ନୂଆଦିଲ୍ଲୀ,୮।୧୧: ହାଜତ ମୃତ୍ୟୁ ମାମଲାରେ ସିବିଆଇ ଯାଞ୍ଚ ପାଇଁ ଆହ୍ଲାବାଦ ହାଇକୋର୍ଟଙ୍କ ଆଦେଶରେ ସୁପ୍ରିମକୋର୍ଟ ହସ୍ତକ୍ଷେପ କରିବାକୁ ମନା କରି ଦେଇଛନ୍ତି। ଏହି ମାମଲାରେ ଉତ୍ତରପ୍ରଦେଶର ଜୈନପୁରର ଜଣେ ୨୪ ବର୍ଷ ବୟସ୍କ ବ୍ୟକ୍ତିଙ୍କ ହାଜତ ମୃତ୍ୟୁ ଘଟଣାର ତଦନ୍ତ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)କୁ ହସ୍ତାନ୍ତର କରାଯାଇଥିଲା। ଆହ୍ଲାବାଦ ହାଇକୋର୍ଟଙ୍କ ଏହି ଆଦେଶରେ ହସ୍ତକ୍ଷେପ କରିବାକୁ ଶୀର୍ଷକୋର୍ଟ ମନା କରିଛନ୍ତି।
ବିଚାରପତି ଭିନିତ ସରନ ଏବଂ ଅନିରୁଦ୍ଧ ବୋଷଙ୍କ ନେତୃତ୍ୱରେ ଗଠିତ ଖଣ୍ଡପୀଠ ହାଇକୋର୍ଟର ସେପ୍ଟେମ୍ବର ୮ ଆଦେଶ ବିରୁଦ୍ଧରେ ଦାଖଲ କରାଯାଇଥିବା ଆବେଦନକୁ ଖାରଜ କରିଦେଇଛନ୍ତି। ଏଥିରେ ହାଇକୋର୍ଟର ପ୍ରିମା ଫେସି ଜାଣିବାକୁ ପାଇଛନ୍ତି ଯେ ମୃତ ବ୍ୟକ୍ତିଙ୍କୁ ଆଇପିଏସ ସ୍ତରୀୟ ଅଧିକାରୀ ହତ୍ୟା କରିଛନ୍ତି। ସମ୍ପୃକ୍ତ ଅଧିକାରୀ ଏହି ମାମଲା ସହିତ ଜଡିତ ଅଛନ୍ତି। ତେବେ ସୁପ୍ରିମକୋର୍ଟ ତାଙ୍କ ନିର୍ଦ୍ଦେଶରେ କହିଛନ୍ତି ଯେ ହାଇକୋର୍ଟଙ୍କ ରାୟ ଅନୁସାରେ ସିବିଆଇ ନିରପେକ୍ଷ ତଥା ଆଇନ ଅନୁଯାୟୀ ଏହାର ଯାଞ୍ଚ କରିବେ।
ଅତିରିକ୍ତ ସୋଲିସିଟର ଜେନେରାଲ ଏସ.ଭି ରାଜୁଙ୍କ ତର୍କ ଶୁଣିବା ପରେ ସିବିଆଇ ଦ୍ୱାରା କରାଯିବାକୁ ଥିବା ମାମଲାର ଅନୁସନ୍ଧାନ ପାଇଁ ହାଇକୋର୍ଟଙ୍କ ପକ୍ଷରୁ ଜାରି ହୋଇଥିବା ନିର୍ଦ୍ଦେଶରେ ହସ୍ତକ୍ଷେପ କରିବାକୁ କୌଣସି କାରଣ ନାହିଁ। ତଥାପି ଘଟଣାର ସତ୍ୟତାକୁ ବିଚାର କରି ଖଣ୍ଡପୀଠ ନିର୍ଦ୍ଦେଶ ଦେଉଛନ୍ତି ଯେ ହାଇକୋର୍ଟଙ୍କ ରାୟ ଅନୁସାରେ ନିରପେକ୍ଷ ତଦନ୍ତ ଉପରେ ଗୁରୁତ୍ୱାରୋପ କରାଯାଉଛି। ଏହି ଘଟଣାରେ, ଧାରା ୩୦୨, ୩୯୪, ୪୫୨ ଏବଂ ୫୦୪ ଆଇପିସି ଧାରା ଅନୁଯାୟୀ ଅଭିଯୁକ୍ତ ପୋଲିସ କର୍ମଚାରୀଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା।