମତା ବଳରେ ସଚିବଙ୍କୁ କ’ଣ ପାଇଁ ଦଣ୍ଡିତ କରା ନ ଯିବ କାରଣ ଦର୍ଶାଇବାକୁ ଖଣ୍ଡପୀଠ କହିଥିଲେ। ଖଣ୍ଡପୀଠରେ ଜଷ୍ଟିସ୍ ଏ.ଏସ୍. ବୋପାନ୍ନା ଏବଂ ଭି. ରାମସୁବ୍ରମଣ୍ୟନ ରହିଛନ୍ତି।