ଭୁବନେଶ୍ୱର,୧ା୧(ବ୍ୟୁରୋ): ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ଗୁରୁବାର ଅବସର ନେଇଛନ୍ତି। ଜାନୁୟାରୀ ୧ ତାରିଖ ଅର୍ଥାତ୍ ଶୁକ୍ରବାର ନୂଆ ମୁଖ୍ୟ ଶାସନ ସଚିବ ଭାବେ ସୁରେଶ ମହାପାତ୍ର ଦାୟିତ୍ୱ ଗ୍ରହଣ କରିବେ। କୋଭିଡ କଟକକଣା ଥିବାରୁ ବିଦାୟୀ ମୁଖ୍ୟ ଶାସନ ସଚିବ ତ୍ରିପାଠୀ ଏକ ଭିଡିଓ ବାର୍ତ୍ତାରେ କହିଛନ୍ତି, ଜଣେ ଆଇଏଏସ୍ ଅଫିସର ଭାବେ ୩୦ରୁ ୩୫ ବର୍ଷ ପରେ ଏହି ପଦରେ ବସିବାର ସୌଭାଗ୍ୟ ମିଳିଥିବାରୁ ଅତ୍ୟନ୍ତ ଖୁସି। ଏଥିପାଇଁ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଦେଇଥିଲେ। ମୁଖ୍ୟମନ୍ତ୍ରୀଙ୍କ ତତ୍ତ୍ୱାବଧାନରେ କୋଭିଡ ମୁକାବିଲା କରିବାରେ ଆମେ ସଫଳ ହୋଇ ପାରିଛୁ। କୋଭିଡ ବିରୋଧରେ ଯେଉଁ ପଦକ୍ଷେପ ନିଆଗଲା ସବୁଠି ତାହାକୁ ପ୍ରଶଂସା ମିଳିଛି।
କୋଭିଡ କଟକଣା ଯୋଗୁ ମୁଖ୍ୟ ଶାସନ ସଚିବଙ୍କ ପାଇଁ ବିଦାୟକାଳୀନ ସଭା ଅନୁଷ୍ଟିତ ହୋଇ ପାରି ନ ଥିଲା। ତେବେ ସମସ୍ତ ଆଇଏଏସ, ଓଏସଏସ, ସେକ୍ରେଟାରୀଏଟ ସେବା ଅଧିକାରୀ, ସୁରକ୍ଷା କର୍ମୀମାନେ ମୁଖ୍ୟ ଶାସନ ସଚିବଙ୍କ କାର୍ଯ୍ୟାଳୟକୁ ଯାଇ ସାମାଜିକ ଦୂରତା ରକ୍ଷା କରି ବିଦାୟ ଜଣାଇଥିଲେ।