ନୂଆଦିଲ୍ଲୀ,୧୮।୪ (ଆଇଏଏନ୍ଏସ୍): ସୁପ୍ରିମକୋର୍ଟ ବିଭିନ୍ନ ରାୟରେ ଭାରତୀୟ ୟୁନିୟନର ବିଶେଷତ୍ୱ ସମ୍ପର୍କରେ ମନ୍ତବ୍ୟ ଦେବା ସହ ସଂଘୀୟ ବ୍ୟବସ୍ଥାର ପ୍ରତିଷ୍ଠା ଓ ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇ ଆସିଛନ୍ତି। କେନ୍ଦ୍ର ଓ ରାଜ୍ୟ ସରକାରଙ୍କୁ ନେଇ ଭାରତୀୟ ୟୁନିୟନ ଗଠିତ। ତେବେ ସବୁ କ୍ଷେତ୍ରରେ ସେମାନଙ୍କ କ୍ଷମତା ସମାନ ନୁହେଁ। ଏହାକୁ ନେଇ ସଂଘୀୟ ବ୍ୟବସ୍ଥା ଚଳାଇବାରେ ଜଟିଳତା ଦେଖାଦେଇଥାଏ। ତେଣୁ କେନ୍ଦ୍ର ସରକାର ଓ ରାଜ୍ୟ ସରକାରଙ୍କୁ ମିଳିଥିବା ଶାସନ କ୍ଷମତାର ସୂକ୍ଷ୍ମ ସନ୍ତୁଳନକୁ ସୁପ୍ରିମକୋର୍ଟ ସଂରକ୍ଷିତ ରଖିବା ଆବଶ୍ୟକ। ଗୋଟିଏ ସଂସ୍ଥାର କ୍ଷମତା ପରିସର ମଧ୍ୟରେ ଅନ୍ୟ ସଂସ୍ଥା ପ୍ରବେଶକୁ ରୋକିବା ଦିଗରେ ସର୍ବୋଚ୍ଚ ଅଦାଲତ ପଦକ୍ଷେପ ନେବା ଜରୁରୀ ବୋଲି ବିଶେଷଜ୍ଞମାନେ ମତ ଦେଇଛନ୍ତି। ଉଦାହରଣ ସ୍ବରୂପ ଜାତୀୟ ରାଜଧାନୀର ପ୍ରଶାସନିକ ସେବା ନିୟନ୍ତ୍ରଣ କରିବାକୁ ନେଇ ଦିଲ୍ଲୀ ସରକାର ଏବଂ କେନ୍ଦ୍ର ମଧ୍ୟରେ ବିବାଦ ସୁପ୍ରିମକୋର୍ଟଙ୍କ ବିଚାରାଧୀନ ରହିଛି। ବଦଳି ନିଯୁକ୍ତି କ୍ଷମତା ଛଡ଼ାଇ ନେଇ କେନ୍ଦ୍ର ସରକାର ସଂଘୀୟ ବ୍ୟବସ୍ଥାର ବିରୁଦ୍ଧାଚରଣ କରୁଥିବା ଦିଲ୍ଲୀ ସରକାର ଅଭିଯୋଗ କରିଆସୁଛନ୍ତି। ଏଭଳି ବିବାଦରେ କେନ୍ଦ୍ର ଏବଂ ରାଜ୍ୟ ଯେପରି ପରସ୍ପରର କ୍ଷମତା ପରିସରରେ ପ୍ରବେଶ ନ କରିବେ ସେ ଦିଗରେ ସର୍ବୋଚ୍ଚ ଅଦାଲତ ନିଷ୍ପତ୍ତି ନେବା ଉଚିତ ବୋଲି ବରିଷ୍ଠ ଆଇନଜୀବୀ ଦୁଷ୍ୟନ୍ତ ଡାଭେ କହିଛନ୍ତି। ଅତୀତରେ ସୁପ୍ରିମକୋର୍ଟ ସଂଘବାଦ ନୀତିକୁ ସମର୍ଥନ କରିଆସିଛନ୍ତି। ରାଜ୍ୟ ସରକାରଙ୍କ କ୍ଷମତାର ସୁରକ୍ଷା ଜରୁରୀ ବୋଲି ବରିଷ୍ଠ ଆଇନଜୀବୀ ରାକେଶ ଦ୍ୱିବେଦୀ ମତ ଦେଇଛନ୍ତି। କାରଣ କେନ୍ଦ୍ର ସରକାର ଅଧିକ କ୍ଷମତା ଉପଭୋଗ କରୁଥିବାବେଳେ ଅନେକ କ୍ଷେତ୍ରରେ ରାଜ୍ୟ ସରକାରଙ୍କ କ୍ଷମତାରେ ମଧ୍ୟ ହସ୍ତକ୍ଷେପ କରିଥାନ୍ତି। ଜିଏସ୍ଟି କାର୍ଯ୍ୟକାରୀ କରାଯିବା ଦ୍ୱାରା ରାଜ୍ୟ ସରକାରଙ୍କ ଟିକସ କ୍ଷମତା ହ୍ରାସ ପାଇଥିବା ସେ କହିଛନ୍ତି। ସିବିଆଇ ଭଳି କେନ୍ଦ୍ରୀୟ ସଂସ୍ଥାକୁ ତଦନ୍ତ ହସ୍ତାନ୍ତର ଦାବି ହେଉଥିବାବେଳେ ଅଦାଲତ ସ୍ବତନ୍ତ୍ର ତଦନ୍ତକାରୀ ଟିମ୍ (ଏସ୍ଆଇଟି) ଗଠନ ଉପରେ ଗୁରୁତ୍ୱ ଦେବା ଆବଶ୍ୟକ ବୋଲି ବିଶେଷଜ୍ଞ ମତ ଦେଇଛନ୍ତି।