ନୂଆଦିଲ୍ଲୀ, ୨୧ା୩:ପର୍ଯ୍ୟାପ୍ତ ତଥ୍ୟ ଯୋଗାଇବାରେ ସୁବିଧା ପାଇଁ ଅନ୍ଲାଇନ ସୂଚନା ଅଧିକାର (ଆର୍ଟିଆଇ) ପୋର୍ଟାଲ ସ୍ଥାପନ ଲାଗି ସୁପ୍ରିମକୋର୍ଟ ସୋମବାର ଦେଶର ସମସ୍ତ ହାଇକୋର୍ଟଙ୍କୁ ନିର୍ଦ୍ଦେଶ ଦେଇଛନ୍ତି। ୨୦୦୫ରେ ଆର୍ଟିଆଇ ଆଇନ କାର୍ଯ୍ୟକାରୀ ହୋଇଥିଲା। ଏହାର ୧୭ ବର୍ଷ ପରେ ମଧ୍ୟ ହାଇକୋର୍ଟଗୁଡ଼ିକରେ ଅନ୍ଲାଇନ ଆର୍ଟିଆଇ ପୋର୍ଟାଲ ନ ଥିବାରୁ ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ୩ ଜଣିଆ ଖଣ୍ଡପୀଠ ବିସ୍ମୟ ପ୍ରକାଶ କରିଛନ୍ତି। ଜିଲା ଅଦାଲତଗୁଡ଼ିକ ପାଇଁ ମଧ୍ୟ ଏଭଳି ପୋର୍ଟାଲ ସ୍ଥାପନ ନିମନ୍ତେ ହାଇକୋର୍ଟ ମୁଖ୍ୟ ବିଚାରପତିମାନଙ୍କଠାରୁ ରେଜିଷ୍ଟ୍ରାର ଜେନେରାଲ ଅନୁମତି ଲୋଡ଼ିବାକୁ ଖଣ୍ଡପୀଠ କହିଛନ୍ତି। ଆଇନ ଅନୁଯାୟୀ ଜଣେ ବ୍ୟକ୍ତିଗତ ଭାବେ କିମ୍ବା ଇଲେକ୍ଟ୍ରୋନିକ ମାଧ୍ୟମରେ ତଥ୍ୟ ଜାଣିବା ପାଇଁ ଆବେଦନ କରିପାରିବେ। ତେଣୁ ୩ ମାସ ମଧ୍ୟରେ ହାଇକୋର୍ଟଗୁଡ଼ିକ ଅନ୍ଲାଇନ ଆର୍ଟିଆଇ ପୋର୍ଟାଲ ଖୋଲିବାକୁ ସୁପ୍ରିମକୋର୍ଟ କହିଛନ୍ତି। ବର୍ତ୍ତମାନ ସୁଦ୍ଧା ଓଡ଼ିଶା ହାଇକୋର୍ଟ, ଦିଲ୍ଲୀ ହାଇକୋର୍ଟ ଏବଂ ମଧ୍ୟପ୍ରଦେଶ ହାଇକୋର୍ଟ ଆର୍ଟିଆଇ ପାଇଁ ଅନ୍ଲାଇନ ପୋର୍ଟାଲ ସ୍ଥାପନ କରିଛନ୍ତି। ତେବେ କୌଣସି ହାଇକୋର୍ଟ ଜିଲା ଅଦାଲତଗୁଡ଼ିକ ପାଇଁ ଆର୍ଟିଆଇ ପୋର୍ଟାଲ ଖୋଲିନାହାନ୍ତି। ସମସ୍ତ ହାଇକୋର୍ଟ ଓ ଜିଲା କୋର୍ଟରେ ଅନ୍ଲାଇନ ଆର୍ଟିଆଇ ଖୋଲିବା ନିମନ୍ତେ ପ୍ରବାସୀ ଲିଗାଲ ସେଲ୍ ନାମକ ଏନ୍ଜିଓ ପକ୍ଷରୁ ଆବେଦନ କରାଯାଇଥିଲା। ଜଷ୍ଟିସ୍ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଜଷ୍ଟିସ ପି.ଏସ୍. ନରସିଂହ ଏବଂ ଜେ.ବି. ପର୍ଡିଓ୍ବାଲାଙ୍କ ଖଣ୍ଡପୀଠ ଉପରୋକ୍ତ ନିର୍ଦ୍ଦେଶ ଦେଇଛନ୍ତି।