ନୂଆଦିଲ୍ଲୀ,୨୪।୧୦: ମହାରାଷ୍ଟ୍ର ବିଧାନସଭା ନିର୍ବାଚନ ପୂର୍ବରୁ ଶରଦ ପାୱାରଙ୍କୁ ଏକ ବଡ ଝଟ୍କା ଲାଗିଛି। ଅଜିତ ପାୱାରଙ୍କୁ ଘଣ୍ଟା ନିର୍ବାଚନ ପ୍ରତୀକ ବ୍ୟବହାର ନ କରିବା ପିଟିଶନକୁ ସୁପ୍ରିମକୋର୍ଟ ପ୍ରତ୍ୟାଖ୍ୟାନ କରିଛନ୍ତି। ନିର୍ବାଚନ ପ୍ରତୀକ ଘଣ୍ଟା ବ୍ୟବହାର ଉପରେ ପ୍ରତିବନ୍ଧକ ଲଗାଇବାକୁ ଏନସିପି (ଶରଦ ପାୱାର) ଅକ୍ଟୋବର ୨ରେ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରିଥିଲେ।
ସୁପ୍ରିମକୋର୍ଟ ଅଜିତ ପାୱାରଙ୍କଠାରୁ ଲିଖିତ କାଗଜପତ୍ର ମାଗିଥିଲେ ଏବଂ ଏଥିରେ ଘଣ୍ଟା ପ୍ରତୀକ ସହିତ କୋର୍ଟରେ ବିଚାରାଧୀନ ଥିବା ଆଦେଶକୁ ସେ ପାଳନ କରିବେ ବୋଲି ଲେଖି ଦେବାକୁ କହିଥିଲେ।
ନିର୍ବାଚନ ଆୟୋଗ ଅଜିତ ପାୱାରଙ୍କ ଏନସିପିକୁ ପ୍ରକୃତ ଏନସିପି ଦଳ ବୋଲି ଘୋଷଣା କରିଥିଲେ ଏବଂ ଦଳର ପ୍ରତୀକ (ଘଣ୍ଟା) ବ୍ୟବହାର କରିବାର ଅଧିକାର ଦେଇଥିଲେ। କୋର୍ଟରେ ଯୁକ୍ତିତର୍କ ବେଳେ ଶରଦ ପାୱାରଙ୍କ ଓକିଲ ଅଭିଷେକ ମନୁ ସିଂଘଭି କହିଛନ୍ତି, ମାର୍ଚ୍ଚରେ ହୋଇଥିବା ଶୁଣାଣିରେ ଆମ ପାଇଁ ତୂରୀ ପ୍ରତୀକ ବ୍ୟବହାର କରିବାକୁ କୋର୍ଟ ନିର୍ବାଚନ ଆୟୋଗଙ୍କୁ ନିର୍ଦ୍ଦେଶ ଦେଇଛନ୍ତି। ଅଜିତ ପାୱାରଙ୍କୁ ଘଣ୍ଟା ପ୍ରତୀକ ସହିତ ଲେଖିବାକୁ କୁହାଯାଇଥିଲା। ଏହି ମାମଲା କୋର୍ଟରେ ବିଚାରାଧୀନ ଅଛି। ସେମାନେ ଏହାକୁ ସଠିକ ଭାବରେ ଅନୁସରଣ କରୁ ନାହିଁ। ଲୋକମାନେ ଶରଦ ପାୱାରଙ୍କୁ ଘଣ୍ଟା ପ୍ରତୀକ ଭାବେ ଜାଣନ୍ତି।
ଏହା ଉପରେ ଅଜିତ ପାୱାରଙ୍କ ଓକିଲ ବଲବୀର ସିଂ କହିଛନ୍ତି, ଲୋକସଭା ନିର୍ବାଚନ ସମୟରେ ସେମାନେ (ଶରଦ ପାୱାର ଗୋଷ୍ଠୀ) ମଧ୍ୟ ସମାନ କଥା କହିଥିଲେ। କୋର୍ଟ ଘଣ୍ଟା ପ୍ରତୀକ ଆମ ସହିତ ରହିବାକୁ ଅନୁମତି ଦେଇଛନ୍ତି। ବର୍ତ୍ତମାନ ଆମେ ଏହା ଶୁଣିବା ଉଚିତ୍ ନୁହେଁ।