ଛତ୍ରପୁର,୧୪ା୮(ଡି.ଏନ୍.ଏ.): ବିଶ୍ୱ ଅଙ୍ଗଦାନ ଦିବସ ଅବସରରେ ଗଞ୍ଜାମ ଜିଲା କବିସୂର୍ଯ୍ୟନଗର ବ୍ଲକ ବୋରସିଂ ପଞ୍ଚାୟତ ଭାତପଡା ଗାଁର ସ୍ବର୍ଗତ ବିପିନ ପ୍ରଧାନଙ୍କ ପରିବାରକୁ ସୁରଜ ଆୱାର୍ଡ ପ୍ରଦାନ କରାଯାଇଛି।ଏହି ଆଓ୍ବାର୍ଡ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୫ ଲକ୍ଷ ଟଙ୍କା ମଞ୍ଜୁର କରିଥିଲେ।ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଓ ଆସିକା ବିଧାୟିକା ମଞ୍ଜୁଳା ସ୍ବାଇଁ ଉକ୍ତ ଚେକ୍କୁ ବିପିନଙ୍କ ସ୍ତ୍ରୀ ରେଣୁ ପ୍ରଧାନଙ୍କୁ ପ୍ରଦାନ କରିଛନ୍ତି। ଏହି ଉପଲକ୍ଷେ ଶୁକ୍ରବାର ସନ୍ଧ୍ୟାରେ ଆୟୋଜିତ କାର୍ଯ୍ୟକ୍ରମରେ ଭିଡିଓ କନଫରେନ୍ସରେ ମୁଖ୍ୟମନ୍ତ୍ରୀ, ୫-ଟି ସଚିବ ଭି. କେ. ପାଣ୍ଡିଆନ୍, ସ୍ବାସ୍ଥ୍ୟମନ୍ତ୍ରୀ ନବ ଦାଶ ପ୍ରମୁଖ ଯୋଡି ହୋଇଥିଲେ। ବିପିନ୍ଙ୍କ ମୃତ୍ୟୁ ପରେ ଗତ ମାର୍ଚ୍ଚ ୨୦ ତାରିଖରେ ତାଙ୍କ କିଡନୀ, ହୃତପିଣ୍ଡ, ଲିଭର, ୨ ଆଖି ସମେତ ୬ଟି ଅଙ୍ଗ ସୁରଟସ୍ଥିତ କିରଣ ହସ୍ପିଟାଲରେ ଦାନ ଦିଆଯାଇଥିଲା।
ସୂଚନାଯୋଗ୍ୟ, ୨୦୧୯ ନଭେମ୍ବର ମାସରେ ଭଞ୍ଜନଗର ଅଞ୍ଚଳର ସୁରଜ ବେହେରାଙ୍କ ମୃତ୍ୟୁ ପରେ ତାଙ୍କର କିଡନୀ, ଲିଭର, ହାର୍ଟ ଓ ଦୁଇଟି ଆଖି ତାଙ୍କ ପରିବାରବର୍ଗ ଦାନ କରିଥିଲେ।ଏହି ତ୍ୟାଗ ସମସ୍ତଙ୍କୁ ଅଭିଭୂତ କରିଥିଲା।ସେବେଠାରୁ ସୁରଜଙ୍କ ସ୍ମୃତିରେ ରାଜ୍ୟ ସରକାର ଏହି ଆଓ୍ବାର୍ଡ ଆରମ୍ଭ କରିଛନ୍ତି। ଯେଉଁମାନେ ଅଙ୍ଗଦାନ କରୁଛନ୍ତି ତାଙ୍କ ପରିବାରବର୍ଗଙ୍କୁ ୫ ଲକ୍ଷ ଟଙ୍କା ଦିଆଯାଉଛି।ଛତ୍ରପୁରସ୍ଥିତ ଓସ୍ବାନ୍ ହଲ୍ରେ ଅନୁଷ୍ଠିତ କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲାପାଳ ଅମୀୟ କୁମାର ସାହୁ, ଯୁବ ବିଜେଡି ଜୋନ୍ ସଭାପତି ନଚିକେତା ସ୍ବାଇଁ ପ୍ରମୁଖ ଉପସ୍ଥିତ ଥିଲେ।