ନୂଆଦିଲ୍ଲୀ, ୨୧।୯ : ଏକ ନୂତନ ପଦକ୍ଷେପ ଅନ୍ତର୍ଗତ ସୁପ୍ରିମକୋର୍ଟ ସେପ୍ଟେମ୍ବର ୨୭ ରୁ ସାମ୍ବିଧାନିକ ପୀଠ ମାମଲାର ଲାଇଭ ଷ୍ଟ୍ରିମିଂ ଆରମ୍ଭ କରିବାକୁ ନିଷ୍ପତ୍ତି ନେଇଛନ୍ତି। ମଙ୍ଗଳବାର ସାରେ ଭାରତର ପ୍ରଧାନ ବିଚାରପତି (ସିଜେଇ) ୟୁୟୁ ଲଲିତଙ୍କ ଦ୍ୱାରା ଡକାଯାଇଥିବା ସମ୍ପୂର୍ଣ୍ଣ କୋର୍ଟ ବୈଠକରେ ଏହି ନିଷ୍ପତ୍ତି ନିଆଯାଇଛି। ପ୍ରାପ୍ତ ସୂଚନା ଅନୁଯାୟୀ ଏହି ନିଷ୍ପତ୍ତି ସର୍ବସମ୍ମତି କ୍ରମେ ନିଆଯାଇଛି। ଏହା ମଧ୍ୟ ଜଣାପଡ଼ିଛି ଯେ ପ୍ରାରମ୍ଭରେ ଶୁଣାଣିର ସିଧା ପ୍ରସାରଣ ୟୁଟ୍ୟୁବ ମାଧ୍ୟମରେ ହେବ।
ଖୁବ ଶୀଘ୍ର ସୁପ୍ରିମକୋର୍ଟ ପ୍ରକ୍ରିୟାର ଲାଇଭ ଟେଲିକାଷ୍ଟ ପାଇଁ ନିଜସ୍ବ ପ୍ଲାଟଫର୍ମ ବିକଶିତ କରିବେ। ସୁପ୍ରିମକୋର୍ଟଙ୍କ ଏହି ନିଷ୍ପତ୍ତି ଏପରି ଏକ ସମୟରେ ଆସିଛି ଯେତେବେଳେ ସାମ୍ବିଧାନିକ ପୀଠରେ ପୂର୍ବରୁ ଅନେକ ଗୁରୁତ୍ୱପୂର୍ଣ୍ଣ ମାମଲାର ଶୁଣାଣି ଜାରି ରହିଛି। ସେସବୁ ମଧ୍ୟରେ ଅର୍ଥନୈତିକ ଦୁର୍ବଳ ବିଭାଗ (ଇଡବ୍ଲୁଏସ) ପାଇଁ ୧୦ ପ୍ରତିଶତ ସଂରକ୍ଷଣର ସାମ୍ବିଧାନିକ ବୈଧତା, ଭୋପାଳ ଗ୍ୟାସ ଦୁର୍ଘଟଣାରେ କ୍ଷତିପୂରଣର ପର୍ଯ୍ୟାପ୍ତତା, ବୋହରା ସମ୍ପ୍ରଦାୟକୁ ବାଦ ଦେବାର ଅଧିକାର ଅନ୍ତର୍ଭୁକ୍ତ।
